ਪਵਿੱਤਰ ਸਾਉਣ ਮਹੀਨੇ ਦੇ ਸੋਮਵਾਰ ਮੌਕੇ ਕਾਠਗੜ੍ਹ ਦੇ ਸ਼ਿਵ ਮੰਦਿਰਾਂ ‘ਚ ਉਮੜਿਆ ਸ਼ਰਧਾ ਦਾ ਅਥਾਹ ਸਮੁੰਦਰ: ਸਵੇਰ ਤੋਂ ਹੀ ਗੂੰਜੇ ‘ਹਰ-ਹਰ ਮਹਾਦੇਵ’ ਦੇ ਜੈਕਾਰੇ

ਕਾਠਗੜ੍ਹ, 10 ਅਗਸਤ (ਜਤਿੰਦਰ ਪਾਲ ਸਿੰਘ ਕਲੇਰ) : ਸਾਉਣ ਦਾ ਮਹੀਨਾ ਭਗਵਾਨ ਭੋਲੇਨਾਥ ਦਾ ਸਭ ਤੋਂ ਪ੍ਰਿਯ ਅਤੇ ਪਵਿੱਤਰ ਮਹੀਨਾ ਮੰਨਿਆ ਜਾਂਦਾ ਹੈ, ਜਿਸ ਦੌਰਾਨ ਪੈਂਦੇ ਸੋਮਵਾਰਾਂ ਦੀ ਧਾਰਮਿਕ ਮਹੱਤਤਾ ਬਹੁਤ ਜ਼ਿਆਦਾ ਵਧ ਜਾਂਦੀ ਹੈ। ਇਸੇ ਲੜੀ ਤਹਿਤ ਅੱਜ ਸੋਮਵਾਰ ਦੇ ਪਵਿੱਤਰ ਦਿਹਾੜੇ ‘ਤੇ ਇਲਾਕਾ ਕਾਠਗੜ੍ਹ ਦੇ ਵੱਖ-ਵੱਖ ਸ਼ਿਵ ਮੰਦਿਰਾਂ ਵਿੱਚ ਤੜਕੇ ਤੋਂ ਹੀ ਸ਼ਰਧਾਲੂਆਂ ਦੀ ਭਾਰੀ ਚਹਿਲ-ਪਹਿਲ ਦੇਖਣ ਨੂੰ ਮਿਲੀ। ਭਗਵਾਨ ਸ਼ਿਵ ਜੀ ਦੀ ਅਰਾਧਨਾ ਕਰਨ ਲਈ ਪਹੁੰਚੇ ਸ਼ਰਧਾਲੂਆਂ ਦੇ ‘ਹਰ-ਹਰ ਮਹਾਦੇਵ’ ਅਤੇ ‘ਬਮ-ਬਮ ਭੋਲੇ’ ਦੇ ਜੈਕਾਰਿਆਂ ਨਾਲ ਪੂਰਾ ਇਲਾਕਾ ਭਕਤੀਮਈ ਰੰਗ ਵਿੱਚ ਰੰਗਿਆ ਗਿਆ।ਇਲਾਕੇ ਦੇ ਮੁੱਖ ਮੰਦਿਰਾਂ ਵਿਖੇ ਸਵੇਰ ਤੋਂ ਹੀ ਭਗਵਾਨ ਸ਼ਿਵ ਜੀ ਦਾ ਜਲ ਅਭਿਸ਼ੇਕ ਕਰਨ ਵਾਲੀ ਸੰਗਤ ਦਾ ਭਾਰੀ ਇਕੱਠ ਦੇਖਿਆ ਗਿਆ। ਕਾਠਗੜ੍ਹ ਸਥਿਤ ਸ਼ੀਤਲਾ ਮੰਦਰ ਅੰਦਰ ਸਥਾਪਿਤ ਸ਼ਿਵਲਿੰਗ, ਸ਼੍ਰੀ ਰਾਧਾ ਕ੍ਰਿਸ਼ਨ ਮੰਦਿਰ ਦੇ ਪਵਿੱਤਰ ਸ਼ਿਵਲਿੰਗ, ਨੈਣਾ ਦੇਵੀ ਮਾਤਾ ਮੰਦਿਰ ਵਿਖੇ ਸਥਿਤ ਸ਼ਿਵ ਪਰਿਵਾਰ ਅਸਥਾਨ, ਵੈਸ਼ਨੋ ਦੇਵੀ ਮਾਤਾ ਮੰਦਿਰ ਪਰਿਸਰ ਅੰਦਰ ਵਿਰਾਜਮਾਨ ਸ਼ਿਵਲਿੰਗ ਅਤੇ ਡੇਰਾ ਕੁੱਲਾਂ ਵਾਲੇ ਪੀਰ ਅਸਥਾਨ ਵਿਖੇ ਬਣੇ ਸ਼੍ਰੀ ਸ਼ਿਵ ਮੰਦਿਰ ਵਿਖੇ ਭਗਤਾਂ ਦਾ ਆਉਣਾ-ਜਾਣਾ ਦੇਰ ਦੁਪਹਿਰ ਤੱਕ ਨਿਰੰਤਰ ਬਣਿਆ ਰਿਹਾ।ਸੋਮਵਾਰ ਦੇ ਦਿਨ ਭਗਵਾਨ ਭੋਲੇਨਾਥ ਦਾ ਆਸ਼ੀਰਵਾਦ ਪ੍ਰਾਪਤ ਕਰਨ ਲਈ ਵਰਤ ਰੱਖਣ ਵਾਲੀਆਂ ਔਰਤਾਂ, ਸਥਾਨਕ ਦੁਕਾਨਦਾਰ ਅਤੇ ਸਕੂਲੀ ਬੱਚੇ ਆਪਣੇ ਦਿਨ ਦੀ ਸ਼ੁਰੂਆਤ ਭਗਵਾਨ ਸ਼ਿਵ ਜੀ ਦੇ ਚਰਨਾਂ ਵਿੱਚ ਸ਼ੀਸ਼ ਨਿਵਾ ਕੇ ਕਰਦੇ ਨਜ਼ਰ ਆਏ। ਆਪਣੇ-ਆਪਣੇ ਕੰਮਾਂ-ਕਾਰਾਂ, ਦੁਕਾਨਾਂ ਅਤੇ ਸਕੂਲਾਂ ਵੱਲ ਵਧਣ ਤੋਂ ਪਹਿਲਾਂ ਇਨ੍ਹਾਂ ਸ਼ਰਧਾਲੂਆਂ ਨੇ ਮੰਦਰਾਂ ਵਿੱਚ ਪਹੁੰਚ ਕੇ ਭਗਵਾਨ ਭੋਲੇਨਾਥ ਨੂੰ ਸੱਜਦਾ ਕੀਤਾ, ਦੁੱਧ ਅਤੇ ਜਲ ਨਾਲ ਸ਼ਿਵਲਿੰਗ ਦਾ ਅਭਿਸ਼ੇਕ ਕੀਤਾ ਅਤੇ ਆਪਣੀਆਂ ਸੁਖ-ਸਾਂਦ ਦੀਆਂ ਮਨੋਕਾਮਨਾਵਾਂ ਮੰਗੀਆਂ। ਇਸ ਤੋਂ ਬਾਅਦ ਹੀ ਸਾਰੇ ਸ਼ਰਧਾਲੂ ਆਪਣੇ ਦਿਨ ਭਰ ਦੇ ਨਿੱਤ ਦੇ ਕੰਮਾਂ ਵੱਲ ਰਵਾਨਾ ਹੋਏ। ਮੰਦਿਰ ਕਮੇਟੀਆਂ ਵੱਲੋਂ ਵੀ ਆਉਣ ਵਾਲੀਆਂ ਸੰਗਤਾਂ ਦੀ ਸੁਵਿਧਾ ਲਈ ਵਿਸ਼ੇਸ਼ ਪ੍ਰਬੰਧ ਕੀਤੇ ਗਏ ਸਨ।