ਐੱਮ ਐਲ ਪੁਰੀ ਸੀਨੀਅਰ ਸੈਕੰਡਰੀ ਸਕੂਲ ਦੇ 24 ਸਾਲ ਹੋਣ ਤੇ ਪੁਰੀ ਪਰਿਵਾਰ ਨੇ ਵਿਦੇਸ਼ ਤੋਂ ਆਕੇ ਕੀਤਾ ਵਿਸ਼ੇਸ ਦੌਰਾ

ਨਿਊ ਚੰਡੀਗੜ੍ਹ, 22 ਜੁਲਾਈ (ਬਜੀਦਪੁਰ) -ਮੁੱਲਾਂਪੁਰ ਗਰੀਬਦਾਸ ਸਥਿਤ  ਐਮ ਐਲ ਪੁਰੀ ਸੀਨੀਅਰ ਸੈਕੰਡਰੀ ਸਕੂਲ ਦੇ 24 ਸਾਲ ਪੂਰੇ ਹੋਣ ‘ਤੇ ਸਕੂਲ ਦੇ ਬਾਨੀ ਪੁਰੀ ਪਰਿਵਾਰ ਵੱਲੋਂ ਵਿਸ਼ੇਸ ਤੌਰ ਤੇ ਸਕੂਲ ਦਾ ਦੌਰਾ ਕੀਤਾ ਗਿਆ। ਇੰਗਲੈਂਡ ਤੋਂ ਵਿਸ਼ੇਸ਼ ਤੌਰ ‘ਤੇ ਪਹੁੰਚੀ ਮੈਰੀ ਮੈਕਮਿਨ ਪੁਰੀ ਨੇ ਆਪਣੇ ਪੁੱਤਰ ਸੰਜੇ ਪੁਰੀ ਅਤੇ ਅਲੀਸ਼ਾ ਸਮੇਤ ਸਕੂਲ ਦਾ ਨਿਰੀਖਣ ਕੀਤਾ। ਇਸ ਮੌਕੇ ਨਥੂਰਾਮ ਪੁਰੀ ਦੇ ਭਰਾ ਕਾਲੀ ਚਰਨ ਦੇ ਬੇਟੇ ਅਰਵਿੰਦ ਪੂਰੀ ਦੀ ਯਾਦ ਵਿੱਚ ਨੀਹ ਪੱਥਰ ਦਾ ਉਦਘਾਟਨ ਕੀਤਾ। ਇਸ ਮੌਕੇ ਟਰੱਸਟ ਦੇ ਚੇਅਰਮੈਨ ਅਰਵਿੰਦ ਪੁਰੀ ਨੇ ਇੰਗਲੈਂਡ ਤੋਂ ਆਏ ਮਹਿਮਾਨਾਂ ਨੂੰ ਸਕੂਲ ਦੇ ਵਿਕਾਸ ਕਾਰਜਾਂ ਬਾਰੇ ਜਾਣਕਾਰੀ ਦਿੱਤੀ। ਉਨ੍ਹਾਂ ਦੱਸਿਆ ਕਿ ਸਾਲ 2002 ‘ਚ ਉਸ ਸਮੇਂ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਅਗਵਾਈ ਵਾਲੀ  ਸਰਕਾਰ ਵੇਲੇ ਨੱਥੂ ਰਾਮ ਪੁਰੀ ਨੇ ਆਪਣੇ ਪਿਤਾ ਮੁੰਨਾ ਲਾਲ ਪੁਰੀ ਦੀ ਯਾਦ ‘ਚ ਇਸ ਸਕੂਲ ਦਾ ਉਦਘਾਟਨ ਕਰਵਾਇਆ ਸੀ। ਸਕੂਲ ਦੀ ਪ੍ਰਿੰਸੀਪਲ ਜੋਤੀ ਸੋਨੀ ਨੇ ਦੱਸਿਆ ਕਿ ਪਿਛਲੇ 24 ਸਾਲਾਂ ‘ਚ ਸਕੂਲ ‘ਚੋਂ ਹਜ਼ਾਰਾਂ ਵਿਦਿਆਰਥੀ ਪੜ੍ਹ ਕੇ ਨਿਕਲੇ ਹਨ। ਜਿਨ੍ਹਾਂ ‘ਚੋਂ ਕਈ ਆਈ.ਏ.ਐਸ ਅਤੇ ਆਈ ਪੀ ਐਸ ਅਫ਼ਸਰ ਬਣਕੇ ਦੇਸ਼ ਦੀ ਸੇਵਾ ਕਰ ਰਹੇ ਹਨ। ਇੰਗਲੈਂਡ ਤੋਂ ਆਈ ਮੈਰੀ ਮੈਕਮਿਨ ਪੁਰੀ ਨੇ ਸਕੂਲ ਦੀ ਤਰੱਕੀ ਦੇਖਕੇ ਖੁਸ਼ੀ ਜ਼ਾਹਰ ਕੀਤੀ। ਉਨ੍ਹਾਂ ਕਿਹਾ ਕਿ 24 ਸਾਲ ਪਹਿਲਾਂ ਹੋਏ ਉਦਘਾਟਨ ਨੂੰ ਯਾਦ ਕਰਕੇ ਉਨ੍ਹਾਂ ਨੂੰ ਬਹੁਤ ਮਾਣ ਮਹਿਸੂਸ ਹੋ ਰਿਹਾ ਹੈ। ਟਰੱਸਟ ਦੇ ਉਪ ਚੇਅਰਮੈਨ ਹਿਮਾਸ਼ੂਪੁਰੀ ਵੱਲੋਂ ਆਏ ਹੋਏ ਮਹਿਮਾਨਾਂ ਦਾ ਧੰਨਵਾਦ ਕੀਤਾ ਗਿਆ। ਇਸ ਮੌਕੇ ਪਿੰਡ ਦੇ ਸਰਪੰਚ ਜਤਿੰਦਰ ਸਿੰਘ ਸਮੇਤ ਪੰਚਾਇਤ ਮੈਂਬਰ ਲਾਲ ਸਿੰਘ, ਗੋਰਵ ਸ਼ਰਮਾ, ਜਗਤਾਰ ਸਿੰਘ,  ਰਿਸ਼ੀ ਕੁਮਾਰ ਗੁਪਤਾ, ਬੰਟੀ ਸੋਨੂੰ ਅਤੇ ਸਕੂਲ ਸਟਾਫ ਨੇ ਯਾਦਗਾਰੀ ਪੱਥਰ ‘ਤੇ ਫੁੱਲ ਭੇਟ ਕਰਕੇ ਮੁੰਨਾ ਲਾਲ ਪੁਰੀ ਅਤੇ ਅਰਵਿੰਦ ਪੁਰੀ ਨੂੰ ਸ਼ਰਧਾਂਜਲੀ ਦਿੱਤੀ। ਇਸ ਮੌਕੇ ਪੁਰੀ ਪਰਿਵਾਰ ਦੇ ਵੱਲੋਂ ਯਾਦ ਨੂੰ ਤਾਜ਼ਾ ਕਰਦੇ ਹੋਏ ਸਕੂਲ ਵਿੱਚ ਪੌਦੇ ਵੀ ਲਗਾਏ ਗਏ।