Manpreet Singh
ਮਿਤੀ: 11 ਜੁਲਾਈ 2026 ਬਰਨਾਲਾ (ਬਲਵੰਤ ਸਿੰਘ ਸਿੱਧੂ): ਅੱਜ ਦੇ ਸਮੇਂ ਵਿੱਚ ਜਿੱਥੇ ਬਹੁਤ ਸਾਰੇ ਨੌਜਵਾਨ ਰੁਜ਼ਗਾਰ ਦੀ ਭਾਲ ਵਿੱਚ ਹਨ, ਉੱਥੇ ਭਵਨਜੀਤ ਸਿੰਘ ਝੁਹਾਨਕੇ ਆਪਣੀ ਮਿਹਨਤ ਅਤੇ ਸੋਚ ਨਾਲ ਹੋਰਨਾਂ ਲਈ ਪ੍ਰੇਰਣਾ ਬਣਿਆ ਹੋਇਆ ਹੈ। ਉਹ ਬਰਨਾਲਾ ਦੀ ਅਨਾਜ ਮੰਡੀ ਨੇੜੇ ਮਾਰਕੀਟ ਕਮੇਟੀ ਕੋਲ ਇੱਕ ਵਿਸ਼ੇਸ਼ ਢੰਗ ਨਾਲ ਤਾਜ਼ੀਆਂ ਜਲੇਬੀਆਂ ਤਿਆਰ ਕਰਕੇ ਵੇਚ ਰਿਹਾ ਹੈ। ਭਵਨਜੀਤ ਸਿੰਘ ਨੇ ਆਪਣੀ ਮਾਰੂਤੀ ਕਾਰ ਨੂੰ ਹੀ ਛੋਟੇ ਹੋਟਲ ਦਾ ਰੂਪ ਦੇ ਦਿੱਤਾ ਹੈ। ਕਾਰ ਦੀ ਬਾਡੀ ਨੂੰ ਸੋਧ ਕੇ ਉਸ ਵਿੱਚ ਕੜਾਹੀ, ਚਾਸਨੀ, ਝਾਰਨੀ ਅਤੇ ਜਲੇਬੀਆਂ ਬਣਾਉਣ ਲਈ ਲੋੜੀਂਦਾ ਸਾਰਾ ਸਾਜ਼ੋ-ਸਾਮਾਨ ਫਿੱਟ ਕੀਤਾ ਗਿਆ ਹੈ। ਉਸੇ ਵਿੱਚ ਸਿਲੰਡਰ ਅਤੇ ਚੁੱਲ੍ਹੇ ਦੀ ਵੀ ਵਿਵਸਥਾ ਹੈ, ਜਿਸ ਨਾਲ ਉਹ ਤਾਜ਼ੀਆਂ ਅਤੇ ਗਰਮਾ-ਗਰਮ ਜਲੇਬੀਆਂ ਤਿਆਰ ਕਰਦਾ ਹੈ। ਭਵਨਜੀਤ ਸਿੰਘ ਨੇ ਦੱਸਿਆ ਕਿ ਉਹ ਹਰ ਰੋਜ਼ ਲਗਭਗ ਪੰਜ ਘੰਟੇ ਸਟਾਲ ਲਗਾਉਂਦਾ ਹੈ ਅਤੇ ਸਾਰੇ ਖ਼ਰਚੇ ਕੱਢਣ ਤੋਂ ਬਾਅਦ ਕਰੀਬ ਦੋ ਹਜ਼ਾਰ ਰੁਪਏ ਦੀ ਬਚਤ ਹੋ ਜਾਂਦੀ ਹੈ। ਉਸ ਨੇ ਕਿਹਾ ਕਿ ਅੱਜ ਦੇ ਸਮੇਂ ਵਿੱਚ ਕੋਈ ਵੀ ਛੋਟਾ ਜਾਂ ਵੱਡਾ ਕਾਰੋਬਾਰ ਕਰਨ ਵਿੱਚ ਕੋਈ ਹਿਚਕਿਚਾਹਟ ਨਹੀਂ ਹੋਣੀ ਚਾਹੀਦੀ। ਮਿਹਨਤ ਕਰਨ ਵਾਲੇ ਲਈ ਹਰ ਕੰਮ ਇੱਜ਼ਤ ਵਾਲਾ ਹੈ। ਉਨ੍ਹਾਂ ਕਿਹਾ ਕਿ ਜਲੇਬੀਆਂ ਦਾ ਇਹ ਕਾਰੋਬਾਰ ਸ਼ਹਿਰ ਦੇ ਵੱਖ-ਵੱਖ ਸਥਾਨਾਂ ’ਤੇ ਵੀ ਕੀਤਾ ਜਾ ਸਕਦਾ ਹੈ। ਗਾਹਕ ਗਰਮਾ-ਗਰਮ ਜਲੇਬੀਆਂ ਬੜੇ ਚਾਵ ਨਾਲ ਖਾਂਦੇ ਹਨ ਅਤੇ ਆਮ ਤੌਰ ’ਤੇ ਇੱਕ ਗਾਹਕ 100 ਤੋਂ 200 ਰੁਪਏ ਜਾਂ ਇਸ ਤੋਂ ਵੱਧ ਦੀ ਜਲੇਬੀ ਖਰੀਦ ਕੇ ਲੈ ਜਾਂਦਾ ਹੈ। ਭਵਨਜੀਤ ਸਿੰਘ ਨੇ ਨੌਜਵਾਨਾਂ ਨੂੰ ਸੰਦੇਸ਼ ਦਿੰਦਿਆਂ ਕਿਹਾ ਕਿ ਬੇਰੁਜ਼ਗਾਰ ਬੈਠਣ ਦੀ ਬਜਾਏ ਆਪਣਾ ਕੋਈ ਨਾ ਕੋਈ ਰੁਜ਼ਗਾਰ ਸ਼ੁਰੂ ਕਰੋ, ਕਿਉਂਕਿ ਮਿਹਨਤ ਹੀ ਕਾਮਯਾਬੀ ਦੀ ਅਸਲ ਕੁੰਜੀ ਹੈ।
