ਇੰਦਰਾ ਕਲੋਨੀ ‘ਚ ਗਰਮੀ ਤੋਂ ਪਰੇਸ਼ਾਨ ਬੀਬੀਆਂ ਨੇ ਮੀਂਹ ਪਵਾਉਣ ਲਈ ਫੂਕੀ ਗੁੱਡੀ   ਸਾਵਣ ਲੱਗਣ ਦੇ ਬਾਵਜੂਦ ਨਹੀਂ ਵਰ੍ਹਿਆ ਮੀਂਹ, ਬੀਬੀਆਂ ਨੇ ਕੀਤੀ ਇੰਦਰ ਦੇਵਤਾ ਅੱਗੇ ਅਰਦਾਸ  

ਮਾਛੀਵਾੜਾ ਸਾਹਿਬ, 19 ਜੁਲਾਈ (ਸੁੱਚਾ ਬੰਗੜ)ਪੰਜਾਬ ‘ਚ ਪੈ ਰਹੀ ਭਿਆਨਕ ਗਰਮੀ ਅਤੇ ਲਗਾਤਾਰ ਲੱਗ ਰਹੇ ਬਿਜਲੀ ਦੇ ਕੱਟਾਂ ਕਾਰਨ ਆਮ ਲੋਕਾਂ ਦਾ ਜੀਵਨ ਦੁੱਭਰ ਹੋ ਗਿਆ ਹੈ। ਸਾਵਣ ਦਾ ਮਹੀਨਾ ਸ਼ੁਰੂ ਹੋਣ ਦੇ ਬਾਵਜੂਦ ਸੂਬੇ ‘ਚ ਅਜੇ ਤੱਕ ਮੀਂਹ ਨਾ ਪੈਣ ਕਾਰਨ ਲੋਕਾਂ ਦੇ ਨਾਲ-ਨਾਲ ਕਿਸਾਨ ਵੀ ਚਿੰਤਤ ਹਨ। ਗਰਮੀ ਦੇ ਪ੍ਰਕੋਪ ਤੋਂ ਛੁਟਕਾਰਾ ਪਾਉਣ ਲਈ ਲੋਕ ਹੁਣ ਰਵਾਇਤੀ ਤਰੀਕੇ ਅਪਣਾਉਣ ਲੱਗ ਪਏ ਹਨ।  ਅੱਜ ਇੰਦਰਾ ਕਲੋਨੀ ‘ਚ ਵੀ ਅਜਿਹਾ ਹੀ ਦ੍ਰਿਸ਼ ਦੇਖਣ ਨੂੰ ਮਿਲਿਆ ਜਦੋਂ ਵੱਡੀ ਗਿਣਤੀ ‘ਚ ਔਰਤਾਂ ਅਤੇ ਬੱਚਿਆਂ ਨੇ ਇਕੱਠੇ ਹੋ ਕੇ “ਗੁੱਡੀ ਫੂਕਣ” ਦੀ ਰਸਮ ਅਦਾ ਕੀਤੀ। ਪੁਰਾਣੇ ਸਮਿਆਂ ‘ਚ ਮੀਂਹ ਨਾ ਪੈਣ ‘ਤੇ ਪਿੰਡਾਂ ਦੀਆਂ ਔਰਤਾਂ ਗੁੱਡੀਆਂ ਫੂਕ ਕੇ ਇੰਦਰ ਦੇਵਤਾ ਨੂੰ ਖੁਸ਼ ਕਰਨ ਲਈ ਅਰਦਾਸ ਕਰਦੀਆਂ ਸਨ। ਇਸੇ ਪਰੰਪਰਾ ਨੂੰ ਜਿਉਂਦਾ ਰੱਖਦੇ ਹੋਏ ਇੰਦਰਾ ਕਲੋਨੀ ਦੀਆਂ ਬੀਬੀਆਂ ਨੇ ਗੁੱਡੀ ਫੂਕ ਕੇ ਭਗਵਾਨ ਅੱਗੇ ਮੀਂਹ ਪਾਉਣ ਦੀ ਅਰਦਾਸ ਕੀਤੀ।  ਬੀਬੀਆਂ ਦਾ ਕਹਿਣਾ ਸੀ ਕਿ “ਗਰਮੀ ਬਹੁਤ ਜ਼ਿਆਦਾ ਪੈ ਰਹੀ ਹੈ। ਬਿਜਲੀ ਵੀ ਠੀਕ ਨਹੀਂ ਆ ਰਹੀ। ਖੇਤਾਂ ਨੂੰ ਪਾਣੀ ਦੀ ਲੋੜ ਹੈ। ਇਸ ਲਈ ਅਸੀਂ ਰੱਬ ਅੱਗੇ ਅਰਦਾਸ ਕੀਤੀ ਹੈ ਕਿ ਉਹ ਮੀਂਹ ਵਰਸਾ ਕੇ ਸਾਨੂੰ ਇਸ ਗਰਮੀ ਤੋਂ ਰਾਹਤ ਦਵੇ।”  ਇਸ ਮੌਕੇ ਜਸਪ੍ਰੀਤ ਕੌਰ, ਜਸਵਿੰਦਰ ਕੌਰ, ਸੀਤਾ, ਬਾਬੂ, ਕੁਲਦੀਪ ਕੌਰ, ਲੱਕੀ, ਜਸਵੀਰ ਕੌਰ, ਰਾਜ ਕੌਰ, ਪਰਮਜੀਤ ਕੌਰ, ਸੁਰਿੰਦਰ ਕੌਰ, ਪ੍ਰੀਤਮ ਕੌਰ, ਕਮਲਜੀਤ ਕੌਰ, ਅਮਰਜੀਤ ਕੌਰ ਸਮੇਤ ਕਈ ਬੀਬੀਆਂ ਸ਼ਾਮਲ ਹੋਈਆਂ।  ਇਸ ਦੇ ਨਾਲ ਹੀ ਜਗਦੀਪ ਸਿੰਘ, ਸੰਦੀਪ ਸਿੰਘ ਸੀਪਾ, ਮਿੰਟੂ, ਕਰਨੈਲ ਸਿੰਘ ਅਤੇ ਰਾਮਦਾਸ ਆਦਿ ਨੇ ਵੀ ਇਸ ਰਸਮ ‘ਚ ਹਿੱਸਾ ਲਿਆ।  ਲੋਕਾਂ ਨੇ ਸਰਕਾਰ ਤੋਂ ਵੀ ਮੰਗ ਕੀਤੀ ਕਿ ਗਰਮੀ ਦੇ ਮੱਦੇਨਜ਼ਰ ਬਿਜਲੀ ਦੀ ਸਪਲਾਈ ਠੀਕ ਕੀਤੀ ਜਾਵੇ ਤਾਂ ਜੋ ਲੋਕਾਂ ਨੂੰ ਕੁਝ ਰਾਹਤ ਮਿਲ ਸਕੇ।