ਇੱਕ ਹੋਰ ਕਦਮ – ਖੁਸ਼ੀ ਵੱਲ

ਦੁਨੀਆ ਇੱਕ ਬਾਜ਼ਾਰ ਹੈ। ਇਸ ਵਿੱਚੋਂ ਜੋ ਚਾਹੇ ਮਿਲੇਗਾ, ਪਰ ਸ਼ਰਤ ਇਹ ਹੈ ਕਿ ਤੁਹਾਡੇ ਕੋਲੇ ਇਸਨੂੰ ਖਰੀਦਣ ਦੀ ਸਮਰੱਥਾ ਹੋਵੇ। ਪਿਆਰ, ਦਇਆ, ਖੁਸ਼ੀ ਆਦਿ ਅਜਿਹੀਆਂ ਚੀਜ਼ਾਂ ਹਨ, ਜਿਨ੍ਹਾਂ ਦਾ ਸਿਰਫ ਵਟਾਂਦਰਾ ਹੁੰਦਾ ਹੈ। ਮਤਲਬ, ਜਿੰਨੀਆਂ ਤੁਸੀਂ ਕਿਸੇ ਨੂੰ ਦਿਓਗੇ, ਉਨ੍ਹੇ ਹੀ ਤੁਹਾਨੂੰ ਵਾਪਸ ਮਿਲਣਗੀਆਂ। ਆਪਣੀ ਜ਼ਿੰਦਗੀ ਵਿੱਚ ਆਉਣ ਵਾਲੇ ਹਰੇਕ ਇਨਸਾਨ ਨੂੰ ਉਹੀ ਦੇਣ ਦੀ ਕੋਸ਼ਿਸ਼ ਕਰੋ, ਜੋ ਤੁਸੀਂ ਉਸ ਤੋਂ ਚਾਹੁੰਦੇ ਹੋ। ਹਾਂ, ਕਈ ਵਾਰ ਕੁਝ ਅਜਿਹੇ ਇਨਸਾਨ ਮਿਲ ਜਾਂਦੇ ਹਨ, ਜਿਨ੍ਹਾਂ ਵਿੱਚ ਗੁੱਸਾ ਬਹੁਤ ਹੁੰਦਾ ਹੈ। ਅਜਿਹੇ ਵਿਅਕਤੀ ਨੂੰ ਸਾਂਭਣਾ ਬਹੁਤ ਮੁਸ਼ਕਿਲ ਹੁੰਦਾ ਹੈ। ਇਸ ਲਈ ਦੋ ਤਰੀਕਿਆਂ ਨਾਲ ਤੁਸੀਂ ਅਜਿਹੇ ਵਿਅਕਤੀ ਦਾ ਸਾਹਮਣਾ ਕਰ ਸਕਦੇ ਹੋ। *ਪਹਿਲਾ:* ਕਿ ਤੁਸੀਂ ਉਸਨੂੰ ਸ਼ਾਂਤੀ ਨਾਲ ਹੀ ਮਿਲੋ, ਇੱਕ ਵਾਰ ਨਹੀਂ, ਹਰ ਵਾਰ। ਉਹ ਆਪ ਹੀ ਸੋਚੇਗਾ ਕਿ ਮੈਂ ਇਸ ਨਾਲ ਗਲਤ ਕਰ ਰਿਹਾ ਹਾਂ, ਤੇ ਉਸ ਦਾ ਵਿਹਾਰ ਬਦਲ ਜਾਏਗਾ। ਕਿਉਂਕਿ ਆਖਿਰ ਹੈ ਤਾਂ ਉਹ ਵੀ ਇਨਸਾਨ ਹੀ। *ਦੂਜਾ:* ਪਰ ਚਲੋ, ਜੇਕਰ ਤੁਸੀਂ ਅਜਿਹਾ ਨਹੀਂ ਕਰ ਸਕਦੇ, ਕਾਰਨ ਕੋਈ ਵੀ ਹੋਵੇ, ਤਾਂ ਤੁਸੀਂ ਇਨਸਾਨ ਉਸ ਇਨਸਾਨ ਬਾਰੇ ਬੁਰਾ ਕਹਿਣਾ ਤਾਂ ਦੂਰ, ਬੁਰਾ ਸੋਚਣਾ ਵੀ ਛੱਡ ਦਿਓ। ਤੇ ਚੁੱਪ-ਚਾਪ ਕਿਨਾਰਾ ਕਰ ਲਓ। ਉਸ ਬਾਰੇ ਕਿਸੇ ਨਾਲ ਵੀ ਗੱਲ ਕਰਨ ਦੀ ਕੋਸ਼ਿਸ਼ ਨਾ ਕਰੋ। ਕੋਈ ਜ਼ਰੂਰਤ ਨਹੀਂ ਹੈ ਇਸ ਦੀ। ਕਿਉਂਕਿ ਜੇ ਤੁਸੀਂ ਉਸ ਨਾਲ ਕੋਈ ਵਾਸਤਾ ਰੱਖਣਾ ਹੀ ਨਹੀਂ ਚਾਹੁੰਦੇ, ਤਾਂ ਉਹ ਇਨਸਾਨ ਜੋ ਵੀ ਮਰਜ਼ੀ ਹੋਵੇ, ਚੰਗਾ ਹੋਵੇ ਜਾਂ ਮਾੜਾ ਹੋਵੇ, ਤੁਸੀਂ ਕੀ ਲੈਣਾ? ਆਪਣੀ ਸੋਚ ਨਹੀਂ ਮਿਲਦੀ, ਇਸ ਲਈ ਇੱਕ ਪਾਸੇ ਹੋ ਜਾਓ। ਗੱਲ ਖਤਮ। ਦੂਜਿਆਂ ਨੂੰ ਕਨਵਿੰਸ ਕਰਨ ਦੀ, ਭਰੋਸਾ ਦਵਾਉਣ ਦੀ ਕੀ ਲੋੜ ਹੈਗੀ ਕਿ ਉਹ ਇਨਸਾਨ ਹੀ ਮਾੜਾ ਹੈ?ਇਸ ਨਾਲ ਇੱਕ ਪਾਸੇ ਤਾਂ ਤੁਸੀਂ ਆਪਣੇ ਆਪ ਨੂੰ ਦੁਖੀ ਕਰ ਰਹੇ ਹੋ, ਕਿਉਂਕਿ ਤੁਸੀਂ ਉਸਨੂੰ ਯਾਦ ਕਰ ਰਹੇ ਹੋ। ਤੇ ਦੂਜੇ ਪਾਸੇ ਉਸਦੀਆਂ ਬੁਰਾਈਆਂ ਨੂੰ ਯਾਦ ਕਰ ਰਹੇ ਹੋ, ਜਿਨ੍ਹਾਂ ਦਾ ਅਸਰ ਤੁਹਾਡੇ ਤੇ ਦੇਰ-ਸਵੇਰ ਹੋਏਗਾ ਹੀ। ਕਿਉਂਕਿ ਇਹ ਕੁਦਰਤ ਦਾ ਨਿਯਮ ਹੈ ਕਿ ਜਿਸ ਇਨਸਾਨ ਨੂੰ ਤੁਸੀਂ ਜਿੰਨਾ ਜ਼ਿਆਦਾ ਯਾਦ ਕਰੋਗੇ, ਤੁਸੀਂ ਉਸ ਵਰਗੇ ਹੁੰਦੇ ਜਾਓਗੇ। ਜਿੰਨਾ ਜ਼ਿਆਦਾ ਤੁਸੀਂ ਇਸ ਬਾਰੇ ਸੋਚੋਗੇ, ਉਸ ਬਾਰੇ ਗੱਲ ਕਰੋਗੇ, ਉਸ ਨਾਲ ਗੱਲ ਕਰੋਗੇ, ਤੁਸੀਂ ਉਸ ਵਰਗੇ ਹੁੰਦੇ ਜਾਓਗੇ। ਇਸ ਲਈ ਸੰਗਤ ਸਿਰਫ ਅਜਿਹੇ ਇਨਸਾਨ ਦੀ ਕਰੋ, ਜਿਸ ਵਰਗੇ ਤੁਸੀਂ ਹੋਣਾ ਚਾਹੁੰਦੇ ਹੋ। ਕਿਉਂਕਿ ਜਿੰਨਾ ਜ਼ਿਆਦਾ ਤੁਸੀਂ ਉਸ ਇਨਸਾਨ ਨੂੰ ਯਾਦ ਕਰੋਗੇ, ਉਸ ਨਾਲ ਗੱਲ ਕਰੋਗੇ, ਉਸ ਦਾ ਪ੍ਰਭਾਵ ਤੁਹਾਡੇ ਤੇ ਪਏਗਾ। ਉਸਦੀ ਸ਼ਖਸੀਅਤ ਤੁਹਾਡੇ ਤੇ ਹਾਵੀ ਹੋਣ ਲੱਗੇਗੀ। ਉਸਦੀਆਂ ਗੱਲਾਂ ਦਾ ਅਸਰ ਤੁਹਾਡੇ ਤੇ ਹੋਏਗਾ। ਤੇ ਜਦੋਂ ਵੀ ਮਨੁੱਖੀ ਮਨ ਕਿਸੇ ਦਾ ਪ੍ਰਭਾਵ ਕਬੂਲ ਲੈਂਦਾ ਹੈ, ਤਾਂ ਇਸ ਵਿੱਚ ਇੰਨੀ ਸ਼ਕਤੀ ਹੁੰਦੀ ਹੈ ਕਿ ਉਹ ਉਸ ਵਰਗਾ ਹੋਣਾ ਸ਼ੁਰੂ ਹੋ ਜਾਂਦਾ ਹੈ, ਆਪਣੇ ਆਪ ਨੂੰ ਬਦਲ ਲੈਂਦਾ ਹੈ। ਇਸ ਲਈ ਸੰਗਤ ਉਸ ਮਨੁੱਖ ਦੀ ਕਰੋ, ਉਸੇ ਨਾਲ ਵੱਧ ਤੋਂ ਵੱਧ ਗੱਲ ਕਰੋ, ਜਿਸ ਵਰਗੇ ਤੁਸੀਂ ਹੋਣਾ ਚਾਹੁੰਦੇ ਹੋ। ਇਹ ਇੱਕਦਮ ਤਾਂ ਨਹੀਂ ਹੋਵੇਗਾ, ਥੋੜਾ ਟਾਈਮ ਲੱਗੇਗਾ। ਜਿੰਨਾ ਜ਼ਿਆਦਾ ਫਰਕ ਹੈ, ਜਿੰਨਾ ਡੂੰਘਾ ਫਰਕ ਹੈ, ਉਨ੍ਹਾ ਹੀ ਜ਼ਿਆਦਾ ਟਾਈਮ ਲੱਗੇਗਾ। ਪਰ ਇਹ ਪੱਕਾ ਹੈ ਕਿ ਉਸ ਮਨੁੱਖ ਦੇ ਨੇੜੇ ਰਹਿਣ ਨਾਲ ਉਸ ਵਰਗੇ ਹੋਣਾ ਸੁਭਾਵਿਕ ਹੈ, ਕੁਦਰਤੀ ਹੈ। ਇਸ ਲਈ ਇਹੋ ਜਿਹੇ ਲੋਕਾਂ ਬਾਰੇ ਸੋਚਣਾ, ਗਾਲਾਂ ਕਢਣੀਆਂ, ਜਿਹਨਾਂ ਨੂੰ ਤੁਸੀਂ ਪਸੰਦ ਨਹੀਂ ਕਰਦੇ, ਦੀ ਜਗ੍ਹਾ ਤੇ ਇਹੋ ਜਿਹੇ ਲੋਕਾਂ ਬਾਰੇ ਸੋਚੋ, ਉਹਨਾਂ ਬਾਰੇ ਗੱਲ ਕਰੋ। ਤੇ ਜੇ ਹੋ ਸਕੇ, ਤਾਂ ਉਹਨਾਂ ਦੇ ਨੇੜੇ ਰਹੋ, ਜਿਨ੍ਹਾਂ ਵਰਗੇ ਤੁਸੀਂ ਬਣਨਾ ਚਾਹੁੰਦੇ ਹੋ।

ਡਾਕਟਰ ਹਰਪ੍ਰੀਤ ਕੌਰ  9780675025