Manpreet Singh
ਸ਼੍ਰੀ ਮੁਕਤਸਰ ਸਾਹਿਬ, 29 ਅਗਸਤ ()- ਬੀਤੇਂ ਦਿਨੀਂ ਬਾਅਦ ਦੁਪਹਿਰ ਆਈ ਬਾਰਿਸ਼ ਕਾਰਨ ਜਿਥੇ ਸ਼ਹਿਰ ਸ਼੍ਰੀ ਮੁਕਤਸਰ ਸਾਹਿਬ ਦੀਆਂ ਗਲੀਆਂ ਇਕ ਵਾਰ ਫਿਰ ਤੋਂ ਜਲ ਥਲ ਹੋਈਆਂ ਨਜ਼ਰ ਆਈਆਂ, ਉਥੇ ਹੀ ਇਹ ਬਾਰਿਸ਼ ਸ਼੍ਰੀ ਮੁਕਤਸਰ ਸਾਹਿਬ ਦੇ ਇੱਕ ਗਰੀਬ ਪਰਿਵਾਰ ਲਈ ਆਫਤ ਬਣਕੇ ਬਰਸੀ ਹੈ। ਜਾਣਕਾਰੀ ਮੁਤਾਬਿਕ ਸ਼ਹਿਰ ਦੇ ਕੋਟਲੀ ਰੋਡ ਸਥਿਤ ਬਾਦਲ ਕਲੌਨੀ ਦੇ ਵਾਸੀ ਮਦਨ ਲਾਲ ਪੁੱਤਰ ਦਸਾਂਦੀ ਰਾਮ ਨੇ ਦੱਸਿਆ ਕਿ ਉਨ੍ਹਾਂ ਦੇ ਮਕਾਨ ਦੀ ਛੱਤ ਟਾਇਲ ਬੱਤਿਆਂ ਵਾਲੀ ਸੀ, ਤੇ ਬੀਤੇਂ ਦਿਨੀਂ ਆਈ ਬਾਰਿਸ਼ ਤੋਂ ਬਾਅਦ ਉਨ੍ਹਾਂ ਦੇ ਘਰ ਦੀ ਛੱਤ ਅਚਾਨਕ ਡਿੱਗ ਗਈ। ਜਿਸ ਕਾਰਨ ਉਨ੍ਹਾਂ ਦੇ ਘਰ ’ਚ ਪਿਆ ਘਰੇਲੂ ਵਰਤੋਂ ਵਾਲਾ ਸਮਾਨ ਨੁਕਸਾਨਿਆ ਗਿਆ, ਪਰ ਜਾਨੀ ਨੁਕਸਾਨ ਤੋਂ ਬਚਾਅ ਹੋ ਗਿਆ। ਇਸ ਮੌਕੇ ਮਦਨ ਲਾਲ ਨੇ ਕਿਹਾ ਕਿ ਉਹ ਦਿਹਾੜੀ ਮਜ਼ਦੂਰੀ ਕਰਦਾ ਤੇ ਐਨਾ ਸਮਰੱਥ ਨਹੀਂ ਹੈ ਕਿ ਆਪਣੇ ਪੱਧਰ ’ਤੇ ਮਕਾਨ ਦੀ ਉਸਾਰੀ ਕਰ ਸਕੇ, ਇਸ ਲਈ ਉਸ ਨੇ ਪ੍ਰਸਾਸ਼ਨ ਤੋਂ ਮੰਗ ਕੀਤੀ ਹੈ ਕਿ ਉਨ੍ਹਾਂ ਦੇ ਮਕਾਨ ਸਬੰਧੀ ਬਣਦਾ ਮੁਆਵਜ਼ਾ ਦਿੱਤਾ ਜਾਵੇ ਤਾਂ ਜੋ ਉਹ ਮੁੜ ਤੋਂ ਆਪਣੇ ਮਕਾਨ ਦੀ ਉਸਾਰੀ ਕਰ ਸਕੇ।
