ਸੇਢਾ ਸਿੰਘ ਵਾਲਾ ਵਿਖੇ ਸਵੀਟ ਸ਼ਾਪ ਨੂੰ ਅਣਪਛਾਤੇ ਵਿਅਕਤੀਆਂ ਵੱਲੋਂ ਨਿਸ਼ਾਨਾ ਬਣਾ ਕੇ ਭੰਨਤੋੜ ਕੀਤੀ ਗਈ

ਬਾਜਾਖਾਨਾ, 7 ਅਪ੍ਰੈਲ (ਅਵਤਾਰ ਸਿੰਘ ਮੱਲਾ) –  ਨਜਦੀਕੀ ਪਿੰਡ ਸੇਢਾ ਸਿੰਘ ਵਾਲਾ ਦੇ ਮੁੱਖ ਬੱਸ ਸਟੈਂਡ ’ਤੇ ਸਥਿਤ ਇੱਕ  ਮਠਿਆਈਆਂ  ਅਤੇ ਡੇਅਰੀ ਨੂੰ ਆਪਣਾ ਨਿਸ਼ਾਨਾ ਬਣਾਂ ਕੇ ਭੰਨਤੋੜ ਕੀਤੇ ਜਾਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ। ਮੌਕੇ ’ਤੇ ਜਾ ਕੇ ਪ੍ਰਾਪਤ ਕੀਤੀ ਜਾਣਕਾਰੀ ਮੁਤਾਬਿਕ ਉਕਤ ਗੁਰੂ ਨਾਨਕ ਸਵੀਟ ਹਾਊਸ ਅਤੇ ਡੇਅਰੀ ਸੇਢਾ ਸਿੰਘ ਵਾਲਾ ’ਤੇ ਦੁਪਹਿਰ 1:30 ਵਜੇ ਦੇ ਕਰੀਬ ਪੰਜ-ਛੇ ਅਣਪਛਾਤੇ ਵਿਅਕਤੀਆਂ ਜਿਨ੍ਹਾਂ ਦੇ ਮੂੰਹ ਬੰਨੇ ਹੋਏ ਸਨ, ਨੇ ਬੁਰੀ ਤਰ੍ਹਾਂ ਭੰਨਤੋੜ ਕਰਕੇ ਤਹਿਸ-ਨਹਿਸ ਕਰ ਦਿੱਤਾ। ਇਸ ਮੌਕੇ ’ਤੇ ਦੁਕਾਨ ਦੇ ਮਾਲਕ ਗੁਰਲਾਲ ਸਿੰਘ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਉਕਤ ਅਣਪਛਾਤੇ ਵਿਅਕਤੀਆਂ ਵੱਲੋਂ ਦੁਕਾਨ ਦਾ ਮੁੱਖ ਗੇਟ, ਕਾਊਂਟਰ, ਫ਼ਰਿਜਾਂ, ਸ਼ੋਅਕੇਸ਼ ਅਤੇ ਹਰ ਤਰ੍ਹਾਂ ਦੇ ਸ਼ੀਸ਼ੇ ਨੂੰ ਬੁਰੀ ਤਗ਼੍ਹਾਂ ਭੰਨਤੋੜ ’ਤੇ ਉਨ੍ਹਾਂ ਦਾ ਕਰੀਬ ਡੇਢ ਲੱਖ ਰੁਪਏੇ  ਦੇ ਕਰੀਬ ਨੁਕਸਾਨ ਕਰ ਦਿੱਤਾ ਅਤੇ ਉਕਤ ਵਿਅਕਤੀ ਬਾਜਾਖਾਨਾ ਦੀ ਤਰਫ਼ੋਂ ਗੋਲਡਨ ਕੱਲਰ ਦੀ ਹੌਂਡਾ ਸਿਟੀ ਕਾਰ ’ਤੇ ਸਵਾਰ ਹੋ ਕੇ ਆਏਂ ਸਨ ਅਤੇ ਵਾਰਦਾਤ ਕਰਨ ਉਪਰੰਤ ਜੈਤੋ ਦੀ ਤਰਫ਼ ਚਲੇ ਗਏੇ । ਇਸ ਮੌਕੇ ’ਤੇ ਪੁਲੀਸ ਥਾਣਾ ਬਾਜਾਖਾਨਾ ਦੇ ਇੰਚਾਰਜ਼ ਸਬ ਇੰਸਪੈਕਟ ਬਲਰਾਜ ਸਿੰਘ ਆਪਣੀ ਪੁਲੀਸ ਪਾਰਟੀ ਨਾਲ ਪਹੁੰਚੇ ਅਤੇ ਨੇੜਲੀਆਂ ਥਾਵਾਂ ’ਤੇ ਲੱਗੇ ਕੈਮਰਿਆਂ ਦੀ ਫ਼ੁੱਟੇਜ ਨੂੰ ਉਨ੍ਹਾਂ ਵੱਲੋਂ ਖੁਗਾਲਿਆਂ ਜਾ ਰਿਹਾ ਹੈ ਅਤੇ ਜਲਦ ਹੀ ਅਣਪਛਾਤੇ ਵਿਅਕਤੀਆਂ ਨੂੰ ਟਰੇਸ ਕਰ ਲਿਆ ਜਾਵੇਗਾ।