ਹਲਕਾ ਬਲਾਚੌਰ ਦੀ ਧੀ ਸ਼ਰੂਤੀ ਚੌਧਰੀ ਨੇ ਹਾਕੀ ਦੇ ਮੈਦਾਨ ਵਿੱਚ ਬੁਲੰਦੀਆਂ ਛੂਹ ਕੇ ਇਲਾਕੇ ਦਾ ਨਾਂ ਕੀਤਾ ਰੌਸ਼ਨ

ਬਲਾਚੌਰ, 12 ਅਗਸਤ (ਜਤਿੰਦਰਪਾਲ ਸਿੰਘ ਕਲੇਰ) : ਹਲਕਾ ਬਲਾਚੌਰ ਦੇ ਪਿੰਡ ਚੰਦਿਆਣੀ ਖੁਰਦ ਦੀ ਹੋਣਹਾਰ ਧੀ ਸ਼ਰੂਤੀ ਚੌਧਰੀ ਨੇ ਹਾਕੀ ਦੇ ਮੈਦਾਨ ਵਿੱਚ ਆਪਣੀ ਮਿਹਨਤ, ਲਗਨ, ਅਨੁਸ਼ਾਸਨ ਅਤੇ ਖੇਡ ਪ੍ਰਤੀ ਜਜ਼ਬੇ ਨਾਲ ਇੱਕ ਵੱਖਰੀ ਪਹਿਚਾਣ ਬਣਾਈ ਹੈ।ਇਸ ਸਬੰਧੀ ਜਾਣਕਾਰੀ ਦਿੰਦੇ ਸ਼ਰੂਤੀ ਦੇ ਮਾਮਾ ਮਾਸਟਰ ਗਿਆਨ ਸਿੰਘ ਨਿੱਘੀ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਸ਼ਰੂਤੀ ਦੀ ਇਸ ਸ਼ਾਨਦਾਰ ਕਾਮਯਾਬੀ ਪਿੱਛੇ ਉਸ ਦੀ ਆਪਣੀ ਸਖ਼ਤ ਮਿਹਨਤ ਦੇ ਨਾਲ-ਨਾਲ ਮਾਤਾ ਬੀਨਾ ਰਾਣੀ ਅਤੇ ਪਿਤਾ ਸਰਬਜੀਤ ਚੌਧਰੀ ਦਾ ਵੀ ਵੱਡਾ ਯੋਗਦਾਨ ਹੈ। ਮਾਪਿਆਂ ਵੱਲੋਂ ਧੀ ਨੂੰ ਦਿੱਤੇ ਹੌਂਸਲੇ, ਸਹਿਯੋਗ ਅਤੇ ਉਸ ਦੇ ਸੁਪਨਿਆਂ ਉੱਤੇ ਵਿਸ਼ਵਾਸ ਨੇ ਹੀ ਉਸ ਨੂੰ ਅੱਗੇ ਵਧਣ ਦੀ ਵੱਡੀ ਤਾਕਤ ਦਿੱਤੀ ਹੈ।ਖੇਡਾਂ ਦੇ ਮੈਦਾਨ ਵਿੱਚ ਪਿੰਡ ਦੀ ਧੀ ਦਾ ਅੱਗੇ ਵਧਣਾ ਨਾ ਸਿਰਫ਼ ਪਰਿਵਾਰ ਲਈ, ਸਗੋਂ ਪੂਰੇ ਪਿੰਡ, ਇਲਾਕੇ ਅਤੇ ਹਲਕਾ ਬਲਾਚੌਰ ਲਈ ਬਹੁਤ ਮਾਣ ਵਾਲੀ ਗੱਲ ਹੈ। ਸ਼ਰੂਤੀ ਦੀ ਇਹ ਮਿਹਨਤ ਅੱਜ ਬਲਾਚੌਰ ਦੀਆਂ ਹੋਰ ਧੀਆਂ ਲਈ ਵੀ ਇੱਕ ਵੱਡੀ ਪ੍ਰੇਰਣਾ ਬਣ ਰਹੀ ਹੈ।ਇਲਾਕਾ ਨਿਵਾਸੀਆਂ ਨੇ ਸ਼ਰੂਤੀ ਦੇ ਮਾਤਾ ਬੀਨਾ ਰਾਣੀ ਅਤੇ ਪਿਤਾ ਸਰਬਜੀਤ ਚੌਧਰੀ ਨੂੰ ਧੀ ਦੀ ਇਸ ਪ੍ਰਾਪਤੀ ਉੱਤੇ ਉਚੇਚੇ ਤੌਰ ਉੱਤੇ ਵਧਾਈ ਦਿੱਤੀ। ਸਭ ਨੇ ਅਰਦਾਸ ਕੀਤੀ ਕਿ ਸ਼ਰੂਤੀ ਇਸੇ ਤਰ੍ਹਾਂ ਮਿਹਨਤ ਕਰਦੀ ਰਹੇ, ਵੱਡੀਆਂ ਮੰਜ਼ਿਲਾਂ ਹਾਸਲ ਕਰੇ ਅਤੇ ਇੱਕ ਦਿਨ ਭਾਰਤੀ ਹਾਕੀ ਟੀਮ ਦਾ ਹਿੱਸਾ ਬਣ ਕੇ ਦੇਸ਼ ਦੀ ਨੁਮਾਇੰਦਗੀ ਕਰਨ ਦਾ ਆਪਣਾ ਅਤੇ ਇਲਾਕੇ ਦਾ ਸੁਪਨਾ ਪੂਰਾ ਕਰੇ।