ਡੀ ਟੀ ਐਫ ਵੱਲੋਂ ਧੱਕੇ ਨਾਲ ਲਗਾਈਆਂ ਜਾ ਰਹੀਆਂ ਡਰੱਗ ਸਰਵੇ ਡਿਊਟੀਆਂ ਦੀ ਨਿਖੇਧੀ

ਨਿਹਾਲ ਸਿੰਘ ਵਾਲਾ,10 ਜੂਨ ( ਪ ਪ)– ਐਸ ਡੀ ਐਮ ਦਫ਼ਤਰ ਨਿਹਾਲ ਸਿੰਘ ਵਾਲਾ ਵੱਲੋਂ ਅਧਿਆਪਕਾਂ ਦੀਆਂ ਛੁੱਟੀਆਂ ਵਿੱਚ ਜਬਰਦਸਤੀ ਲਗਾਈਆ ਜਾ ਰਹੀਆਂ ਡਰੱਗ ਜਨਗਣਨਾ ਦੀ ਨਿਖੇਧੀ ਕਰਦਿਆਂ ਬਲਾਕ ਕਮੇਟੀ ਡੀ. ਟੀ. ਐਫ. ਨਿਹਾਲ ਸਿੰਘ ਵਾਲਾ ਦੇ ਬਲਾਕ ਪ੍ਰਧਾਨ ਅਮਨਦੀਪ ਸਿੰਘ ਮਾਛੀਕੇ ਅਤੇ ਬਲਾਕ ਸਕੱਤਰ ਗੁਰਮੀਤ ਸਿੰਘ ਝੋਰੜਾ ਨੇ ਕਿਹਾ ਕਿ ਬਹੁਤ ਸਾਰੇ ਅਧਿਆਪਕ ਪਹਿਲਾਂ ਹੀ ਕੇਂਦਰ ਵੱਲੋਂ ਕੀਤੀ ਜਾ ਰਹੀ ਜਨਗਣਨਾ ਦੀਆਂ ਡਿਊਟੀਆਂ ਨਿਭਾ ਕੇ ਹਟੇ ਹਨ ਅਤੇ ਹੁਣ ਨਾਲੋ -ਨਾਲ ਹੁਣ ਕੰਮ ਉਹਨਾਂ ਦੀਆਂ ਡਿਊਟੀਆਂ ਡਰੱਗ ਜਨਗਣਨਾ ਲਗਾ ਕੇ ਉਨ੍ਹਾਂ ਨੂੰ ਛੁਟੀਆਂ ਵਿੱਚ ਮਾਨਸਿਕ ਤੌਰ ਤੇ ਪਰੇਸ਼ਾਨ ਕੀਤਾ ਜਾ ਰਿਹਾ ਹੈ। ਆਗੂਆਂ ਨੇ ਕਿਹਾ ਕਿ ਪੰਜਾਬ ਸਰਕਾਰ ਵੱਲੋਂ ਡਰੱਗ ਸੈਂਸਜ ਕਰਨ ਲਈ ਸਵੈ ਇੱਛੁਕ ਤੌਰ ਤੇ ਨਾਮ ਦੇਣ ਲਈ ਇਸਤਿਹਾਰ ਦਿੱਤਾ ਗਿਆ ਸੀ, ਪਰ ਹੁਣ ਜ਼ਿਲ੍ਹਾ ਪ੍ਰਸ਼ਾਸਨ ਅਤੇ ਐਸ. ਡੀ. ਐਮ. ਦਫਤਰਾਂ ਵਲੋਂ ਧੱਕੇ ਨਾਲ ਅਧਿਆਪਕਾਂ ਨੂੰ ਇਹ ਡਿਊਟੀ ਕਰਨ ਲਈ ਮਜਬੂਰ ਕੀਤਾ ਜਾ ਰਿਹਾ ਹੈ। ਬਲਾਕ ਮੀਤ ਪ੍ਰਧਾਨ ਸੁਖਜੀਤ ਸਿੰਘ, ਬਲਾਕ ਵਿੱਤ ਸਕੱਤਰ ਜਸਵੀਰ ਸਿੰਘ ਸੈਦੋਕੇ, ਪ੍ਰੈਸ ਸਕੱਤਰ ਹੀਰਾ ਸਿੰਘ ਨੇ ਕਿਹਾ ਕਿ ਜਦੋਂ ਹੁਣ ਅਧਿਆਪਕਾਂ ਨੂੰ ਸਰਕਾਰ ਵਲੋਂ ਗਰਮੀਆਂ ਦੀਆਂ ਛੁਟੀਆਂ ਕੀਤੀਆਂ ਜਾ ਚੁੱਕੀਆਂ ਹਨ ਅਤੇ ਜੋ ਅਧਿਆਪਕ ਦੂਰ ਜ਼ਿਲ੍ਹਿਆਂ ਦੇ ਆਪਣੇ ਪਰਿਵਾਰ ਕੋਲ ਆਪਣੇ -ਆਪਣੇ ਪਿੰਡ ਚਲੇ ਗਏ ਹਨ ਉਦੋਂ ਪ੍ਰਸ਼ਾਸਨ ਵੱਲੋਂ ਉਨ੍ਹਾਂ ਨੂੰ ਦੂਰੋ ਬੁਲਾਕੇ ਐਨੀ ਗਰਮੀ ਵਿੱਚ ਘਰ – ਘਰ ਜਾ ਕੇ ਸਰਵੇ ਕਰਨ ਨੂੰ ਕਹਿਣਾ ਬਿਲਕੁਲ ਵੀ ਤਰਕ ਸੰਗਤ ਨਹੀਂ ਹੈ |ਇਸ ਸਮੇਂ ਨਵਦੀਪ ਸਿੰਘ ਧੂੜਕੋਟ, ਕੁਲਵਿੰਦਰ ਸਿੰਘ ਚੁੱਘੇ,ਕਮਲਜੀਤ ਸਿੰਘ ਮਾਨ, ਸੰਦੀਪ ਕੁਮਾਰ ਸੈਦੋਕੇ, ਆਦਿ ਅਧਿਆਪਕ ਆਗੂ ਹਾਜ਼ਰ ਸਨ।