ਸਪਾਊਸ ਕੇਸਾਂ ਦੇ ਬਿਨੈਕਾਰਾਂ ਨੂੰ ਤਰਸ ਦੇ ਅਧਾਰ ਨੌਕਰੀਆਂ ਦੇਣ ਸਬੰਧੀ ਅਦਰੂਨੀ ਸਮੀਖਿਆ ਜ਼ੋਰਾਂ ਤੇ : ਡਾਇਰੈਕਟਰ ਸੁਰਸਿੰਘ

ਫਤਿਆਬਾਦ 1 ਅਪ੍ਰੈਲ  ( ਕਰਨੈਲ ਸਿੰਘ ਰਿੰਕੂ )  ਪੀਐਸਪੀਸੀਐਲ ਦੇ ਮੁੱਖ ਦਫਤਰ ਪਟਿਆਲਾ ਵਿਖੇ  ਤਰਸ ਦੇ ਅਧਾਰ ਤੇ ਨੌਕਰੀਆਂ ਪ੍ਰਾਪਤ ਕਰਨ ਵਾਲੇ ਆਸਰਿਤ ਬਿਨੈਕਾਰਾਂ ਦੇ  ਨੌਕਰੀ ਵਾਲੇ ਕੇਸ ਪਿਛਲੇ 24 ਮਹੀਨਿਆਂ ਤੋਂ ਲਮਕ ਅਵਸਥਾ ਵਿੱਚ ਪਏ ਹੋਏ ਹਨ। ਪੰਜਾਬ ਰਾਜ ਬਿਜਲੀ ਬੋਰਡ ਚੋ ਨੌਕਰੀਆਂ ਕਰਨ ਦੌਰਾਨ ਮਰਨ ਵਾਲੇ ਕਰਮਚਾਰੀਆਂ ਦੇ  ਵਾਰਸਾਂ ਵੱਲੋਂ ਆਪਣੀਆਂ ਨੌਕਰੀ ਪ੍ਰਾਪਤ ਕਰਨ ਲਈ  ਤੇ ਰੁਜ਼ਗਾਰ ਪ੍ਰੋਗਰਾਮ ਨੂੰ ਸਫ਼ਲ ਬਣਾਉਣ ਲਈ ਆਪਣੀਆਂ ਫਾਈਲਾਂ ਅਸਲ ਸਰਟੀਫਿਕੇਟਾਂ ਸਮੇਤ ਸਾਰੇ ਕਾਗਜ਼ ਮੁਕੰਮਲ ਕਰਕੇ ਪਟਿਆਲਾ ਹੈਡਕੁਆਰਟਰ ਭੇਜ ਦਿੱਤੇ ਗਏ ਸਨ । ਜਿਨ੍ਹਾਂ ਨੂੰ ਬੋਰਡ ਨੇ ਅੰਡਰ ਪ੍ਰੋਸੈਸਿੰਗ ਵਿੱਚ ਰੱਖਿਆ ਹੋਇਆ ਹੈ। ਇਸ ਉਪਰੰਤ ਸੀਐਮ ਭਗਵੰਤ ਮਾਨ ਨੇ ਸਾਰੇ ਸਰਕਾਰੀ ਅਦਾਰਿਆਂ ਨੂੰ ਹਦਾਇਤਾਂ ਜਾਰੀ ਕੀਤੀਆਂ ਹਨ ਕਿ ਹਰ ਤਰ੍ਹਾਂ ਦੇ ਪੈਂਡਿੰਗ ਕੇਸਾਂ ਦਾ ਨਿਪਟਾਰਾ ਕੀਤਾ ਜਾਵੇ ਤਾਂ ਜੋ ਸਰਕਾਰ ਪੱਖੀ ਲੋਕਾਂ ਦਾ ਭਰੋਸਾ ਮਜ਼ਬੂਤ ਰਹੇ। ਇਸ ਸਬੰਧੀ ਪੀਐਸਪੀਸੀਐਲ ਦੇ ਪ੍ਰਬੰਧਕੀ ਡਾਇਰੈਕਟਰ ਸ੍ਰ ਜਸਬੀਰ ਸਿੰਘ ਢਿੱਲੋਂ ਸੁਰਸਿੰਘ  ਨੂੰ ਉਨ੍ਹਾਂ ਦੇ ਗ੍ਰਹਿ ਅੰਮ੍ਰਿਤਸਰ ਵਿਖੇ ਸਪਾਊਸ ਕੇਸਾਂ ਦੇ ਬਿਨੈਕਾਰਾਂ ਦੇ ਗਰੁੱਪ ਨੇ ਮੁਲਾਕਾਤ ਕੀਤੀ । ਡਾਇਰੈਕਟਰ ਸੁਰਸਿੰਘ ਨੇ  ਆਸਰਿਤ ਬਿਨੈਕਾਰਾਂ ਦੇ ਇਸ ਦਰਦ ਨੂੰ ਅਸਹਿ ਦੱਸਿਆ। ਉਨ੍ਹਾਂ ਕਿਹਾ ਕਿ ਪੰਜਾਬ ਸਰਕਾਰ ਵੱਲੋਂ ਨਵੀਂ ਬਣੀ ਪਾਲਿਸੀ ਵਿੱਚ ਤਰਸ ਦੇ ਆਧਾਰ ਉੱਤੇ ਮਿਲਣ ਜਾ ਰਹੀਆਂ ਨੌਕਰੀਆਂ ਵਿੱਚ ਸਪਾਊਸ ਕੇਸਾਂ ਦੀਆਂ ਫਾਈਲਾਂ ਨੂੰ ਸਫ਼ਲ ਬਣਾਉਣ ਲਈ ਅੰਦਰੂਨੀ ਪ੍ਰਕਿਰਿਆ ਅਤੇ ਸਮੀਖਿਆ ਚੱਲ ਰਹੀ ਹੈ। ਆਮ  ਆਦਮੀ ਪਾਰਟੀ ਦੀ ਸਰਕਾਰ ਵੱਲੋਂ ਇਸ ਸਬੰਧੀ ਹਾਂ ਪੱਖੀ ਕਦਮ ਚੁੱਕੇ ਜਾ ਰਹੇ ਹਨ। ਜਲਦ ਹੀ ਸਾਰੀਆਂ ਤਰੁੱਟੀਆਂ ਦੂਰ ਕਰਕੇ ਇਸ ਨੂੰ ਹੱਲ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਬਾਡੀ ਆਫ ਡਾਇਰੈਕਟਰਜ਼ ਦੀਆਂ ਲਗਾਤਾਰ ਮੀਟਿੰਗਾਂ ਕੀਤੀਆਂ ਜਾ ਰਹੀਆਂ ਹਨ। ਇਸ ਸਬੰਧੀ ਡਾਇਰੈਕਟਰ ਸੁਰਸਿੰਘ ਨੇ ਮਿਲ਼ਣ ਵਾਲੇ ਬਿਨੈਕਾਰਾਂ ਨੂੰ ਕਿਹਾ ਕਿ  ਤਰਸ ਦੇ ਆਧਾਰ ਤੇ ਸਪਾਊਸ ਡਬਲ ਪੈਨਸ਼ਨ ਅਤੇ ਸਪਾਊਸ ਹਿਤ ਉਪਰੋਕਤ ਸਾਰੇ ਕੇਸਾਂ ਨੂੰ ਜਲਦੀ ਹੱਲ ਕਰਕੇ ਬਿਨੈਕਾਰਾਂ ਨੂੰ ਨਿਯੁਕਤੀ ਪੱਤਰ ਸੌਂਪੇ ਜਾਣਗੇ । ਇਸ ਮੌਕੇ   ਮੋਤੀ ਲਾਲ ਮੁਕਤਸਰ ਸਾਹਿਬ, ਪ੍ਰਦੀਪ ਸਿੰਘ ਸਿੱਧੂ  ਬਠਿੰਡਾ, ਮੋਹਿਤ ਸ਼ਰਮਾ  ਪਟਿਆਲਾ, ਸੈਮਲਦੀਪ ਸਿੰਘ ਰਟੌਲ  ਤਰਨਤਾਰਨ ਅਤੇ ਲਵਦੀਪ ਸਿੰਘ  ਅੰਮ੍ਰਿਤਸਰ ਆਦਿ ਮੌਜੂਦ ਸਨ।