Manpreet Singh
ਧਨੌਲਾ, 27 ਅਗਸਤ (ਸੁਖਰਾਜ ਚਹਿਲ):- ਆਮ ਆਦਮੀ ਪਾਰਟੀ ਸੰਗਰੂਰ-ਬਰਨਾਲਾ ਇਲਾਕੇ ਨੂੰ ਆਪਣੀ ਰਾਜਧਾਨੀ ਸਮਝਦੀ ਹੈ, ਕਿਉਂਕਿ ਆਪ ਪਾਰਟੀ ਦੀਆਂ ਜੜ੍ਹਾਂ ਇੱਥੇ ਹੀ ਸਭ ਤੋਂ ਪਹਿਲਾਂ ਲੱਗੀਆਂ ਸਨ, ਪਰ ਹੁਣ ਸਮੇਂ ਨੇ ਅਜਿਹੀ ਕਰਵਟ ਲਈ ਕਿ ਆਮ ਆਦਮੀ ਪਾਰਟੀ ਆਪਣੇ ਇਸੇ ਇਲਾਕੇ ਵਿੱਚ ਪਤਨ ਵੱਲ ਜਾਂਦੀ ਵਿਖਾਈ ਦੇ ਰਹੀ ਹੈ। ਖਾਸਕਰ ਬਰਨਾਲਾ ਵਿੱਚ ਹਰ ਰੋਜ਼ ਵਾਂਗ ਆਮ ਆਦਮੀ ਪਾਰਟੀ ਦੇ ਵੱਡੇ ਆਗੂ ਪਾਰਟੀ ਨੂੰ ਛੱਡ ਛੱਡ ਕੇ ਭੱਜ ਰਹੇ ਹਨ। ਇਸੇ ਤਰ੍ਹਾਂ ਅੱਜ ਧਨੌਲਾ ਵਿੱਚ ਆਮ ਆਦਮੀ ਪਾਰਟੀ ਨੂੰ ਓਦੋਂ ਵੱਡਾ ਝਟਕਾ ਲੱਗ ਗਿਆ ਨਗਰ ਕੌਂਸਲ ਧਨੌਲਾ ਦਾ ਮੀਤ ਪ੍ਰਧਾਨ ਸੁਖਵਿੰਦਰ ਸਿੰਘ ਮੁੰਦਰੀ ਆਪਣੇ ਵੱਡੀ ਗਿਣਤੀ ਵਿੱਚ ਸ਼ਾਮਿਲ ਸਾਥੀਆਂ ਸਮੇਤ ਆਮ ਆਦਮੀ ਪਾਰਟੀ ਦਾ ਬਾਈਕਾਟ ਕਰ ਗਿਆ।
ਮੀਤ ਪ੍ਰਧਾਨ ਸੁਖਵਿੰਦਰ ਸਿੰਘ ਮੁੰਦਰੀ ਨੇ ਆਪਣੇ ਘਰ ਦੇਰ ਸ਼ਾਮ ਰੱਖੀ ਗਈ ਪ੍ਰੈੱਸ ਕਾਨਫਰੰਸ ਦੌਰਾਨ ਕਿਹਾ ਕਿ ਪਾਰਟੀ ਅੰਦਰ ਕੋਈ ਸੁਣਵਾਈ ਨਾ ਹੋਣ ਕਾਰਨ ਅਤੇ ਨਗਰ ਕੌਂਸਲ ਦਫ਼ਤਰ ਅੰਦਰ ਫੈਲੇ ਕਥਿਤ ਭ੍ਰਿਸ਼ਟਾਚਾਰ ਅਤੇ ਪ੍ਰਧਾਨ ਦੇ ਬੇਟੇ ਵੱਲੋਂ ਆਪਣੀ ਹਕੂਮਤ ਚਲਾਉਣ, ਸ਼ਹਿਰ ਦੇ ਕੰਮਾਂ ‘ਚ ਅੜਿੱਕਾ ਪਾਉਣ ਆਦਿ ਕੰਮਾਂ ਨੂੰ ਲੈਕੇ ਬਾਈਕਾਟ ਕਰਨ ਦਾ ਫੈਸਲਾ ਕੀਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਮੈਂ ਹਮੇਸ਼ਾ ਪਾਰਟੀ ਦੀ ਚੜ੍ਹਦੀਕਲਾ ਲਈ ਕੰਮ ਕੀਤਾ ਗਿਆ ਪਰ ਅਫਸੋਸ ਅੱਜ ਮੈਨੂੰ ਮੀਤ ਪ੍ਰਧਾਨ ਹੋਣ ਦੇ ਬਾਵਜੂਦ ਖੱਜਲ ਖੁਆਰ ਕੀਤਾ ਜਾ ਰਿਹਾ ਹੈ। ਸ਼ਹਿਰ ਅੰਦਰ ਲਾਈਟਾਂ ਲਗਵਾਉਣ ਲਈ ਪ੍ਰਧਾਨ ਦੇ ਬੇਟੇ ਵੱਲੋਂ ਰੋਕਿਆ ਜਾ ਰਿਹਾ ਹੈ। ਨਗਰ ਕੌਂਸਲ ਦਫ਼ਤਰ ਅੰਦਰ ਸਭ ਕੁੱਝ ਠੀਕ ਨਹੀਂ ਚੱਲ ਰਿਹਾ ਵਿਕਾਸ ਕੰਮ ਰੁਕੇ ਪਏ ਹਨ, ਸਭ ਕੁੱਝ ਧਿਆਨ ਵਿਚ ਲਿਆਉਣ ਦੇ ਬਾਵਜੂਦ ਜਦੋਂ ਸੁਣਵਾਈ ਨਹੀਂ ਹੋਈ ਤਾਂ ਸਾਨੂੰ ਅੱਜ ਇਹ ਰਾਹ ਅਖਤਿਆਰ ਕਰਨਾ ਪਿਆ। ਉਹਨਾਂ ਦੋਸ਼ ਲਗਾਏ ਗਏ ਕਿ ਸ਼ਹਿਰ ਦੇ ਵਿਕਾਸ ਕੰਮ ਇਸ ਕਰਕੇ ਰੁਕੇ ਪਏ ਹਨ ਕਿਉਂਕਿ ਮੁਲਾਜ਼ਮਾਂ ਦੀ ਡਾਰ ਤਾ ਪ੍ਰਧਾਨ ਦਾ ਪੁੱਤਰ ਆਪਣੇ ਘਰੇਲੂ ਕੰਮ ਲਈ ਵਰਤ ਰਿਹਾ ਹੈ, ਜਿਸਦੇ ਅਸੀਂ ਖ਼ਿਲਾਫ਼ ਹਾਂ ਅਸੀਂ ਚਾਹੁੰਦੇ ਹਾਂ ਕਿ ਜਿਹੜਾ ਪੈਸਾ ਸਾਡੇ ਸੰਸਦ ਮੈਂਬਰ ਗੁਰਮੀਤ ਸਿੰਘ ਮੀਤ ਹੇਅਰ ਵੱਲੋਂ ਇਲਾਕੇ ਦੇ ਵਿਕਾਸ ਲਈ ਲਿਆਂਦਾ ਗਿਆ ਉਸਨੂੰ ਸਹੀ ਤਰੀਕੇ ਨਾਲ ਸਹੀ ਜਗ੍ਹਾ ਲਗਾ ਸਕੀਏ ਪਰ ਅਜਿਹਾ ਨਹੀਂ ਹੋ ਰਿਹਾ ਜਿਹੜੇ ਲੋਕਾਂ ਨੇ ਸਾਨੂੰ ਜਿਤਾਇਆ ਹੈ ਉਹ ਸਾਡੇ ਕੋਲ ਕੰਮ ਦੀ ਫ਼ਰਿਆਦ ਕਰ ਰਹੇ ਹਨ ਪਰ ਅਸੀਂ ਅਸਮਰੱਥ ਹੋਏ ਪਏ ਹਾਂ, ਜਿਸ ਕਰਕੇ ਸਾਨੂੰ ਮਜਬੂਰਨ ਇਹ ਫੈਸਲਾ ਲੈਣਾ ਪਿਆ।
