ਅੰਮ੍ਰਿਤਸਰ 18 ਜੁਲਾਈ (ਮਨਜੀਤ ਸਿੰਘ ਸ਼ੇਰਗਿੱਲ )=ਅੰਮ੍ਰਿਤਸਰ ਹਰਿਆਵਲ ਮੰਚ ਵੱਲੋਂ ਪੰਜਾਬ ਵਾਟਰ ਸਪਲਾਈ ਅਤੇ ਸੀਵਰੇਜ ਬੋਰਡ ਅੰਮ੍ਰਿਤਸਰ ਅਤੇ ਵੱਖ-ਵੱਖ ਸਮਾਜਿਕ ਸੰਸਥਾਵਾਂ ਦੇ ਸਹਿਯੋਗ ਨਾਲ ਸੀਵਰੇਜ ਟਰੀਟਮੈਂਟ ਪਲਾਂਟ ਖਾਪੜ ਖੇੜੀ ਵਿਖੇ ਤਕਰੀਬਨ ਡੇਢ ਏਕੜ ਜਮੀਨ ਵਿੱਚ ਇੱਕ ਵਿਸ਼ਾਲ ਮਿੰਨੀ ਜੰਗਲ / ‘ਗੁਰੂ ਨਾਨਕ ਯਾਦਗਾਰੀ ਜੰਗਲ’ ਲਗਾਇਆ ਗਿਆ। ਹਰੇ-ਭਰੇ ਭਵਿੱਖ ਦੀ ਸਿਰਜਣਾ ਦੇ ਉਦੇਸ਼ ਨਾਲ ਚਲਾਈ ਗਈ ਇਸ ਪੌਦੇ ਲਗਾਉਣ ਦੀ ਮੁਹਿੰਮ ਵਿੱਚ ਕਾਰ ਸੇਵਾ ਸੰਤ ਬਾਬਾ ਸੇਵਾ ਸਿੰਘ ਜੀ ਖਡੂਰ ਸਾਹਿਬ ਵਾਲਿਆਂ ਦੀ ਟੀਮ, ਸਵੱਛ ਪੰਜਾਬ ਫਾਊਂਡੇਸ਼ਨ ਤੋਂ ਇਸ਼ਲੀਨ ਕੋਰ ਆਨੰਦ, ਸਿਮਰਪ੍ਰੀਤ ਸਿੰਘ, ਦਵਿੰਦਰ ਪਾਲ ਸਿੰਘ, ‘ਥਰੀ ਆਰ ਕੰਪਨੀ’ ਤੋਂ ਮਿਸ ਤੋਸ਼ੀ, ‘ਥਰਾਇਵ ਟੂਗੈਦਰ ਐਨ ਜੀ ਓ’ ਅਤੇ ‘ਸੈਣੀ ਸਮਾਜ ਸੇਵਾ ਟਰਸਟ’ ਨੇ ਵਿਸ਼ੇਸ਼ ਸਹਿਯੋਗ ਦਿੱਤਾ।ਇਸ ਦੌਰਾਨ ਜੈਵ-ਵਿਵਿਧਤਾ ਨੂੰ ਹੁਲਾਰਾ ਦੇਣ ਲਈ ਹਰਬਲ ਅਤੇ ਔਸ਼ਧੀ ਗੁਣਾਂ ਵਾਲੇ ਪੌਦੇ ਜਿਵੇਂ ਨਿੰਮ, ਹਰੜ, ਸੁਹਜਣਾ; ਫਲਦਾਰ ਰੁੱਖ ਜਿਵੇਂ ਅੰਮ, ਜਾਮਣ, ਅਮਰੂਦ; ਅਤੇ ਸੁੰਦਰ-ਖੁਸ਼ਬੂਦਾਰ ਫੁੱਲਾਂ ਵਾਲੇ ਬੂਟੇ ਜਿਵੇਂ ਕਚਨਾਰ, ਅਮਲਤਾਸ ਤੇ ਹਾਰ-ਸ਼ਿੰਗਾਰ ਸਮੇਤ ਤਕਰੀਬਨ 2000 ਪੌਦੇ ਲਗਾਏ ਗਏ। ਇਹ ਸਾਰੀਆਂ ਵੰਨਗੀਆਂ ਜੰਗਲ ਵਿੱਚ ਇੱਕ ਅਜਿਹਾ ਵਾਤਾਵਰਨ ਤਿਆਰ ਕਰਨਗੀਆਂ ਜਿੱਥੇ ਪੰਛੀਆਂ ਨੂੰ ਆਲ੍ਹਣੇ, ਇਨਸਾਨਾਂ ਨੂੰ ਸ਼ੁੱਧ ਆਕਸੀਜਨ/ਦਵਾਈਆਂ ਅਤੇ ਧਰਤੀ ਨੂੰ ਹਰਿਆਵਲ ਮਿਲੇਗੀ।ਇਸ ਪ੍ਰਾਜੈਕਟ ਨੂੰ ਸਫਲ ਬਣਾਉਣ ਵਿੱਚ ਪੰਜਾਬ ਵਾਟਰ ਸਪਲਾਈ ਅਤੇ ਸੀਵਰੇਜ ਬੋਰਡ ਤੇ ਨਗਰ ਨਿਗਮ ਅੰਮ੍ਰਿਤਸਰ ਦੇ ਨਿਗਰਾਨ ਇੰਜੀਨੀਅਰ ਡਾ. ਜਿਤਿਨ ਵਾਸੂਦੇਵਾ, ਕਾਰਜਕਾਰੀ ਇੰਜੀਨੀਅਰ ਇੰਜ. ਗੁਰਜਿੰਦਰ ਸਿੰਘ ਅਤੇ ਉਪ ਮੰਡਲ ਇੰਜੀਨੀਅਰ ਸ੍ਰੀ ਦੀਪਕ ਸੈਣੀ ਨੇ ਪ੍ਰਸ਼ਾਸਨਿਕ ਪੱਧਰ ‘ਤੇ ਪੂਰਾ ਯੋਗਦਾਨ ਪਾਇਆ। ਇਸ ਮੌਕੇ ਮੰਚ ਦੇ ਪ੍ਰਧਾਨ ਦਲਜੀਤ ਸਿੰਘ ਕੋਹਲੀ ਨੇ ਗਲੋਬਲ ਵਾਰਮਿੰਗ ਅਤੇ ਧਰਤੀ ਹੇਠਲੇ ਡਿੱਗ ਰਹੇ ਪਾਣੀ ਦੇ ਪੱਧਰ ‘ਤੇ ਗੰਭੀਰ ਚਿੰਤਾ ਪ੍ਰਗਟਾਈ। ਉਨ੍ਹਾਂ ਸੰਖੇਪ ਵਿੱਚ ਵੱਡਾ ਸੁਨੇਹਾ ਦਿੰਦਿਆਂ ਕਿਹਾ ਕਿ ਪੰਜਾਬ ਵਿੱਚ ਜੰਗਲਾਤ ਹੇਠ ਰੁੱਖ ਸਿਰਫ਼ 3-4% ਰਹਿ ਗਏ ਹਨ। ਵਧਦੀ ਗਰਮੀ ਨੂੰ ਰੋਕਣ, ਹਵਾ ਸਾਫ਼ ਕਰਨ ਅਤੇ ਮੀਂਹ ਰਾਹੀਂ ਪਾਣੀ ਦਾ ਪੱਧਰ ਉੱਚਾ ਚੁੱਕਣ ਲਈ 33-34% ਤੱਕ ਰੁੱਖਾਂ ਦੀ ਗਿਣਤੀ ਕਰਨਾ ਅਤਿ ਜ਼ਰੂਰੀ ਹੈ, ਕਿਉਂਕਿ “ਰੁੱਖ ਹੈ ਤਾਂ ਮਨੁੱਖ ਹੈ, ਜਲ ਹੈ ਤਾਂ ਕਲ ਹੈ, ਨਹੀਂ ਤਾਂ ਸਭ ਮਾਰੂਥਲ ਹੈ।”ਮੰਚ ਦੇ ਜਨਰਲ ਸਕੱਤਰ ਇੰਜੀ. ਮਨਜੀਤ ਸਿੰਘ ਸੈਣੀ ਨੇ ਕਿਹਾ ਕਿ ਸਾਨੂੰ ਕੁਦਰਤ ਤੋਂ ਪ੍ਰੇਰਨਾ ਲੈ ਕੇ ਆਪਣੇ ਜਲਵਾਯੂ ਨੂੰ ਬਚਾਉਣਾ ਪਵੇਗਾ ਤਾਂ ਜੋ ਆਉਣ ਵਾਲੀ ਪੀੜ੍ਹੀ ਸੁਰੱਖਿਅਤ ਹੋ ਸਕੇ। [ਇੱਥੇ ਜੋੜੀ ਗਈ ਲਾਈਨ] ਉਨ੍ਹਾਂ ਕਿਹਾ ਕਿ ਇਹ ‘ਗੁਰੂ ਨਾਨਕ ਯਾਦਗਾਰੀ ਜੰਗਲ’ ਸਿਰਫ਼ ਬੂਟੇ ਲਗਾਉਣ ਤੱਕ ਸੀਮਤ ਨਹੀਂ ਹੈ, ਬਲਕਿ ਇਸ ਦੀ ਸਾਂਭ-ਸੰਭਾਲ ਦੀ ਜ਼ਿੰਮੇਵਾਰੀ ਵੀ ਮੰਚ ਵੱਲੋਂ ਤਨਦੇਹੀ ਨਾਲ ਨਿਭਾਈ ਜਾਵੇਗੀ ਤਾਂ ਜੋ ਇਹ ਆਉਣ ਵਾਲੇ ਸਮੇਂ ਵਿੱਚ ਅੰਮ੍ਰਿਤਸਰ ਦੇ ਫੇਫੜਿਆਂ ਵਜੋਂ ਕੰਮ ਕਰ ਸਕੇ।ਪ੍ਰਸਿੱਧ ਸਮਾਜ ਸੇਵੀ ਡਾਕਟਰ ਨਿਰਮਲ ਸਿੰਘ ਆਨੰਦ ਨੇ ਇਸ ਕਾਰਜ ਨੂੰ ਜਨ-ਜਨ ਤੱਕ ਪਹੁੰਚਾਉਣ ਦੀ ਅਪੀਲ ਕਰਦਿਆਂ ਕਿਹਾ ਕਿ ਵਾਤਾਵਰਨ ਸੰਭਾਲ ਕਿਸੇ ਇੱਕ ਸੰਸਥਾ ਦਾ ਨਹੀਂ, ਸਗੋਂ ਹਰ ਨਾਗਰਿਕ ਦਾ ਨੈਤਿਕ ਫ਼ਰਜ਼ ਹੈ। ਜਦੋਂ ਤੱਕ ਹਰ ਵਿਅਕਤੀ ਸਾਲ ਵਿੱਚ ਇੱਕ ਬੂਟਾ ਲਗਾ ਕੇ ਉਸ ਨੂੰ ਪਾਲਣ ਦਾ ਪ੍ਰਣ ਨਹੀਂ ਲੈਂਦਾ, ਉਦੋਂ ਤੱਕ ਪ੍ਰਦੂਸ਼ਣ ਵਿਰੁੱਧ ਜੰਗ ਜਿੱਤੀ ਨਹੀਂ ਜਾ ਸਕਦੀ। ਸਵੱਛ ਪੰਜਾਬ ਫਾਊਂਡੇਸ਼ਨ ਤੋਂ ਇਸ਼ਲੀਨ ਕੋਰ ਆਨੰਦ, ਸਿਮਰਪ੍ਰੀਤ ਸਿੰਘ, ਦਵਿੰਦਰ ਪਾਲ ਸਿੰਘ ਨੇ ਵਿਸ਼ਵਾਸ ਦਿਵਾਇਆ ਕਿ ਉਹ ਹੋਰ ਨੌਜਵਾਨ ਪੀੜ੍ਹੀ ਨੂੰ ਅਪਣੇ ਨਾਲ ਰਲ਼ਾ ਵਾਤਾਵਰਨ ਸੰਭਾਲ ਵਿੱਚ ਵੱਧ ਤੋਂ ਵੱਧ ਯੋਗਦਾਨ ਪਾਉਣਗੇ।ਸਾਰੇ ਬੁਲਾਰਿਆਂ ਨੇ ਇਸ ਪ੍ਰੋਜੈਕਟ ਲਈ ਇੰਜ ਜਸਬੀਰ ਸਿੰਘ ਸੰਧੂ ਜੀ ਦੇ ਖਾਸ ਯੋਗਦਾਨ ਦੀ ਸ਼ਲਾਘਾ ਕੀਤੀ । ਇਸ ਮਿੰਨੀ ਜੰਗਲ ਲਈ ਡਾ ਇਕਬਾਲ ਸਿੰਘ ਤੁੰਗ ,ਮਨਦੀਪ ਸਿੰਘ, ਸਿਮਰਦੀਪ ਸਿੰਘ (ਸਵੱਛ ਪੰਜਾਬ ਫਾਊਂਡੇਸ਼ਨ), ਜਸਪਾਲ ਸਿੰਘ ਪਾਈਲਟ, ਭੁਪਿੰਦਰ ਸਿੰਘ ਅਤੇ ਮਿਲੋਡੀ ਐਸ਼ ਪੀ ਐਸ਼ ਸਮੇਤ ਕਈ ਪਤਵੰਤੇ ਸੱਜਣਾਂ ਨੇ ਪੌਦੇ ਲਗਾ ਕੇ ਆਪਣਾ ਅਹਿਮ ਯੋਗਦਾਨ ਪਾਇਆ।ਸਮਾਗਮ ਦੇ ਅਖੀਰ ਵਿੱਚ ਹਰਿਆਵਲ ਮੰਚ ਦੇ ਆਗੂਆਂ ਨੇ ਨੌਜਵਾਨ ਪੀੜ੍ਹੀ ਨੂੰ ਵਿਸ਼ੇਸ਼ ਹੋਕਾ ਦਿੰਦਿਆਂ ਕਿਹਾ ਕਿ ਅੱਜ ਦੇ ਡਿਜੀਟਲ ਯੁੱਗ ਵਿੱਚ ਨੌਜਵਾਨਾਂ ਨੂੰ ਗੈਜੇਟਸ ਤੋਂ ਬਾਹਰ ਆ ਕੇ ਕੁਦਰਤ ਨਾਲ ਸਾਂਝ ਪਾਉਣੀ ਚਾਹੀਦੀ ਹੈ। ਉਨ੍ਹਾਂ ਅਪੀਲ ਕੀਤੀ ਕਿ ਹਰ ਨੌਜਵਾਨ ਆਪਣੇ ਜਨਮਦਿਨ ਜਾਂ ਕਿਸੇ ਖ਼ੁਸ਼ੀ ਦੇ ਮੌਕੇ ‘ਤੇ ਇੱਕ ਬੂਟਾ ਜ਼ਰੂਰ ਲਗਾਵੇ ਅਤੇ ਵਾਤਾਵਰਨ ਕ੍ਰਾਂਤੀ ਦਾ ਹਿੱਸਾ ਬਣੇ, ਕਿਉਂਕਿ ਅੱਜ ਦੀ ਹਰਿਆਵਲ ਹੀ ਕੱਲ੍ਹ ਦੇ ਸੁਰੱਖਿਅਤ ਭਵਿੱਖ ਦੀ ਗਾਰੰਟੀ ਹੈ।
Manpreet Singh
Manpreet Singh
