ਸੁਲਤਾਨਪੁਰ ਲੋਧੀ ਤੋਂ ਵਿਧਾਇਕ ਰਾਣਾ ਇੰਦਰ ਪ੍ਰਤਾਪ ਸਿੰਘ ਨੇ ਵਿਧਾਨ ਸਭਾ ਚ ਵੱਡਾ ਮੁੱਦਾ ਚੁੱਕਿਆ ਆਮ ਲੋਕਾਂ ਨਾਲ ਜੁੜਿਆ ਹੋਇਆ

ਫੱਤੂਢੀਗਾ 8 ਅਗਸਤ ਕੁਲਵਿੰਦਰ ਸਿੰਘ ਪੰਜਾਬ ਦੇ ਜਿਮੀਂਦਾਰਾਂ ਅਤੇ ਆਮ ਲੋਕਾਂ ਦਾ ਇੱਕ ਬਹੁਤ ਵੱਡਾ ਮਸਲਾ ਅੱਜ ਵਿਧਾਨ ਸਭਾ ਵਿੱਚ ਮੈਂ ਸਰਕਾਰ ਦੇ ਧਿਆਨ ਵਿੱਚ ਲਿਆਂਦਾ ਹੈ ਅਤੇ ਇਸ ਦੇ ਪੱਕੇ ਹੱਲ ਦੀ ਮੰਗ ਕੀਤੀ । ਪਿੰਡਾਂ ਦੇ ਵਿੱਚ ਜ਼ਮੀਨਾਂ ਦੀ ਤਕਸੀਮ (ਵੰਡ) ਨਾ ਹੋਣ ਕਾਰਨ ਲੋਕਾਂ ਨੂੰ ਬੈਂਕ ਲੋਨ ਲੈਣ ਵਿੱਚ ਬੜੀ ਵੱਡੀ ਸਮੱਸਿਆ ਆ ਰਹੀ ਹੈ। ਮੈਂ ਮੰਗ ਕੀਤੀ ਹੈ ਕਿ ਰੈਵੀਨਿਊ ਵਿਭਾਗ ਵੱਲੋਂ ਇੱਕ ਸਟੈਂਡਰਡ ਓਪਰੇਟਿੰਗ ਗਾਈਡਲਾਈਨਜ਼ ਬਣਾ ਕੇ ਦਿੱਤੀ ਜਾਵੇ, ਤਾਂ ਜੋ ਜਿਹੜਾ ਵਿਅਕਤੀ ਜਿਸ ਖਾਸ ਖਸਰੇ ਜਾਂ ਨੰਬਰ ਵਿੱਚ ਬੈਠਾ ਹੈ, ਬੈਂਕਾਂ ਨੂੰ ਸੂਚਿਤ ਕਰਕੇ ਉਸ ਦਾ ਚਾਰਜ ਉਸੇ ਨੰਬਰ ‘ਤੇ ਲਗਾਇਆ ਜਾ ਸਕੇ।ਦੂਜਾ ਵੱਡਾ ਮਸਲਾ ਸ਼ਹਿਰੀਕਰਨ ਨਾਲ ਜੁੜਿਆ ਹੈ। ਸ਼ਹਿਰ ਅਤੇ ਇੰਡਸਟਰੀ ਵਧਣ ਕਾਰਨ ਅੱਜ ਇੱਕ-ਇੱਕ ਨੰਬਰ ਦੇ ਵਿੱਚ ਦੋ-ਦੋ ਸੌ ਲੋਕ ਬੈਠੇ ਹਨ। ਇਸ ਕਾਰਨ ਜੇਕਰ ਕਿਸੇ ਇੱਕ ਵਿਅਕਤੀ ਨੇ ਆਪਣੀ 25 ਰੁਪਏ ਦੀ ਫਰਦ ਲੈਣੀ ਹੋਵੇ, ਤਾਂ ਉਸ ਨੂੰ ਪੂਰੇ ਖਾਤੇ ਦੇ ਢਾਈ ਸੌ ਪੇਜ ਕਢਵਾਉਣੇ ਪੈਂਦੇ ਹਨ, ਜਿਸ ਨਾਲ ਲੋਕਾਂ ਦਾ ਪੰਜ ਹਜ਼ਾਰ ਰੁਪਿਆ ਫਰਦ ਲੈਣ ‘ਤੇ ਹੀ ਖ਼ਰਚ ਹੋ ਜਾਂਦਾ ਹੈ। ਮੈਂ ਸਰਕਾਰ ਨੂੰ ਬੇਨਤੀ ਕੀਤੀ ਹੈ ਕਿ ਚੰਡੀਗੜ੍ਹ ਦੇ ਕੋਠੀ ਨੰਬਰ ਸਿਸਟਮ ਵਾਂਗ ਅਜਿਹੇ ਨੰਬਰਾਂ ਨੂੰ ਵੀ ਵੱਖਰੇ ਸਬ-ਨੰਬਰ ਦਿੱਤੇ ਜਾਣ ਤਾਂ ਜੋ ਲੋਕਾਂ ਨੂੰ ਇਸ ਵੱਡੀ ਖੱਜਲ-ਖੁਆਰੀ ਤੋਂ ਰਾਹਤ ਮਿਲ ਸਕੇ। ਇਸ ਸਬੰਧੀ ਮਾਲ ਵਿਭਾਗ ਵੱਲੋਂ ਤੁਰੰਤ ਇੱਕ ਯੋਗ ਐਸ.ਓ.ਪੀ. ਜਾਰੀ ਕੀਤੀ ਜਾਣੀ ਚਾਹੀਦੀ ਹੈ।