– ਕੱਚੇ ਮੁਲਾਜ਼ਮਾਂ ਦੀ ਲੰਮੀ ਉਡੀਕ ਹੋਈ ਖ਼ਤਮ, ਨਗਰ ਕੌਂਸਲ ਧਨੌਲਾ ਨੇ 16 ਕਰਮਚਾਰੀਆਂ ਨੂੰ ਪੱਕਾ ਕਰਨ ਦਾ ਮਤਾ ਪਾਇਆ – 12 ਸਫਾਈ ਕਰਮਚਾਰੀ ਤੇ 4 ਸੀਵਰਮੈਨਾਂ ਦੇ ਚਿਹਰਿਆਂ ’ਤੇ ਖਿੜੀ ਖੁਸ਼ੀ; ਸਰੋਪੇ ਪਾ ਕੇ ਕੀਤਾ ਸਨਮਾਨ, ਮੂੰਹ ਮਿੱਠਾ ਕਰਵਾਇਆ

ਧਨੌਲਾ, 27 ਅਗਸਤ: (ਹਰਦੀਪ ਹੈਰੀ)=ਨਗਰ ਕੌਂਸਲ ਧਨੌਲਾ ਵਿੱਚ ਅੱਜ ਦਾ ਦਿਨ ਉਨ੍ਹਾਂ 16 ਕਰਮਚਾਰੀਆਂ ਲਈ ਖੁਸ਼ੀਆਂ ਭਰਿਆ ਰਿਹਾ, ਜੋ ਲੰਮੇ ਸਮੇਂ ਤੋਂ ਕੰਟਰੈਕਟ ਬੇਸ ’ਤੇ ਆਪਣੀਆਂ ਸੇਵਾਵਾਂ ਨਿਭਾਅ ਰਹੇ ਸਨ। ਨਗਰ ਕੌਂਸਲ ਵੱਲੋਂ 12 ਸਫਾਈ ਕਰਮਚਾਰੀਆਂ ਅਤੇ 4 ਸੀਵਰਮੈਨਾਂ ਨੂੰ ਪੱਕਾ ਕਰਨ ਸਬੰਧੀ ਮਤਾ ਪਾਇਆ ਗਿਆ, ਜਿਸ ਨਾਲ ਕਰਮਚਾਰੀਆਂ ਵਿੱਚ ਖੁਸ਼ੀ ਦੀ ਲਹਿਰ ਦੌੜ ਗਈ।ਇਸ ਅਹਿਮ ਫੈਸਲੇ ਤੋਂ ਬਾਅਦ ਕਰਮਚਾਰੀਆਂ ਦਾ ਸਰੋਪੇ ਪਾ ਕੇ ਸਨਮਾਨ ਕੀਤਾ ਗਿਆ ਅਤੇ ਮੂੰਹ ਮਿੱਠਾ ਕਰਵਾਇਆ ਗਿਆ। ਇਸ ਮੌਕੇ ਕਰਮਚਾਰੀਆਂ ਦੇ ਚਿਹਰਿਆਂ ’ਤੇ ਖੁਸ਼ੀ ਸਾਫ਼ ਝਲਕ ਰਹੀ ਸੀ। ਉਨ੍ਹਾਂ ਵੱਲੋਂ ਨਗਰ ਕੌਂਸਲ ਦੇ ਇਸ ਫੈਸਲੇ ਲਈ ਧੰਨਵਾਦ ਪ੍ਰਗਟ ਕੀਤਾ ਗਿਆ।ਇਸ ਮੌਕੇ ਕੌਂਸਲਰ ਮਨੀਸ਼ ਕੁਮਾਰ ਬਾਂਸਲ, ਸਾਬਕਾ ਨਗਰ ਕੌਂਸਲ ਪ੍ਰਧਾਨ ਸ਼੍ਰੀਮਤੀ ਰਣਜੀਤ ਕੌਰ ਸੋਢੀ, ਕੌਂਸਲਰ ਸਾਹਿਬ ਸਿੰਘ ਸੋਢੀ, ਕੌਂਸਲਰ ਬੂਟਾ ਢਿੱਲੋਂ, ਸਾਬਕਾ ਮੀਤ ਪ੍ਰਧਾਨ ਨਗਰ ਕੌਂਸਲ ਸੁਖਵਿੰਦਰ ਸਿੰਘ ਮੁੰਦਰੀ, ਕੌਂਸਲਰ ਕੁਲਦੀਪ ਕੌਰ, ਐਮਸੀ ਬਿੱਲੂ ਖਾਨ, ਐਮਸੀ ਜਸਵੀਰ ਕੌਰ ਅਤੇ ਐਮਸੀ ਵਿੱਕੀ ਕੁਮਾਰ ਸਮੇਤ ਨਗਰ ਕੌਂਸਲ ਦੇ ਮੁਲਾਜ਼ਮ ਹਾਜ਼ਰ ਸਨ।ਨਗਰ ਕੌਂਸਲ ਦੇ ਇਸ ਫੈਸਲੇ ਨੂੰ ਸਫਾਈ ਅਤੇ ਸੀਵਰੇਜ ਵਿਵਸਥਾ ਨੂੰ ਸੰਭਾਲਣ ਵਾਲੇ ਕਰਮਚਾਰੀਆਂ ਲਈ ਵੱਡੀ ਰਾਹਤ ਅਤੇ ਹੌਸਲੇ ਵਾਲਾ ਕਦਮ ਮੰਨਿਆ ਜਾ ਰਿਹਾ ਹੈ।