ਭਾਰੀ ਬਾਰਿਸ਼ ਕਾਰਨ ਪਾਵਰਕਾਮ ਦਫ਼ਤਰ ਪਾਣੀ ’ਚ ਡੁੱਬਿਆ

ਮੰਡੀ ਬਰੀਵਾਲਾ, 14 ਜੁਲਾਈ ()-ਸੋਮਵਾਰ ਸਵੇਰ ਤੋਂ ਸ਼ੁਰੂ ਹੋਈ ਭਾਰੀ ਬਾਰਿਸ਼ ਨੇ ਪਾਵਰਕਾਮ ਸਬ ਡਿਵੀਜ਼ਨ ਬਰੀਵਾਲਾ ਦੇ ਕਰਮਚਾਰੀਆਂ ਨੂੰ ਭਾਰੀ ਮੁਸ਼ਕਿਲ ’ਚ ਪਾ ਦਿੱਤਾ ਹੈ। ਅੱਜ ਦੀ ਤੇਜ਼ ਬਾਰਿਸ਼ ਦੇ ਕਾਰਨ ਪਾਵਰਕਾਮ ਦਾ ਸਬ ਡਿਵੀਜ਼ਨ ਸਰਾਏਨਗਾ ਸਥਿਤ ਦਫਤਰ ਪਾਣੀ ’ਚ ਡੁੱਬ ਗਿਆ ਹੈ ਜਿਸਦੇ ਵਿੱਚ ਦਫਤਰ ਦਾ ਕਾਫੀ ਸਾਰਾ ਰਿਕਾਰਡ ਵੀ ਖਰਾਬ ਹੋ ਸਕਦਾ ਹੈ। ਜ਼ਿਕਰਯੋਗ ਹੈ ਕਿ ਇਮਾਰਤ ਵੀ ਕਰਮਚਾਰੀਆਂ ਦੇ ਨਾ ਰਹਿਣ ਯੋਗ ਘੋਸ਼ਿਤ ਕੀਤੀ ਗਈ ਸੀ ਫਿਰ ਵੀ ਇਸ ਖੰਡਰਨੁੰਮਾ ਇਮਾਰਤ ’ਚ ਦਫਤਰ ਚੱਲ ਰਿਹਾ ਹੈ। ਇਹ ਵੀ ਦੱਸਣਯੋਗ ਬਣਦਾ ਹੈ ਕਿ ਸਾਲ 2005 ’ਚ ਵੀ ਹੋਈ ਭਾਰੀ ਬਰਸਾਤ ਕਾਰਨ ਸਰਾਏਨਾਗਾ ਵਿਖੇ ਸਥਿਤ ਗਰਿਡ ਵੀ ਪਾਣੀ ’ਚ ਡੁੱਬ ਗਿਆ ਸੀ ਜਿਸਦੇ ਕਾਰਨ ਕਈ ਦਿਨਾਂ ਤੱਕ ਇਲਾਕੇ ’ਚ ਹਨੇਰਾ ਛਾਇਆ ਰਿਹਾ ਸੀ। ਇਸੇ ਤਰ੍ਹਾਂ ਸੰਨ 2013 ’ਚ ਵੀ ਗਰਿੱਡ ’ਚ ਪਾਣੀ ਭਰ ਗਿਆ ਸੀ। ਉਸਤੋਂ ਉਪਰੰਤ ਗ੍ਰਿਡ ਨੂੰ ਉੱਚਾ ਕਰ ਦਿੱਤਾ ਗਿਆ ਪਰ ਕਰਮਚਾਰੀਆਂ ਦਾ ਦਫਤਰ ਨੀਵਾਂ ਹੀ ਰਹਿ ਗਿਆ ਅਤੇ ਉਹ ਖਸਤਾ ਹਾਲਤ ’ਚ ਹੀ ਚੱਲਦਾ ਰਿਹਾ। ਜਦ ਇਸ ਮਾਮਲੇ ’ਚ ਐਸਡੀਓ ਬਲਜੀਤ ਸਿੰਘ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਮੈਂ ਵਿਭਾਗ ਨੂੰ ਲਿਖ ਚੁੱਕਿਆ ਹਾਂ ਜਿਸ ’ਤੇ ਕਾਰਵਾਈ ਜਲਦੀ ਹੋਣ ਦੀ ਉਮੀਦ ਹੈ। ਇਹ ਬਹੁਤ ਚਿੰਤਾਜਨਕ ਹੈ ਅਤੇ ਇਸ ਦਫਤਰ ਦੇ ਵਿੱਚ ਉਪਭੋਗਤਾਵਾਂ ਨੂੰ ਵੀ ਜਾਣਾ ਬੜਾ ਮੁਸ਼ਕਿਲ ਹੈ ਅਤੇ ਦਫਤਰ ਦੇ ਸਾਰੇ ਕਮਰਿਆਂ ’ਚ ਪਾਣੀ ਦੋ ਤੋਂ ਤਿੰਨ ਫੁੱਟ ਤੱਕ ਭਰਿਆ ਹੋਇਆ ਜਿੱਥੇ ਕਰਮਚਾਰੀਆਂ ਨੂੰ ਕੰਮ ਕਰਨਾ ਔਖਾ ਹੋਵੇਗਾ। ਇੱਕ ਰੂਮ ’ਚ ਐਨਾਂ ਪਾਣੀ ਜਮਾ ਹੋਇਆ ਸੀ ਉਸ ਦੇ ਵਿੱਚ ਇੱਕ ਕਰਮਚਾਰੀ ਵੀ ਖੜਾ ਹੋ ਕੇ ਕੰਮ ਕਰਦਾ ਵੇਖਿਆ ਗਿਆ ਜਿਸ ਦੇ ਵਿੱਚ ਦੋ ਤੋਂ ਤਿੰਨ ਫੁੱਟ ਪਾਣੀ ਭਰਿਆ ਹੋਇਆ ਹੈ।