ਸੋਨਾਲੀਕਾ ਨੇ 20 ਲੱਖ ਟਰੈਕਟਰ ਤਿਆਰ ਕਰਕੇ ਰਚਿਆ ਇਤਿਹਾਸ

ਅੰਮ੍ਰਿਤਸਰ, 11 ਜੁਲਾਈ (ਮਨਜੀਤ ਸਿੰਘ ਸ਼ੇਰਗਿੱਲ ) ਸੋਨਾਲੀਕਾ ਟਰੈਕਟਰਜ਼ ਨੇ ਹੁਸ਼ਿਆਰਪੁਰ ਵਿਖੇ ਸਥਿਤ ਦੁਨੀਆ ਦੇ ਸਭ ਤੋਂ ਵੱਡੇ ਇੰਟੀਗ੍ਰੇਟਿਡ ਟਰੈਕਟਰ ਮੈਨੂਫੈਕਚਰਿੰਗ ਪਲਾਂਟ ਤੋਂ ਆਪਣਾ 20 ਲੱਖਵਾਂ ਟਰੈਕਟਰ ਤਿਆਰ ਕਰਕੇ ਇੱਕ ਇਤਿਹਾਸਕ ਮੀਲ ਪੱਥਰ ਹਾਸਲ ਕੀਤਾ ਹੈ। ਇਹ ਉਪਲਬਧੀ ਕੰਪਨੀ ਦੇ 30 ਸਾਲਾਂ ਦੇ ਸ਼ਾਨਦਾਰ ਸਫ਼ਰ ਦਾ ਇੱਕ ਮਹੱਤਵਪੂਰਨ ਅਧਿਆਇ ਹੈ, ਜਿਸ ਦੌਰਾਨ ਉਸ ਨੇ ਕਿਸਾਨਾਂ ਦੀਆਂ ਲੋੜਾਂ ਨੂੰ ਧਿਆਨ ਵਿੱਚ ਰੱਖਦਿਆਂ ਵਿਸ਼ਵ ਪੱਧਰੀ ਗੁਣਵੱਤਾ ਵਾਲੇ ਟਰੈਕਟਰ ਵਿਕਸਿਤ ਕੀਤੇ ਹਨ। ਸਾਲ 1996 ਵਿੱਚ ਆਪਣਾ ਪਹਿਲਾ ਟਰੈਕਟਰ ਲਾਂਚ ਕਰਨ ਤੋਂ ਬਾਅਦ ਸੋਨਾਲੀਕਾ ਨੇ ਲਗਾਤਾਰ ਆਪਣੀ ਉਤਪਾਦਨ ਸਮਰੱਥਾ ਅਤੇ ਤਕਨੀਕੀ ਯੋਗਤਾ ਵਿੱਚ ਵਾਧਾ ਕੀਤਾ ਹੈ। ਕੰਪਨੀ ਨੇ ਉਦਯੋਗ ਦੇ ਰਵਾਇਤੀ ਮਾਪਦੰਡਾਂ ਨੂੰ ਚੁਣੌਤੀ ਦਿੰਦਿਆਂ ਪੰਜਾਬ ਦੇ ਹੁਸ਼ਿਆਰਪੁਰ ਵਰਗੇ ਗੈਰ-ਉਦਯੋਗਿਕ ਸ਼ਹਿਰ ਨੂੰ ਵਿਸ਼ਵ ਟਰੈਕਟਰ ਨਿਰਮਾਣ ਦੇ ਨਕਸ਼ੇ ‘ਤੇ ਵਿਸ਼ੇਸ਼ ਪਹਿਚਾਣ ਦਿਵਾਈ ਹੈ। ਜਿੱਥੇ ਸ਼ੁਰੂਆਤੀ ਦਿਨਾਂ ਵਿੱਚ ਕੰਪਨੀ ਹਰ ਰੋਜ਼ ਸਿਰਫ਼ ਦੋ ਟਰੈਕਟਰ ਤਿਆਰ ਕਰਦੀ ਸੀ, ਉੱਥੇ ਅੱਜ ਹਰ ਦੋ ਮਿੰਟ ਵਿੱਚ ਇੱਕ ਨਵਾਂ ਟਰੈਕਟਰ ਤਿਆਰ ਕੀਤਾ ਜਾ ਰਿਹਾ ਹੈ। ਇਹ ਟਰੈਕਟਰ ਨਾ ਸਿਰਫ਼ ਭਾਰਤ ਦੇ ਕਿਸਾਨਾਂ ਦੀਆਂ ਵਧਦੀਆਂ ਲੋੜਾਂ ਨੂੰ ਪੂਰਾ ਕਰ ਰਹੇ ਹਨ, ਸਗੋਂ 150 ਤੋਂ ਵੱਧ ਦੇਸ਼ਾਂ ਵਿੱਚ ਵੀ ਨਿਰਯਾਤ ਕੀਤੇ ਜਾ ਰਹੇ ਹਨ। ਇਸ ਮੌਕੇ ‘ਤੇ ਕੰਪਨੀ ਦੇ ਵਾਈਸ ਚੇਅਰਮੈਨ ਡਾ. ਅਮ੍ਰਿਤ ਸਾਗਰ ਮਿੱਤਲ ਨੇ ਕਿਹਾ ਕਿ ਇਹ ਉਪਲਬਧੀ ਉਨ੍ਹਾਂ ਲੱਖਾਂ ਕਿਸਾਨਾਂ ਨੂੰ ਸਮਰਪਿਤ ਹੈ ਜਿਨ੍ਹਾਂ ਨੇ ਸੋਨਾਲੀਕਾ ‘ਤੇ ਭਰੋਸਾ ਜਤਾਇਆ ਅਤੇ ਕੰਪਨੀ ਨੂੰ ਖੇਤੀਬਾੜੀ ਦੇ ਬਿਹਤਰ ਭਵਿੱਖ ਦੀ ਉਸਾਰੀ ਲਈ ਲਗਾਤਾਰ ਅੱਗੇ ਵਧਣ ਦੀ ਪ੍ਰੇਰਣਾ ਦਿੱਤੀ। ਕੰਪਨੀ ਦੇ ਮੈਨੇਜਿੰਗ ਡਾਇਰੈਕਟਰ ਡਾ. ਦੀਪਕ ਮਿੱਤਲ ਨੇ ਕਿਹਾ ਕਿ ਕੰਪਨੀ ਦਾ ਧਿਆਨ ਭਵਿੱਖ ਵਿੱਚ ਵੀ ਤੇਜ਼ ਵਿਕਾਸ, ਵਿਸ਼ਵ ਪੱਧਰ ‘ਤੇ ਆਪਣੀ ਮੌਜੂਦਗੀ ਨੂੰ ਹੋਰ ਮਜ਼ਬੂਤ ਕਰਨ ਅਤੇ ਨਵੀਨਤਾ ਦੇ ਆਧਾਰ ‘ਤੇ ਅਗਲੇ ਵਿਕਾਸ ਅਧਿਆਇ ਨੂੰ ਲਿਖਣ ‘ਤੇ ਕੇਂਦਰਿਤ ਰਹੇਗਾ। ਜੋਇੰਟ ਮੈਨੇਜਿੰਗ ਡਾਇਰੈਕਟਰ ਰਮਨ ਮਿੱਤਲ ਨੇ ਕਿਹਾ ਕਿ ਕੰਪਨੀ ਦੀ ਸਭ ਤੋਂ ਵੱਡੀ ਤਾਕਤ ਹਰ ਮਹੱਤਵਪੂਰਨ ਕੰਪੋਨੈਂਟ ਦਾ 100 ਫੀਸਦੀ ਇਨ-ਹਾਊਸ ਨਿਰਮਾਣ ਹੈ। ਇਸੇ ਕਰਕੇ ਹਰ ਟਰੈਕਟਰ ਵਿੱਚ ਵਿਸ਼ਵ ਪੱਧਰੀ ਤਕਨੀਕ, ਉੱਚ ਗੁਣਵੱਤਾ ਅਤੇ ਭਰੋਸੇਯੋਗਤਾ ਦਾ ਸ਼ਾਨਦਾਰ ਮੇਲ ਮਿਲਦਾ ਹੈ, ਜੋ ਕਿਸਾਨਾਂ ਨੂੰ ‘ਜਿੱਤਣ ਦਾ ਦਮ’ ਪ੍ਰਦਾਨ ਕਰਦਾ ਹੈ।