ਠੇਕੇਦਾਰ ਦੇ ਬੰਦਿਆਂ ਵੀ ਗਲਤੀ ਕਰਕੇ ਬੁਰੀ ਤਰਾਂ ਝੁਲਸਿਆ ਲਾਈਨਮੈਨ 

ਬਠਿੰਡਾ 20 ਜੁਲਾਈ ( ਸੁਰਿੰਦਰ ਪਾਲ ਸਿੰਘ):ਨਿੱਜੀ ਠੇਕੇਦਾਰ ਦੇ ਬੰਦਿਆਂ ਦੀ ਗਲਤੀ ਕਾਰਨ ਲਾਈਨਮੈਨ ਰਾਮ ਕ੍ਰਿਸ਼ਨ ਸਿੰਘ ਗਹਿਰੀ ਬੁੱਟਰ ਬੁਰੀ ਤਰ੍ਹਾਂ ਝੁਲਸਿਆ ਗਿਆ। ਟੈਕਟੀਕਲ ਸਰਵਿਸ ਯੂਨੀਅਨ ਦੇ ਜੋਨ ਸੈਕਟਰੀ ਮਨੋਜ ਕੁਮਾਰ ਨੇ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਲਾਈਨਮੈਨ ਰਾਮ ਕ੍ਰਿਸ਼ਨ ਸਿੰਘ ਪਿੰਡ ਸੈਣੇਵਾਲਾ ਵਿਖੇ ਏਪੀ ਫੀਡਰ ਦਾ ਜੈਂਪਰ ਬਦਲ ਰਿਹਾ ਸੀ ਤਾਂ ਨਰੂਆਣਾ ਕੋਲ ਰੇਲਵੇ ਪੁਲ ਬਣਾ ਰਹੇ ਨਿੱਜੀ ਠੇਕੇਦਾਰ ਦੇ ਬੰਦਿਆਂ ਵੱਲੋਂ ਸਪਲਾਈ ਕੱਟੇ ਬਿਨਾਂ ਜਨਰੇਟਰ ਛੱਡ ਦਿੱਤਾ, ਜਿਸ ਕਰਕੇ ਕਰੰਟ ਆਉਣ ਕਰਕੇ ਰਾਮ ਕ੍ਰਿਸ਼ਨ ਸਿੰਘ ਦਾ ਹੱਥ, ਮੋਢਾ, ਲੱਕ ਤੇ ਰੀੜ ਦੀ ਹੱਡੀ ਬੁਰੀ ਤਰ੍ਹਾਂ ਮੱਚ ਗਈ। ਉਸ ਨੂੰ ਤੁਰੰਤ ਏਮਜ਼ ਹਸਪਤਾਲ ਬਠਿੰਡਾ ਵਿਖੇ ਦਾਖਲ ਕਰਵਾਇਆ ਗਿਆ, ਜਿੱਥੇ ਉਹ ਜ਼ੇਰੇ ਇਲਾਜ ਹਨ। ਜਥੇਬੰਦੀ ਦੇ ਆਗੂ ਨੇ ਕਿਹਾ ਕਿ ਇਸ ਘਟਨਾ ਸੰਬੰਧੀ ਉਹਨਾਂ ਵੱਲੋਂ ਪੁਲਿਸ ਥਾਣਾ ਸੰਗਤ ਵਿੱਚ ਸ਼ਿਕਾਇਤ ਕੀਤੀ ਗਈ ਹੈ ਕਿ ਦੋਸ਼ੀ ਵਿਅਕਤੀਆਂ ਦੇ ਖਿਲਾਫ ਸਖਤ ਕਾਰਵਾਈ ਕੀਤੀ ਜਾਵੇ।ਉਹਨਾਂ ਦੱਸਿਆ ਕਿ ਉਹਨਾਂ ਦੀ ਜਥੇਬੰਦੀ,ਮਹਿਕਮੇ ਦੇ ਜੇਈ, ਐਸਡੀਓ ਤੇ ਐਕਸੀਅਨ ਇਨਸਾਫ ਦਵਾਉਣ ਦੇ ਲਈ ਹਰ ਤਰ੍ਹਾਂ ਦੀ ਜੱਦੋ ਜਹਿਦ ਕਰਨਗੇ। ਇਸ ਸਬੰਧ ਵਿੱਚ ਸਮਾਜਸੇਵੀ ਬਾਬਾ ਜਗਰੂਪ ਸਿੰਘ ਬੁਗਰਾਂ ਨੇ ਇਸ ਪੱਤਰਕਾਰ ਨਾਲ ਗੱਲਬਾਤ ਕਰਦੇ ਹੋਏ ਕਿਹਾ ਕਿ ਠੇਕੇਦਾਰਾਂ ਦੇ ਨਿਕੰਮੇ ਪ੍ਰਬੰਧਾਂ ਕਰਕੇ ਇੱਕ ਹੋਣਹਾਰ ਨੌਜਵਾਨ ਮੁਲਾਜ਼ਮ ਰਾਮ ਕ੍ਰਿਸ਼ਨ ਸਿੰਘ ਨੂੰ ਅਨੇਕਾਂ ਸਰੀਰਕ ਤਕਲੀਫਾਂ ਵਿੱਚੋਂ ਲੰਘਣਾ ਪੈ ਰਿਹਾ ਹੈ। ਉਹਨਾਂ ਕਿਹਾ ਕਿ ਜੇਕਰ ਪੁਲਿਸ ਨੇ ਇਸ ਸਬੰਧੀ ਕਾਰਵਾਈ ਅਮਲ ਵਿੱਚ ਨਾ ਲਿਆਂਦੀ ਤਾਂ ਸਖਤ ਐਕਸ਼ਨ ਲਿਆ ਜਾਵੇਗਾ। ਇਸ ਸਬੰਧੀ ਜਦੋਂ ਥਾਣਾ ਸੰਗਤ ਦੇ ਇੰਚਾਰਜ ਦੇ ਸਰਕਾਰੀ ਨੰਬਰ ‘ਤੇ ਸੰਪਰਕ ਕਰਨਾ ਚਾਹਿਆ ਤਾਂ ਉਹਨਾਂ ਨੇ ਫੋਨ ਨਹੀਂ ਚੁੱਕਿਆ।