ਦਿਹਾਤੀ ਮਜ਼ਦੂਰ ਸਭਾ ਦਾ 7ਵਾਂ ਸੂਬਾਈ ਡੈਲੀ ਗੇਟ ਅਜਲਾਸ 5-6ਅਪ੍ਰੈਲ ਨੂੰ ਬਾਬਾ ਬਕਾਲਾ ਸਾਹਿਬ ਵਿਖੇ

ਫ਼ਗਵਾੜਾ-ਜਲੰਧਰ 31 ਮਾਰਚ (ਪ੍ਰੀਤ ਕੌਰ ਪ੍ਰੀਤੀ) ਦਿਹਾਤੀ ਮਜ਼ਦੂਰ ਸਭਾ ਦੇ, 5-6 ਅਪ੍ਰੈਲ 2025 ਨੂੰ, ਸ਼੍ਰੀ ਗੁਰੂ ਤੇਗ ਬਹਾਦਰ ਜੀ ਦੀ ਪਵਿੱਤਰ ਨਗਰੀ ਬਾਬਾ ਬਕਾਲਾ ਸਾਹਿਬ,ਜ਼ਿਲ੍ਹਾ ਸ਼੍ਰੀ ਅੰਮ੍ਰਿਤਸਰ ਸਾਹਿਬ ਵਿਖੇ, ਉਚੇਚੇ ਸਜਾਏ ਗਏ ਸ਼ਹੀਦ ਸਾਥੀ ਦੀਪਕ ਧਵਨ ਨਗਰ,ਸਾਥੀ ਸ਼ਿੰਗਾਰਾ ਸਿੰਘ ਨੇ ਧਿਆਨਪੁਰ ਹਾਲ ਵਿਖੇ ਹੋਣ ਜਾ ਰਹੇ 7ਵੇਂ  ਸੂਬਾਈ ਡੈਲੀਗੇਟ ਅਜਲਾਸ ਦੀਆਂ ਤਿਆਰੀਆਂ ਮੁਕੰਮਲ ਹੋ ਗਈਆਂ ਹਨ। ਲੰਗਰ ਹਾਲ ਵਿਛੜੇ ਸਾਥੀ ਨਰਿੰਦਰ ਸਿੰਘ ਨੂੰ ਸਮਰਪਿਤ ਕੀਤਾ ਜਾਵੇਗਾ। ਤਹਿਸੀਲ ਨਾਲ ਸਬੰਧਤ ਉੱਘੇ ਆਗੂਆਂ ਸ਼ਹੀਦ ਸਾਥੀ ਗੁਰਨਾਮ ਸਿੰਘ ਉੱਪਲ ਅਤੇ ਨਾਜਰ ਸਿੰਘ ਸੈਦਪੁਰ ਦੀ ਯਾਦ ਵਿੱਚ ਗੇਟ ਉਸਾਰੇ ਜਾਣਗੇ। ਮੈਂਬਰਸ਼ਿਪ ਦੇ ਅਧਾਰ ‘ਤੇ ਚੁਣੇ ਹੋਏ ਦੋ ਸੌ ਪੱਚੀ ਡੈਲੀਗੇਟ ਅਤੇ ਦਰਸ਼ਕ ਅਜਲਾਸ ਵਿਚ ਹਿੱਸਾ ਲੈਣਗੇ। ਛੇਵੇਂ ਅਜਲਾਸ ਵਲੋਂ ਮਿਥੇ ਕੰਮਾਂ ਦਾ ਲੇਖਾ ਜੋਖਾ ਅਤੇ ਮੌਜੂਦਾ ਗੰਭੀਰ ਰਾਜਨੀਤਕ ਅਵਸਥਾ ਵਿੱਚ ਮਜ਼ਦੂਰ ਲਹਿਰ ਸਨਮੁੱਖ ਚੁਣੌਤੀਆਂ ਬਾਰੇ ਸੰਜੀਦਾ ਵਿਚਾਰਾਂ ਕੀਤੀਆਂ ਜਾਣਗੀਆਂ। ਨਾਲ ਹੀ ਮਜ਼ਦੂਰਾਂ ਦੇ ਭਖਦਿਆਂ ਮਸਲਿਆਂ ਦੇ ਹੱਲ ਲਈ ਭਵਿੱਖੀ ਸੰਘਰਸ਼ਾਂ  ਦੀ ਰੂਪਰੇਖਾ ਉਲੀਕੀ ਜਾਵੇਗੀ ਅਤੇ ਆਉਣ ਵਾਲੇ ਸਮੇਂ ਲਈ ਨਵੀਂ ਕਮੇਟੀ ਦੀ ਚੋਣ ਕੀਤੀ ਜਾਵੇਗੀ।  ਇਹ ਜਾਣਕਾਰੀ ਅੱਜ ਇੱਥੋਂ ਜਾਰੀ ਇਕ ਸਾਂਝੇ ਪ੍ਰੈੱਸ ਬਿਆਨ ਰਾਹੀਂ  ਜਥੇਬੰਦੀ ਦੇ  ਸੂਬਾ ਪ੍ਰਧਾਨ ਦਰਸ਼ਨ ਨਾਹਰ,ਜਨਰਲ ਸਕੱਤਰ ਗੁਰਨਾਮ ਸਿੰਘ ਦਾਊਦ ਅਤੇ ਪ੍ਰੈੱਸ ਸਕੱਤਰ ਬਲਦੇਵ ਸਿੰਘ ਨੂਰਪੁਰੀ ਨੇ ਦਿੱਤੀ ਹੈ। ਉਨ੍ਹਾਂ ਦੱਸਿਆ ਹੈ ਕਿ ਅਜਲਾਸ ਨੂੰ ਸੁਚਾਰੂ ਵਿਧੀ ਨਾਲ ਕਾਮਯਾਬ ਕਰਨ ਲਈ ਸਭਾ ਦੀ ਬਾਬਾ ਬਕਾਲਾ ਸਾਹਿਬ ਤਹਿਸੀਲ ਦੇ ਆਗੂ ਤੇ ਵਰਕਰ ਉਤਸ਼ਾਹ ਨਾਲ ਜੁਟੇ ਹੋਏ ਹਨ। ਦੱਸਣ ਯੋਗ ਹੈ ਕਿ ਅਜਲਾਸ ਦੇ ਸਮੁੱਚੇ ਪ੍ਰਬੰਧਾਂ ਲਈ ਲੋਕਾਂ ਤੋਂ ਜਨਤਕ ਉਗਰਾਹੀ ਕੀਤੀ ਗਈ ਹੈ। ਜਮਹੂਰੀ ਲਹਿਰ ਦੇ ਨਾਮਵਰ ਆਗੂ ਸਾਥੀ ਮੰਗਤ ਰਾਮ ਪਾਸਲਾ ਉਦਘਾਟਨੀ ਸ਼ੈਸ਼ਨ ਨੂੰ ਸੰਬੋਧਨ ਕਰਨਗੇ। ਇਸ ਮੌਕੇ ਇਕ ਆਕਰਸ਼ਕ ਸੋਵੀਨਰ ਵੀ ਰਿਲੀਜ ਕੀਤਾ ਜਾਵੇਗਾ।