ਲੋਕ ਹਿੱਤ ਮਿਸ਼ਨ ਵੱਲੋਂ ਮਾਜਰੀ ਬਲਾਕ ਦਫ਼ਤਰ ਵਿਖੇ ਬੰਦ ਪਈ ਲਾਈਟ ਦੀ ਸਪਲਾਈ ਚਾਲੂ ਕਰਨ ਲਈ ਦੋ ਦਿਨ ਦਾ ਅਲਟੀਮੇਟਮ

ਨਿਊ ਚੰਡੀਗੜ੍ਹ, 21 ਜੁਲਾਈ (ਬਜੀਦਪੁਰ) – ਲੋਕ ਹਿੱਤ ਮਿਸ਼ਨ ਬੀਕੇਯੂ ਪੰਜਾਬ ਨੇ ਮਾਜਰੀ ਬਲਾਕ ਸਥਿਤ ਪਟਵਾਰ ਦਫ਼ਤਰ ਵਿਖੇ ਬੰਦ ਪਈ ਲਾਈਟ ਦੀ ਸਪਲਾਈ ਚਾਲੂ ਕਰਨ ਲਈ ਦੋ ਦਿਨ ਦਾ ਅਲਟੀਮੇਟਮ ਦਿੱਤਾ ਹੈ। ਇਸ ਸਬੰਧੀ ਮਾਜਰੀ ਬਲਾਕ ਵਿਖੇ ਬੰਦ ਪਈ ਲਾਈਟ ਕਾਰਨ ਲੋਕਾਂ ਦੀ ਖੱਜਲ ਖੁਆਰੀ ਨੂੰ ਲੈ ਕੇ ਪਟਵਾਰ ਦਫ਼ਤਰ ਤੇ ਸੁਵਿਧਾ ਕੇਂਦਰ ਦਾ ਦੌਰਾ ਕਰਦਿਆਂ ਮਿਸ਼ਨ ਆਗੂ ਗੁਰਮੀਤ ਸਿੰਘ ਸਾਂਟੂ, ਰਵਿੰਦਰ ਸਿੰਘ ਬਜੀਦਪੁਰ, ਭਗਤ ਸਿੰਘ ਭਗਤਮਾਜਰਾ, ਪਰਮਜੀਤ ਸਿੰਘ ਪੰਮੀ ਮਾਵੀ ਨੇ ਕਿਹਾ ਕਿ ਮਾਲ ਵਿਭਾਗ ਵੱਲੋਂ ਬਿਜਲੀ ਬਿੱਲ ਨਾ ਉਤਾਰਨ ਕਾਰਨ ਕਈ ਲੱਖ ਰੁਪਇਆ ਜਮਾਂ ਹੋ ਗਿਆ। ਇਸ ਦੌਰਾਨ ਚਿੱਪ ਵਾਲਾ ਮੀਟਰ ਲੱਗਣ ਤੋਂ ਬਾਅਦ ਲਾਈਟ ਸਪਲਾਈ ਬੰਦ ਹੋ ਗਈ। ਇਸਨੂੰ ਇੱਕ ਹਫ਼ਤੇ ਬੀਤ ਜਾਣ ਤੇ ਵੀ ਮਾਲ ਵਿਭਾਗ ਦੇ ਸਥਾਨਿਕ ਸਬੰਧਿਤ ਅਧਿਕਾਰੀਆਂ ਨੇ ਬਿਜਲੀ ਸਪਲਾਈ ਲਈ ਬਿਜਲੀ ਵਿਭਾਗ ਨਾਲ ਮਿਲਕੇ ਇਸ ਸਮੱਸਿਆ ਦਾ ਕੋਈ ਹੱਲ ਨਹੀਂ ਕੱਢਿਆ। ਜਿਸ ਕਾਰਨ ਕੰਮ ਕਾਰਾਂ ਲਈ ਆਉਣ ਵਾਲੇ ਲੋਕ ਇਸ ਪ੍ਰੇਸ਼ਾਨੀ ਕਾਰਨ ਖਾਲੀ ਘਰ ਨੂੰ ਮੁੜ ਮੁੜਕੇ ਜਾ ਰਹੇ ਹਨ। ਇਨ੍ਹਾਂ ਆਗੂਆਂ ਨੇ ਕਿਹਾ ਕਿ ਜੇਕਰ ਤਹਿਸੀਲ ਦਫ਼ਤਰ ਵੱਲੋਂ ਇਸ ਮੁਸ਼ਕਿਲ ਦਾ ਹੱਲ ਨਾ ਕੀਤਾ ਗਿਆ ਤਾਂ ਮਿਸ਼ਨ ਵੱਲੋਂ ਤਹਿਸੀਲ ਦਫ਼ਤਰ ਅੱਗੇ ਧਰਨਾ ਲਗਾਇਆ ਜਾਵੇਗਾ। ਇਸ ਮੌਕੇ ਬਲਵਿੰਦਰ ਸਿੰਘ ਰੰਗੂਆਣਾ, ਸਰਬਜੀਤ ਸਿੰਘ ਸੰਗਤਪੁਰਾ, ਰਜਿੰਦਰ ਸਿੰਘ ਮਾਜਰਾ ਤੇ ਅਵਤਾਰ ਸਿੰਘ ਹੁਸ਼ਿਆਰਪੁਰ ਆਦਿ ਵੀ ਹਾਜ਼ਰ ਸਨ।