ਐਫਸੀਆਈ ਦੇ ਗੋਦਾਮਾਂ ’ਚ ਜਗ੍ਹਾ ਦੀ ਘਾਟ ਕਾਰਨ 10 ਫੀਸਦੀ ਝੋਨੇ ਦੀ ਮਿਲਿੰਗ ਬਕਾਇਆ ਨਵੇਂ ਸੀਜ਼ਨ ਤੋਂ ਪਹਿਲਾਂ ਪਿਛਲੇ ਸੀਜ਼ਨ ਦੀ ਮਿਲਿੰਗ ਮੁਕੰਮਲ ਕਰਵਾਉਣ ਦੀ ਮੰਗ

ਅਮਲੋਹ, 18 ਸਤੰਬਰ (ਅਜੈ ਕੁਮਾਰ)=ਰਾਈਸ ਸੈਲਰ ਐਸੋਸੀਏਸ਼ਨ ਅਮਲੋਹ ਦੀ ਮੀਟਿੰਗ ਐਸੋਸੀਏਸ਼ਨ ਦੇ ਪ੍ਰਧਾਨ ਰਾਕੇਸ਼ ਕੁਮਾਰ ਦੀ ਅਗਵਾਈ ਹੇਠ ਹੋਈ। ਉਨ੍ਹਾਂ ਕਿਹਾ ਕਿ ਝੋਨੇ ਦਾ ਨਵਾਂ ਸੀਜ਼ਨ 2026-27 ਇਕ ਅਕਤੂਬਰ ਤੋਂ ਸ਼ੁਰੂ ਹੋਣ ਜਾ ਰਿਹਾ ਹੈ, ਪਰ ਪਿਛਲੇ ਸੀਜ਼ਨ 2025-26 ਦੇ ਕਰੀਬ 10 ਫੀਸਦੀ ਝੋਨੇ ਦੀ ਮਿਲਿੰਗ ਐਫਸੀਆਈ ਦੇ ਗੋਦਾਮਾਂ ਵਿੱਚ ਚੌਲ ਰੱਖਣ ਲਈ ਜਗ੍ਹਾ ਦੀ ਘਾਟ ਕਾਰਨ ਅਜੇ ਬਕਾਇਆ ਹੈ।ਰਾਕੇਸ਼ ਕੁਮਾਰ ਨੇ ਦੱਸਿਆ ਕਿ ਅਮਲੋਹ ਦੇ 12 ਰਾਈਸ ਮਿਲਰਾਂ ਦੀ 85 ਫੀਸਦੀ ਤੋਂ ਘੱਟ ਮਿਲਿੰਗ ਹੋਈ ਹੈ, ਜਦਕਿ ਦੋ ਮਿਲਾਂ ਦੀ ਮਿਲਿੰਗ ਜਗ੍ਹਾ ਦੀ ਘਾਟ ਕਾਰਨ ਕੇਵਲ 60 ਫੀਸਦੀ ਤੱਕ ਹੀ ਹੋ ਸਕੀ ਹੈ। ਉਨ੍ਹਾਂ ਐਫਸੀਆਈ ਦੇ ਉੱਚ ਅਧਿਕਾਰੀਆਂ ਤੋਂ ਮੰਗ ਕੀਤੀ ਕਿ ਚੌਲਾਂ ਦੀ ਡਿਲਿਵਰੀ ਅਤੇ ਭੁਗਤਾਨ ਲਈ ਗੋਦਾਮਾਂ ਵਿੱਚ ਤੁਰੰਤ ਜਗ੍ਹਾ ਦਾ ਪ੍ਰਬੰਧ ਕੀਤਾ ਜਾਵੇ।ਉਨ੍ਹਾਂ ਕਿਹਾ ਕਿ 85 ਫੀਸਦੀ ਤੱਕ ਚੌਲਾਂ ਦੀ ਡਿਲਿਵਰੀ ਕਰਨ ਵਾਲੇ ਮਿਲਰਾਂ ਨੂੰ ਹੀ ਨਵੇਂ ਸੀਜ਼ਨ ਦਾ ਝੋਨਾ ਅਲਾਟ ਕਰਨ ਦਾ ਫੈਸਲਾ ਉਚਿਤ ਨਹੀਂ ਹੈ, ਕਿਉਂਕਿ ਮਿਲਰਾਂ ਦੀ ਪੈਂਡੈਂਸੀ ਉਨ੍ਹਾਂ ਦੀ ਗਲਤੀ ਕਾਰਨ ਨਹੀਂ, ਸਗੋਂ ਐਫਸੀਆਈ ਦੇ ਗੋਦਾਮਾਂ ਵਿੱਚ ਜਗ੍ਹਾ ਦੀ ਘਾਟ ਕਾਰਨ ਹੋਈ ਹੈ। ਉਨ੍ਹਾਂ ਮੰਗ ਕੀਤੀ ਕਿ ਇਨ੍ਹਾਂ ਬੇਕਸੂਰ ਮਿਲਰਾਂ ਦੀ 2026-27 ਸੀਜ਼ਨ ਲਈ ਰਜਿਸਟ੍ਰੇਸ਼ਨ ਕੀਤੀ ਜਾਵੇ।ਉਨ੍ਹਾਂ ਪੰਜਾਬ ਦੀਆਂ ਖਰੀਦ ਏਜੰਸੀਆਂ ਦੇ ਅਧਿਕਾਰੀਆਂ ਨੂੰ ਐਫਸੀਆਈ ਦੀਆਂ ਸਪੈਸੀਫਿਕੇਸ਼ਨਾਂ ਮੁਤਾਬਕ 17 ਫੀਸਦੀ ਤੱਕ ਨਮੀ ਵਾਲਾ ਝੋਨਾ ਖਰੀਦਣ ਦੀ ਹਦਾਇਤ ਯਕੀਨੀ ਬਣਾਉਣ ਦੀ ਮੰਗ ਵੀ ਕੀਤੀ।ਰਾਕੇਸ਼ ਕੁਮਾਰ ਨੇ ਸ਼ੈਲਰ ਮਾਲਕਾਂ ਨੂੰ ਬਾਹਰਲੇ ਰਾਜਾਂ ਤੋਂ ਸਸਤਾ ਝੋਨਾ ਲਿਆ ਕੇ ਪੰਜਾਬ ਵਿੱਚ ਵੇਚਣ ਤੋਂ ਵੀ ਸੁਚੇਤ ਕੀਤਾ। ਉਨ੍ਹਾਂ ਕਿਹਾ ਕਿ ਅਜਿਹੀ ਕਾਰਵਾਈ ਨਾਲ ਭਵਿੱਖ ਵਿੱਚ ਪੰਜਾਬ ਦੇ ਸ਼ੈਲਰ ਮਾਲਕਾਂ ਨੂੰ ਵੀ ਹਰਿਆਣਾ ਦੇ ਸ਼ੈਲਰ ਮਾਲਕਾਂ ਵਰਗੀਆਂ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।ਇਸ ਮੌਕੇ ਵਿਨੋਦ ਮਿੱਤਲ, ਦਰਸ਼ਨ ਸਿੰਘ ਬੱਬੀ, ਵਿਨੋਦ ਅਬਰੋਲ, ਮੋਹਿਤ ਬਾਂਸਲ, ਨਰਿੰਦਰ ਬਾਂਸਲ, ਲਾਲ ਚੰਦ ਗਰਗ, ਅਸ਼ਨ ਗਿੱਲ, ਗੰਗਾ ਪੁਰੀ, ਅਭਿਸ਼ੇਕ ਗਰਗ, ਧਰਮਿੰਦਰ ਜੋਸ਼ੀ, ਹੈਪੀ ਠੇਕੇਦਾਰ, ਅਸ਼ਵਨੀ ਜਿੰਦਲ, ਭੁਵੇਸ਼ ਬਾਂਸਲ, ਸਿੰਦਰ ਮੋਹਨ ਪੁਰੀ, ਅਨਿਲ ਲੁਟਾਵਾ, ਅਮਿਤਜਿੰਦਲ,ਆਸ਼ੂ, ਜਸਵਿੰਦਰ ਜੱਸੀ, ਨਵੀਨ ਅਰੋੜਾ, ਅਵੀਨਾਸ਼ ਪੁਰੀ, ਤਰਸ਼ੇਮ ਬਿੱਟੂ ਅਰੋੜਾ, ਸੁਰਿੰਦਰ ਜਿੰਦਲ ਆਦਿ ਹਾਜ਼ਰ ਸਨ।