ਜੈਅੰਤੀ ਮਾਜਰੀ ਦੇ ਪੁਲ਼ ਦੀ ਉਸਾਰੀ ਲਈ ਬੋਰ ਟੈਸਟਿੰਗ  ਦਾ ਕੰਮ ਸ਼ੁਰੂ-ਬੈਨੀਪਾਲ 

ਕੁਰਾਲੀ 5ਸਤੰਬਰ (ਜਗਦੇਵ ਸਿੰਘ )ਖਰੜ ਹਲਕੇ ਦੇ ਨੀਮ ਪਹਾੜੀ ਖੇਤਰ ਦੇ ਪਿੰਡਾਂ ਦੇ ਲੋਕਾਂ ਵਿੱਚ ਉਸ ਵੇਲੇ ਖੁਸ਼ੀ ਦੀ ਲਹਿਰ ਦੌੜ ਗਈ ਜਦੋਂ ਉੱਘੇ ਸਮਾਜਸੇਵੀ ਅਤੇ ਖੇਡ ਪ੍ਰਮੋਟਰ ਦਲਵਿੰਦਰ ਸਿੰਘ ਬੈਨੀਪਾਲ ਵੱਲੋਂ ਤਿੰਨ ਮਹੀਨੇ ਪਹਿਲਾਂ ਕੀਤੇ ਵਾਅਦੇ ਨੂੰ  ਬੂਰ ਪੈਣਾ ਸ਼ੁਰੂ ਹੋ ਗਿਆ। ਇਲਾਕੇ ਦੇ ਮਸ਼ਹੂਰ ਇਤਿਹਾਸਕ ਪਿੰਡ ਜੈਅੰਤੀ ਮਾਜਰੀ ਦੇ ਪੁਲ਼ ਦੀ ਉਸਾਰੀ ਲਈ ਬੋਰਿੰਗ ਦੇ ਕੰਮ ਦਾ ਸਰਦਾਰ ਬੈਨੀਪਾਲ ਨੇ ਮੱਥਾ ਟੇਕ ਕੇ ਉਦਘਾਟਨ ਕੀਤਾ ਅਤੇ ਇਸ ਮੌਕੇ ਲੱਡੂ ਵੰਡੇ ਗਏ। ਪੱਤਰਕਾਰਾਂ ਨਾਲ਼ ਗੱਲਬਾਤ ਕਰਦਿਆਂ ਸਰਦਾਰ ਬੈਨੀਪਾਲ ਨੇ ਕਿਹਾ ਕਿ ਰਾਜਧਾਨੀ ਦੇ ਕਰੀਬ ਦਸ ਕਿਲੋਮੀਟਰ ਦੇ ਘੇਰੇ ਚ ਆਓਂਦੇ ਇਸ ਇਲਾਕੇ ਦੇ ਲੋਕਾਂ ਨੂੰ ਐਨੇ ਸਾਲ ਦੀ ਆਜ਼ਾਦੀ ਤੋਂ ਬਾਅਦ ਵੀ ਮੁੱਢਲੀਆਂ ਸਹੂਲਤਾਂ ਉਪਲਬਧ ਨਹੀਂ ਹੋਈਆਂ ਹਨ। ਇਹ ਘਾਟਾਂ ਰਾਜ ਕਰ ਗਈਆਂ ਸਾਰੀਆਂ ਸਰਕਾਰਾਂ ਅਤੇ ਇਸ ਇਲਾਕੇ ਦੀ ਨੁਮਾਇੰਦਗੀ ਕਰਦੇ ਲੀਡਰਾਂ ਦੀ ਨਾਲਇਕੀ ਦਾ ਮੂੰਹੋ ਚੀਖਦਾ ਚਿਹਰਾ ਹੈ। ਸਰਦਾਰ ਬੈਨੀਪਾਲ ਨੇ ਅੱਗੇ ਕਿਹਾ ਕਿ ਇਲਾਕੇ ਦੇ ਬਾਹਰ ਵਸਦੇ ਐਨ ਆਰ ਆਈ ਭਰਾਵਾਂ, ਇਲਾਕੇ ਦੀਆਂ ਪੰਚਾਇਤਾਂ ਅਤੇ ਸਭ ਸੂਝਵਾਨ ਬਾਸ਼ਿੰਦਿਆਂ ਦੋਸਤਾਂ ਮਿੱਤਰਾਂ ਦੇ ਦਰਾਂ ਤੱਕ ਸਾਡੀ ਟੀਮ ਸਹਿਯੋਗ ਮੰਗਣ ਲਈ ਅਲਖ ਜਗਾਵੇਗੀ । ਮੀਡੀਆ ਰਾਹੀਂ ਇਲਾਕੇ ਦੀਆਂ ਸੰਗਤਾਂ ਨੂੰ ਸੰਬੋਧਤ ਹੁੰਦਿਆਂ ਸਰਦਾਰ ਬੈਨੀਪਾਲ ਨੇ ਬੇਨਤੀ ਕੀਤੀ ਕਿ ਇਹ ਵੱਡਾ ਕਾਰਜ ਤੁਹਾਡੇ ਸਹਿਯੋਗ ਨਾਲ਼ ਹੀ ਨੇਪਰੇ ਚੜ੍ਹਨਾ ਹੈ। ਇਸ ਅਵਸਰ ਤੇ ਟੀਮ ਦੇ ਖਜ਼ਾਨਾ ਪ੍ਰਬੰਧਕ ਮਾਸਟਰ ਹਰਨੇਕ ਸਿੰਘ ਮਾਵੀ ਨੇ ਜਾਣਕਾਰੀ ਦਿੱਤੀ ਕਿ ਦਸਬੰਧ ਰੂਪੀ ਯੋਗਦਾਨ ਦੇ ਇੱਕ ਇੱਕ ਪੈਸੇ ਦਾ ਹਿਸਾਬ ਕਿਤਾਬ ਰੱਖਕੇ ਉਸਦੀ ਹਰ ਮਹੀਨੇ ਰਿਪੋਰਟ ਮੀਡੀਆ ਚ ਜਨਤਕ ਕੀਤੀ ਜਾਇਆ ਕਰੇਗੀ। ਇਸ ਸੁਭਾਗੇ ਅਵਸਰ ਤੇ ਸਾਬਕਾ ਸਰਪੰਚ ਚੌਧਰੀ ਸ਼ਿਆਮ ਲਾਲ ਮਾਜਰੀਆਂ,ਮੰਦਰ ਕਮੇਟੀ ਦੇ ਮੈਂਬਰ ਸਾਹਿਬਾਨ , ਹੁਸਨ ਚੰਦ ਸਰਪੰਚ ਜੈਂਤੀ ਮਾਜਰੀ,ਯੋਗਰਾਜ ਸਰਪੰਚ ਕਸੌਲੀ, ਮੱਖਣ ਜੀ ਜੈਂਤੀ ਮਾਜਰੀ, ਪਰਮਜੀਤ ਪੰਚ ਕਸੌਲੀ, ਯਾਦ ਰਾਮ ਪੰਚ,ਜਰਨੈਲ ਸਿੰਘ,ਬਿੱਲਾ ਜੈਂਤੀ ਮਾਜਰੀ,ਨਿਰਮਲ ਸਿੰਘ ਕਾਲਾ ਪੰਚ ਬਘੀਡੀ,ਟੀਮ ਬੈਨੀਪਾਲ ਗਰੁੱਪ ਦੇ ਅਹਿਮ ਮੈਂਬਰ ਮਾਸਟਰ ਹਰਨੇਕ ਸਿੰਘ ਮਾਵੀ ਬੜੋਦੀ, ਬਾਬਾ ਰਣਬੀਰ ਸਿੰਘ ਕਾਦੀਮਾਜਰਾ, ਜਗਦੀਸ਼ ਸਿੰਘ ਦੀਸ਼ਾ ਆਦਿ ਮੌਜੂਦ ਸਨ।