ਮੁਕਤੀਧਾਮ ਸ਼ਿਵ ਮੰਦਿਰ ਵਿਖੇ ਸਾਵਣ ਦੀ ਸ਼ਿਵਰਾਤਰੀ ਸ਼ਰਧਾ-ਭਾਵਨਾ ਨਾਲ ਮਨਾਈ

ਮਾਛੀਵਾੜਾ ਸਾਹਿਬ, 11 ਅਗਸਤ (ਸੁੱਚਾ ਬੰਗੜ) -ਭਗਵਾਨ ਭੋਲੇਨਾਥ ਦੀ ਆਰਾਧਨਾ ਦੇ ਪਵਿੱਤਰ ਮਹੀਨੇ ਸਾਵਣ ਦੀ ਸ਼ਿਵਰਾਤਰੀ ਸ਼ਹਿਰ ਨਜ਼ਦੀਕ ਮਾਲਵਾ ਚੌਂਕ ਸਥਿਤ ਸ਼੍ਰੀ ਮੁਕਤੀਧਾਮ ਸ਼ਿਵ ਮੰਦਿਰ ਵਿਖੇ ਬੜੀ ਸ਼ਰਧਾ ਅਤੇ ਧੂਮਧਾਮ ਨਾਲ ਮਨਾਈ ਗਈ। ਪ੍ਰਬੰਧਕ ਕਮੇਟੀ ਵੱਲੋਂ ਸਥਾਨਕ ਸੰਗਤਾਂ ਦੇ ਸਹਿਯੋਗ ਨਾਲ ਇਸ ਦਿਹਾੜੇ ਨੂੰ ਉਤਸ਼ਾਹਪੂਰਵਕ ਮਨਾਇਆ ਗਿਆ।ਇਸ ਮੌਕੇ ਮੰਦਿਰ ਵਿੱਚ ਸਥਾਪਿਤ ਨਰਮਦੇਸ਼ਵਰ ਸ਼ਿਵਲਿੰਗ ਦਾ ਮਰਿਆਦਾ ਅਨੁਸਾਰ ਰੁਦਰਾਭਿਸ਼ੇਕ ਕੀਤਾ ਗਿਆ। ਪੂਜਾ-ਅਰਚਨਾ ਤੋਂ ਬਾਅਦ ਸਾਰੀ ਸੰਗਤ ਨੇ ਭਗਵਾਨ ਸ਼ਿਵ ਅੱਗੇ ਅਰਦਾਸ ਕੀਤੀ। ਮੰਦਿਰ ਦੇ ਪੁਜਾਰੀ  ਪ੍ਰਵੇਸ਼ ਭਾਰਦਵਾਜ ਵੱਲੋਂ ਸੰਗਤਾਂ ਨਾਲ ਹਵਨ-ਯੱਗ ਕਰਵਾਇਆ ਗਿਆ ਅਤੇ ਸੰਸਾਰ ਦੀ ਭਲਾਈ ਲਈ ਪ੍ਰਾਰਥਨਾ ਕੀਤੀ ਗਈ। ਇਸ ਪਵਿੱਤਰ ਦਿਹਾੜੇ ‘ਤੇ ਸੰਗਤਾਂ ਲਈ ਮਿੱਠੇ ਚਾਵਲਾਂ ਦੇ ਲੰਗਰ ਦਾ ਪ੍ਰਬੰਧ ਕੀਤਾ ਗਿਆ। ਲੰਗਰ ਵਿੱਚ ਮੰਦਿਰ ਦੇ ਸ਼ਰਧਾਲੂਆਂ ਤੋਂ ਇਲਾਵਾ ਲੰਘਣ ਵਾਲੇ ਮੁਸਾਫ਼ਰਾਂ ਨੇ ਵੀ ਪ੍ਰਸ਼ਾਦ ਛਕਿਆ।ਸ਼ਰਧਾਲੂਆਂ ਨੇ ਕਿਹਾ ਕਿ ਮੁਕਤੀਧਾਮ ਮੰਦਿਰ ਵਿੱਚ ਵਿਰਾਜਮਾਨ ਨਰਮਦੇਸ਼ਵਰ ਸ਼ਿਵਲਿੰਗ ਹਿੰਦੂ ਧਰਮ ਦੀ ਆਸਥਾ ਦਾ ਪ੍ਰਮੁੱਖ ਕੇਂਦਰ ਹੈ। ਇਸ ਦੀ ਪੂਜਾ ਨਾਲ ਮਨ ਨੂੰ ਸ਼ਾਂਤੀ, ਸੁੱਖ ਅਤੇ ਅਧਿਆਤਮਿਕ ਬਲ ਦੀ ਪ੍ਰਾਪਤੀ ਹੁੰਦੀ ਹੈ। ਇਸ ਮੌਕੇ ਕਮੇਟੀ ਪ੍ਰਧਾਨ ਪਵਨ ਅਰੋੜਾ ਅਤੇ ਲੰਗਰ ਦੇ ਸਹਿਯੋਗੀ ਸ੍ਰੀ ਮੋਹਿਤ ਜੈਨ ਨੇ ਪਹੁੰਚੀਆਂ ਸੰਗਤਾਂ ਦਾ ਧੰਨਵਾਦ ਕੀਤਾ। ਇਸ ਦੌਰਾਨ  ਪਵਨ ਬਤਰਾ ਸਮੇਤ ਕਈ ਪ੍ਰਮੁੱਖ ਸ਼ਖਸੀਅਤਾਂ ਵੀ ਮੌਜੂਦ ਸਨ।