ਆਪ ਪਾਰਟੀ ਤੋ ਵਿਧਾਇਕੀ ਦੇ ਝੂਠੇ ਸੁਪਨੇ ਅਤੇ ਦੀਵਾਰਾਂ ‘ਤੇ ਚਿਪਕੇ ਪੋਸਟਰ: ਸ਼ਹਿਰੀ ਸਮੱਸਿਆਵਾਂ ਤੋਂ ਕੋਹਾਂ ਦੂਰ ‘ਆਪ’ ਦੇ ਨਵੇਂ ਆਗੂਆਂ ਦਾ ਅਸਲ ਕਿਰਦਾਰ

ਫਿਰੋਜ਼ਪੁਰ 13 ਸਤੰਬਰ (ਅਸ਼ੋਕ ਭਾਰਦਵਾਜ)=ਸ਼ਹਿਰੀ ਹਲਕਿਆਂ ਵਿੱਚ ਅੱਜਕੱਲ੍ਹ ਇੱਕ ਅਜੀਬ ਨਜ਼ਾਰਾ ਦੇਖਣ ਨੂੰ ਮਿਲ ਰਿਹਾ ਹੈ। ਆਮ ਆਦਮੀ ਪਾਰਟੀ ਦੇ ਬੈਨਰ ਹੇਠ ਕੁਝ ਅਜਿਹੇ ਚਿਹਰੇ ਮੈਦਾਨ ਵਿੱਚ ਉਤਰਨ ਦੀ ਤਿਆਰੀ ਕਰ ਰਹੇ ਹਨ, ਜਿਨ੍ਹਾਂ ਦਾ ਨਾ ਤਾਂ ਸ਼ਹਿਰੀ ਸਮਾਜ ਨਾਲ ਕੋਈ ਸਾਰਥਕ ਸਬੰਧ ਰਿਹਾ ਹੈ ਅਤੇ ਨਾ ਹੀ ਕਦੇ ਇਨ੍ਹਾਂ ਨੇ ਸ਼ਹਿਰ ਦੀ ਕਿਸੇ ਸਮੱਸਿਆ (ਸੀਵਰੇਜ, ਪੀਣ ਵਾਲਾ ਪਾਣੀ, ਟ੍ਰੈਫਿਕ ਜਾਂ ਵਪਾਰਕ ਅਸੁਰੱਖਿਆ) ਦੇ ਹੱਲ ਲਈ ਧਰਨਾ ਦਿੱਤਾ ਹੈ। ਹਾਲਤ ਇਹ ਹੈ ਕਿ ਸ਼ਹਿਰ ਦੀਆਂ ਦੀਵਾਰਾਂ, ਬਿਜਲੀ ਦੇ ਖੰਭਿਆਂ ਅਤੇ ਚੌਂਕਾਂ ‘ਤੇ ਬਾਹਰਲੇ ਹਲਕਿਆਂ ਤੋਂ ਆਏ ਇਨ੍ਹਾਂ ਚਾਹਵਾਨਾਂ ਦੇ ਵੱਡੇ-ਵੱਡੇ ਹੋਰਡਿੰਗ ਅਤੇ ਇਸ਼ਤਿਹਾਰ ਝਲਕ ਰਹੇ ਹਨ। ਸੋਸ਼ਲ ਮੀਡੀਆ ਦੀ ਰੀਲ੍ਹ-ਕਲਚਰ ਦੀ ਦੁਨੀਆ ਵਿੱਚ ਆਪਣੇ ਆਪ ਨੂੰ ‘ਜਨਤਾ ਦਾ ਆਗੂ’ ਅਖਵਾਉਣ ਵਾਲੇ ਇਹ ਦਾਅਵੇਦਾਰ ਜ਼ਮੀਨੀ ਹਕੀਕਤ ਤੋਂ ਪੂਰੀ ਤਰ੍ਹਾਂ ਕੋਹਾਂ ਦੂਰ ਹਨ। ਇਹਨਾਂ ਨਵੇਂ ਉੱਭਰ ਰਹੇ ਚਿਹਰਿਆਂ ਦਾ ਸਿਆਸੀ ਪਿਛੋਕੜ ਵੀ ਬੜਾ ਦਿਲਚਸਪ ਰਿਹਾ ਹੈ। ਕੱਲ੍ਹ ਤੱਕ ਜੋ ਲੋਕ ਕਿਸੇ ਹੋਰ ਪਾਰਟੀ ਜਾਂ ਧੜੇ ਲਈ ਪਰਦੇ ਪਿੱਛੇ ਸੌਦੇਬਾਜ਼ੀ ਕਰਦੇ ਰਹੇ, ਅੱਜ ‘ਆਪ’ ਦੀ ਸਾਫ਼-ਸੁਥਰੀ ਛਵੀ ਦੀ ਆੜ ਵਿੱਚ ਆਪਣੀਆਂ ਸਿਆਸੀ ਰੋਟੀਆਂ ਸੇਕਣ ਲਈ ਆ ਗਏ ਹਨ। ਇਨ੍ਹਾਂ ਦੀ ਸਿਆਸੀ ਸਿਧਾਂਤਹੀਣਤਾ ਇਸ ਕਹਾਵਤ ‘ਤੇ ਪੂਰੀ ਉਤਰਦੀ ਹੈ ਝੰਡਾ ਕਿਸੇ ਦਾ, ਡੰਡਾ ਕਿਸੇ ਦਾ ਅਤੇ ਵੋਟ ਦੀ ਫਿਤਰਤ ਕਿਸੇ ਹੋਰ ਲਾਭ ਲਈ। ਸ਼ਹਿਰੀ ਵੋਟਰ ਪੇਂਡੂ ਜਾਂ ਸੋਸ਼ਲ ਮੀਡੀਆ ਵਾਲੀ ਭਾਵਨਾਵਾਂ ਦੀ ਰਾਜਨੀਤੀ ਤੋਂ ਕਿਤੇ ਵੱਧ ਸਿਆਣੇ ਹੁੰਦੇ ਹਨ। ਸ਼ਹਿਰ ਦਾ ਵਪਾਰੀ ਵਰਗ, ਮੁਲਾਜ਼ਮ ਅਤੇ ਆਮ ਨਾਗਰਿਕ ਜਾਣਦਾ ਹੈ ਕਿ ਮੁਸੀਬਤ ਵੇਲੇ ਸੋਸ਼ਲ ਮੀਡੀਆ ਦਾ ਲਾਈਵ ਹੋਣ ਵਾਲਾ ਆਗੂ ਨਾਲ ਖੜ੍ਹਦਾ ਹੈ ਜਾਂ ਜ਼ਮੀਨੀ ਸੰਘਰਸ਼ ਕਰਨ ਵਾਲਾ ਪੁਰਾਣਾ ਵਰਕਰ। ਬਾਹਰੋਂ ਆ ਕੇ ਵਿਧਾਇਕੀ ਦੇ ਸੁਪਣੇ ਵੇਖਣ ਵਾਲੇ ਇਹ ਧਨਾਢ ਜਾਂ ਮੌਕਾਪ੍ਰਸਤ ਚਿਹਰੇ ਸਿਰਫ ਭਰਮਾਊ ਨਾਅਰੇ ਦੇ ਸਕਦੇ ਹਨ, ਅਮਲੀ ਕੰਮ ਨਹੀਂ। ਆਮ ਆਦਮੀ ਪਾਰਟੀ ਨੂੰ ਜੇਕਰ ਸ਼ਹਿਰੀ ਹਲਕਿਆਂ ਵਿੱਚ ਆਪਣੀ ਸਾਖ ਬਚਾਉਣੀ ਹੈ, ਤਾਂ ਪੈਰਾਸ਼ੂਟ ਦਾਅਵੇਦਾਰਾਂ ਦੀ ਥਾਂ ਉਸ ਵਰਕਰ ਨੂੰ ਅੱਗੇ ਲਿਆਉਣਾ ਪਵੇਗਾ ਜਿਸਨੇ ਧੁੱਪ-ਛਾਂ ਵਿੱਚ ਪਾਰਟੀ ਦਾ ਪੱਲਾ ਫੜਿਆ ਹੋਇਆ ਹੈ। ਸੋਸ਼ਲ ਮੀਡੀਆ ਦੇ ਚਮਕੀਲੇ ਪੋਸਟਰ ਜ਼ਮੀਨੀ ਭਰੋਸਾ ਨਹੀਂ ਜਿੱਤ ਸਕਦੇ ਅੰਤ ਵਿੱਚ ਜਿੱਤ ਸੇਵਾ ਦੀ ਹੁੰਦੀ ਹੈ, ਸਪਾਂਸਡ ਇਸ਼ਤਿਹਾਰਾਂ ਦੀ ਨਹੀਂ।