ਨੌਜਵਾਨਾਂ ਦੇ ਭਵਿੱਖ ਲਈ ਚਾਰੇ ਰਾਜਨੀਤਿਕ ਪਾਰਟੀਆਂ ਨੇ ਦਿਖਾਈ ਮਿਸਾਲੀ ਸਾਂਝ; ਲੰਮੇ ਸਮੇਂ ਤੋਂ ਲਟਕਦੇ ਖੇਡ ਗਰਾਊਂਡ ਦੇ ਮਸਲੇ ਲਈ ਬਣਾਇਆ ਸਾਂਝਾ ਵਫ਼ਦ

​ਸ੍ਰੀ ਗੋਇੰਦਵਾਲ ਸਾਹਿਬ (ਕਰਨੈਲ ਸਿੰਘ ਰਿੰਕੂ) — ਇਤਿਹਾਸਿਕ ਨਗਰ ਸ੍ਰੀ ਗੋਇੰਦਵਾਲ ਸਾਹਿਬ ਵਿਖੇ ਪਿਛਲੇ ਲੰਮੇ ਸਮੇਂ ਤੋਂ ਅਧੂਰੇ ਪਏ ਖੇਡ ਗਰਾਊਂਡ ਦਾ ਭਖਿਆ ਮੁੱਦਾ ਹੁਣ ਸੁਲਝਣ ਦੀ ਰਾਹ ‘ਤੇ ਪੈਂਦਾ ਨਜ਼ਰ ਆ ਰਿਹਾ ਹੈ। ਖੇਡ ਮੈਦਾਨ ਦੀ ਮੰਗ ਨੂੰ ਲੈ ਕੇ ਅੱਜ ਖੇਤਰ ਦੀਆਂ ਚਾਰੇ ਪ੍ਰਮੁੱਖ ਰਾਜਨੀਤਿਕ ਪਾਰਟੀਆਂ ਦੇ ਆਗੂ ਆਪਣੀ ਪਾਰਟੀਬੰਦੀ ਅਤੇ ਸਿਆਸੀ ਮਤਭੇਦਾਂ ਨੂੰ ਲਾਂਭੇ ਕਰਕੇ ਇੱਕੋ ਮੰਚ ‘ਤੇ ਹਾਜ਼ਰ ਹੋਏ। ਇਸ ਅਹਿਮ ਮੀਟਿੰਗ ਵਿੱਚ ਸੇਵਾ ਸੋਸਾਇਟੀਆਂ, ਪਿੰਡ ਦੀਆਂ ਪ੍ਰਮੁੱਖ ਜਥੇਬੰਦੀਆਂ, ਇਲਾਕਾ ਨਿਵਾਸੀਆਂ ਅਤੇ ਖੇਡ ਪ੍ਰੇਮੀ ਨੌਜਵਾਨਾਂ ਨੇ ਵੱਡੀ ਗਿਣਤੀ ‘ਚ ਸ਼ਮੂਲੀਅਤ ਕੀਤੀ।​ਮੀਟਿੰਗ ਦੌਰਾਨ ਚਾਰੇ ਧਿਰਾਂ ਦੇ ਸੀਨੀਅਰ ਆਗੂਆਂ ਨੇ ਪਾਰਟੀਬੰਦੀ ਤੋਂ ਉੱਪਰ ਉੱਠ ਕੇ ਨਗਰ ਦੇ ਸਰਬਪੱਖੀ ਵਿਕਾਸ ਅਤੇ ਨੌਜਵਾਨਾਂ ਦੇ ਰੋਸ਼ਨ ਭਵਿੱਖ ਨੂੰ ਪਹਿਲ ਦਿੰਦਿਆਂ ਸਾਂਝੀ ਰਣਨੀਤੀ ਬਣਾਉਣ ਦਾ ਐਲਾਨ ਕੀਤਾ। ਆਗੂਆਂ ਨੇ ਸਪੱਸ਼ਟ ਕੀਤਾ ਕਿ ਖੇਡ ਗਰਾਊਂਡ ਦਾ ਮੁੱਦਾ ਕਿਸੇ ਰਾਜਨੀਤੀ ਦਾ ਵਿਸ਼ਾ ਨਹੀਂ, ਸਗੋਂ ਸਾਡੀ ਆਉਣ ਵਾਲੀ ਪੀੜ੍ਹੀ ਦੀ ਸਿਹਤ ਅਤੇ ਭਵਿੱਖ ਨਾਲ ਜੁੜਿਆ ਹੋਇਆ ਸੰਜੀਦਾ ਮਾਮਲਾ ਹੈ।​ਉਨ੍ਹਾਂ ਸਰਬਸੰਮਤੀ ਨਾਲ ਫੈਸਲਾ ਲਿਆ ਕਿ ਸਾਰੀਆਂ ਪਾਰਟੀਆਂ ਦੇ ਆਗੂ ਇੱਕ ਸਾਂਝੇ ਵਫ਼ਦ ਦੇ ਰੂਪ ਵਿੱਚ ਸਰਕਾਰ ਅਤੇ ਸਬੰਧਤ ਉੱਚ ਪ੍ਰਸ਼ਾਸਨਿਕ ਅਧਿਕਾਰੀਆਂ ਨਾਲ ਮੁਲਾਕਾਤ ਕਰਨਗੇ। ਉਹ ਸਰਕਾਰ ਅੱਗੇ ਸਾਂਝੀ ਅਪੀਲ ਰੱਖ ਕੇ ਇਸ ਲਟਕਦੇ ਮਸਲੇ ਲਈ ਬਜਟ ਅਤੇ ਮਨਜ਼ੂਰੀ ਪਹਿਲ ਦੇ ਆਧਾਰ ‘ਤੇ ਜਾਰੀ ਕਰਵਾਉਣਗੇ, ਤਾਂ ਜੋ ਨੌਜਵਾਨਾਂ ਨੂੰ ਇੱਕ ਸੁਚੱਜੀ ਅਤੇ ਵਧੀਆ ਖੇਡ ਗਰਾਊਂਡ ਜਲਦ ਸਮਰਪਿਤ ਕੀਤੀ ਜਾ ਸਕੇ।ਰਾਜਨੀਤਿਕ ਆਗੂਆਂ ਵੱਲੋਂ ਵੋਟਾਂ ਦੀ ਰਾਜਨੀਤੀ ਤੋਂ ਪਰੇ ਹਟ ਕੇ ਦਿਖਾਈ ਗਈ ਇਸ ਮਿਸਾਲੀ ਸਾਂਝ ਅਤੇ ਅਗਾਂਹਵਧੂ ਸੋਚ ਦੀ ਸੇਵਾ ਸੋਸਾਇਟੀਆਂ, ਜਥੇਬੰਦੀਆਂ ਅਤੇ ਸਮੂਹ ਪਿੰਡ ਵਾਸੀਆਂ ਵੱਲੋਂ ਭਰਪੂਰ ਸ਼ਲਾਘਾ ਕੀਤੀ ਗਈ। ਗਰਾਊਂਡ ‘ਚ ਖੇਡਣ ਵਾਲੇ ਨੌਜਵਾਨਾਂ ਨੇ ਖੁਸ਼ੀ ਪ੍ਰਗਟਾਉਂਦਿਆਂ ਆਖਿਆ ਕਿ ਸਾਰੀਆਂ ਧਿਰਾਂ ਦੀ ਇਹ ਪਹਿਲਕਦਮੀ ਬਹੁਤ ਹੀ ਸ਼ਲਾਘਾਯੋਗ ਹੈ ਅਤੇ ਇਸ ਸਾਂਝੇ ਹੰਭਲੇ ਨਾਲ ਲੰਮੇ ਅਰਸੇ ਤੋਂ ਅਧੂਰੀ ਪਈ ਇਹ ਮੰਗ ਹੁਣ ਜਲਦ ਪੂਰੀ ਹੋਵੇਗੀ।