ਪਿੰਡ ਬਜੀਦਪੁਰ ਦੀ ਉਪਜਾਊ ਜ਼ਮੀਨ ਗਰੀਨ ਜ਼ੋਨ ‘ਚ ਪਾਉਣ ਖਿਲਾਫ਼ ਵਸਨੀਕਾਂ ਤੇ ਕਿਸਾਨ ਜਥੇਬੰਦੀਆਂ ਨੇ ਫ਼ੈਸਲਾ ਨਾ ਬਦਲਣ ਤੇ ਕੀਤਾ ਸੰਘਰਸ਼ ਦਾ ਐਲਾਨ 

ਨਿਊ ਚੰਡੀਗੜ੍, 23 ਜੁਲਾਈ (ਬਜੀਦਪੁਰ) -ਨਿਊ ਚੰਡੀਗੜ੍ਹ ਨੇੜਲੇ ਪਿੰਡ ਬਜੀਦਪੁਰ ਦੀ ਉਪਜਾਊ ਜ਼ਮੀਨ ਫ਼ੋਰਇਸਟ ਜ਼ੋਨ ‘ਚ ਪਾਉਣ ਖਿਲਾਫ਼ ਵਸਨੀਕ ਕਿਸਾਨਾਂ ਅਤੇ ਕਿਸਾਨ ਜਥੇਬੰਦੀਆਂ ਨੇ ਗਮਾਡਾ ਨੂੰ ਮੰਗ ਪੱਤਰ ਦੇਣ ਉਪਰੰਤ ਫ਼ੈਸਲਾ ਨਾ ਬਦਲਣ ਤੇ ਸੰਘਰਸ਼ ਦਾ ਐਲਾਨ ਕੀਤਾ। ਇਸ ਸੰਬੰਧੀ ਕਿਸਾਨ ਯੂਨੀਅਨ ਲੱਖੋਵਾਲ ਦੇ ਨਛੱਤਰ ਸਿੰਘ ਬੈਦਵਾਨ, ਕਿਸਾਨ ਯੂਨੀਅਨ ਰਾਜੇਵਾਲ ਦੇ ਪਰਮਦੀਪ ਸਿੰਘ ਬੈਦਵਾਨ, ਲੋਕ ਹਿੱਤ ਮਿਸ਼ਨ ਦੇ ਭਗਤ ਸਿੰਘ ਭਗਤ ਮਾਜਰਾ ਨੇ ਤੇ ਰਵਿੰਦਰ ਸਿੰਘ ਬਜੀਦਪੁਰ, ਜਰਨੈਲ ਸਿੰਘ ਮਾਵੀ, ਜਸਪਾਲ ਸਿੰਘ ਲੱਕੀ, ਰਘਵੀਰ ਸਿੰਘ ਮਾਵੀ, ਹਰਨੇਕ ਸਿੰਘ ਤੇ ਪਰਮਜੀਤ ਸਿੰਘ ਕਾਲਾ ਨੇ ਦੱਸਿਆ ਕਿ ਪਿੰਡ ਬਜੀਦਪੁਰ ਦੇ ਜ਼ਮੀਨ ਸਬ ਤਹਿਸੀਲ ਮਾਜਰੀ ਅਤੇ ਮੇਨ ਹਾਈਵੇਅ ਨੇੜੇ ਹੋਣ ਤੇ ਉਪਜਾਊ ਜ਼ਮੀਨ ਹੋਣ ਕਾਰਨ ਇਸ ਜ਼ਮੀਨ ਦੀ ਕਰੋੜਾਂ ਦੀ ਕੀਮਤ ਹੈ, ਪਰ ਗਮਾਡਾ ਨੇ ਕੁਰਾਲੀ ਪਲਾਇਨ ਅਧੀਨ ਇਸ ਮਹਿੰਗੇ ਖੇਤਰ ਨੂੰ ਗਰੀਨ ਜ਼ੋਨ ਵਿੱਚ ਪਾ ਦਿੱਤਾ ਅਤੇ ਅਗਲੇ ਪਿੰਡਾਂ ‘ਚ ਸ਼ਾਮਲਾਤ ਅਤੇ ਨਦੀਆਂ ਅਧੀਨ ਬੰਜਰ ਜ਼ਮੀਨ ਨੂੰ ਆਰ ਜ਼ੋਨ ਵਿਚ ਪਾ ਦਿੱਤਾ। ਇਸ ਲਈ ਜੇਕਰ ਗਮਾਡਾ ਨੇ ਇਸ ਫ਼ੈਸਲੇ ਨੂੰ ਜਲਦੀ ਨਾ ਬਦਲਿਆ ਤਾਂ ਕਿਸਾਨ ਜਥੇਬੰਦੀਆਂ ਵਸਨੀਕਾਂ ਨੂੰ ਨਾਲ ਲੈ ਕੇ ਵੱਡਾ ਸੰਘਰਸ਼ ਆਰੰਭਣਗੀਆਂ।