ਪੇਪਰ ਲੀਕ ਅਤੇ ਵਿਦਿਆਰਥੀਆਂ ‘ਤੇ ਪੁਲਿਸ ਜਬਰ ਦੇਸ਼ ਦੇ ਭਵਿੱਖ ‘ਤੇ ਹਮਲਾ: ਡਾ. ਸਨੀ ਸਦਿਉੜਾ। 

ਧਨੌਲਾ: 23 ਜੁਲਾਈ (ਹਰਦੀਪ ਹੈਰੀ) =ਦੇਸ਼ ਵਿੱਚ ਲਗਾਤਾਰ ਹੋ ਰਹੇ ਪੇਪਰ ਲੀਕ ਮਾਮਲਿਆਂ ਅਤੇ ਦਿੱਲੀ ਵਿੱਚ ਇਨਸਾਫ਼ ਮੰਗ ਰਹੇ ਮਾਸੂਮ ਵਿਦਿਆਰਥੀਆਂ ‘ਤੇ ਹੋਏ ਪੁਲਿਸੀਆ ਜਬਰ ‘ਤੇ ਡੂੰਘੀ ਚਿੰਤਾ ਪ੍ਰਗਟਾਉਂਦਿਆਂ ਪ੍ਰਦੇਸ਼ ਕਾਂਗਰਸ ਦੇ ਸਾਬਕਾ ਸਕੱਤਰ ਡਾ. ਸਨੀ ਸਦਿਉੜਾ ਨੇ ਕੇਂਦਰ ਸਰਕਾਰ ਅਤੇ ਪ੍ਰਸ਼ਾਸਨ ‘ਤੇ ਤਿੱਖੇ ਨਿਸ਼ਾਨੇ ਸਾਧੇ ਹਨ।ਧਨੌਲਾ ਵਿਖੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਡਾ. ਸਦਿਉੜਾ ਨੇ ਕਿਹਾ ਕਿ ਇੱਥੇ ਸਿਰਫ਼ ਪੇਪਰ ਲੀਕ ਨਹੀਂ ਹੋ ਰਹੇ, ਸਗੋਂ ਲੱਖਾਂ ਹੋਣਹਾਰ ਨੌਜਵਾਨਾਂ ਦਾ ਪੂਰੇ ਸਿੱਖਿਆ ਤੰਤਰ ਅਤੇ ਇਨਸਾਫ਼ ਪ੍ਰਣਾਲੀ ਤੋਂ ਭਰੋਸਾ ਲੀਕ ਹੋ ਰਿਹਾ ਹੈ। ਦਿਨ-ਰਾਤ ਮਿਹਨਤ ਕਰਨ ਵਾਲੇ ਸਾਡੇ ਧੀ-ਪੁੱਤਾਂ ਦੇ ਸੁਪਨਿਆਂ ਨੂੰ ਸਰਕਾਰੀ ਨਾਕਾਮੀ ਦੀ ਬਲੀ ਚਾੜ੍ਹਿਆ ਜਾ ਰਿਹਾ ਹੈ।ਦਿੱਲੀ ਪੁਲਿਸ ਦੀ ਕਾਰਵਾਈ ਦੀ ਨਿੰਦਾ ਕਰਦਿਆਂ ਉਨ੍ਹਾਂ ਕਿਹਾ ਕਿ 15-16 ਸਾਲ ਦੇ ਮਾਸੂਮ ਬੱਚਿਆਂ ‘ਤੇ ਹੋਏ ਲਾਠੀਚਾਰਜ ਨੇ ਹਾਕਮਾਂ ਦਾ ਜ਼ਾਲਮਾਨਾ ਚਿਹਰਾ ਨੰਗਾ ਕਰ ਦਿੱਤਾ ਹੈ। ਪਰ ਜ਼ੁਲਮ ਨਾਲ ਜਵਾਨੀ ਦੀ ਆਵਾਜ਼ ਨਹੀਂ ਦੱਬੀ ਜਾ ਸਕਦੀ, ਇਸ ਤੱਸ਼ਦਦ ਨੇ ਬੱਚਿਆਂ ਦੇ ਮਨਾਂ ‘ਚੋਂ ਸਰਕਾਰੀ ਖ਼ੌਫ਼ ਖ਼ਤਮ ਕਰ ਦਿੱਤਾ ਹੈ।ਉਨ੍ਹਾਂ ਜ਼ੋਰਦਾਰ ਸ਼ਬਦਾਂ ਵਿੱਚ ਕਿਹਾ:”ਸਿਰਫ਼ ਪਰਚੇ ਨਹੀਂ ਲੀਕ ਹੋਏ, ਲੀਕ ਹੋਇਆ ਹੈ ਨੌਜਵਾਨਾਂ ਦਾ ਵਿਸ਼ਵਾਸ! ਜਿਸ ਦਿਨ ਜੁਆਨੀ ਦੇ ਮਨਾਂ ‘ਚੋਂ ਡਰ ਮੁੱਕ ਜਾਵੇ, ਉਸ ਦਿਨ ਇਨਕਲਾਬ ਦਾ ਜਨਮ ਹੁੰਦਾ ਹੈ—ਹੁਣ ਇਹ ਰੋਸ਼ ਵੱਡਾ ਸੈਲਾਬ ਬਣ ਕੇ ਸੜਕਾਂ ‘ਤੇ ਉਤਰੇਗਾ।” ਡਾ. ਸਦਿਉੜਾ ਨੇ ਮੰਗ ਕੀਤੀ ਕਿ ਪੇਪਰ ਲੀਕ ਦੇ ਦੋਸ਼ੀਆਂ ਅਤੇ ਵਿਦਿਆਰਥੀਆਂ ‘ਤੇ ਤਸ਼ੱਦਦ ਢਾਹੁਣ ਵਾਲੇ ਪੁਲਿਸ ਅਧਿਕਾਰੀਆਂ ‘ਤੇ ਤੁਰੰਤ ਸਖ਼ਤ ਕਾਰਵਾਈ ਕੀਤੀ ਜਾਵੇ, ਨਹੀਂ ਤਾਂ ਦੇਸ਼ ਦਾ ਨੌਜਵਾਨ ਆਰ-ਪਾਰ ਦੀ ਲੜਾਈ ਲੜਨ ਲਈ ਮਜਬੂਰ ਹੋਵੇਗਾ।