ਵੰਦੇ ਭਾਰਤ ਐਕਸਪ੍ਰੈਸ 26405 ਵਿੱਚ ਕਥਿਤ ਭ੍ਰਿਸ਼ਟਾਚਾਰ ਦਾ ਪਰਦਾਫਾਸ਼  ਅਟੈਂਡੈਂਟ ਵੱਲੋਂ ਨਕਦ ਰਕਮ ਲੈ ਕੇ ਬਿਨਾਂ ਰਸੀਦ ਯਾਤਰਾ ਕਰਵਾਉਣ ਦੇ ਦੋਸ਼, ਰੇਲਵੇ ਨੇ ਜਾਂਚ ਦੇ ਦਿੱਤੇ ਹੁਕਮ

ਅੰਮ੍ਰਿਤਸਰ 10 ਜੁਲਈ ( ਮਨਜੀਤ ਸਿੰਘ ਸ਼ੇਰਗਿੱਲ ) ਅੰਮ੍ਰਿਤਸਰ ਤੋਂ ਸ਼੍ਰੀ ਮਾਤਾ ਵੈਸ਼ਨੋ ਦੇਵੀ ਕੱਟੜਾ ਤੱਕ ਚੱਲਣ ਵਾਲੀ ਵੰਦੇ ਭਾਰਤ ਐਕਸਪ੍ਰੈਸ (ਟ੍ਰੇਨ ਨੰਬਰ 26405) ਵਿੱਚ ਕਥਿਤ ਭ੍ਰਿਸ਼ਟਾਚਾਰ ਦਾ ਇੱਕ ਗੰਭੀਰ ਮਾਮਲਾ ਸਾਹਮਣੇ ਆਇਆ ਹੈ। ਦੋਸ਼ ਹੈ ਕਿ ਟ੍ਰੇਨ ਦੇ ਇੱਕ ਅਟੈਂਡੈਂਟ ਨੇ ਇੱਕ ਯਾਤਰੀ ਤੋਂ ਨਕਦ ਰਕਮ ਲੈ ਕੇ ਉਸ ਨੂੰ ਬਿਨਾਂ ਕਿਸੇ ਅਧਿਕਾਰਤ ਰੇਲਵੇ ਟਿਕਟ ਜਾਂ ਰਸੀਦ ਦੇ ਯਾਤਰਾ ਕਰਵਾਈ, ਜਿਸ ਨਾਲ ਰੇਲਵੇ ਦੇ ਨਿਯਮਾਂ ਦੀ ਪਾਲਣਾ ‘ਤੇ ਸਵਾਲ ਖੜ੍ਹੇ ਹੋ ਗਏ ਹਨ।ਪ੍ਰਾਪਤ ਜਾਣਕਾਰੀ ਅਨੁਸਾਰ, ਇਸ ਮਾਮਲੇ ਦੀ ਸੱਚਾਈ ਦੀ ਪੁਸ਼ਟੀ ਕਰਨ ਲਈ ਇੱਕ ਪੱਤਰਕਾਰ ਨੂੰ ਅੰਮ੍ਰਿਤਸਰ ਤੋਂ ਪਠਾਨਕੋਟ ਤੱਕ ਯਾਤਰਾ ਲਈ ਭੇਜਿਆ ਗਿਆ। ਪੱਤਰਕਾਰ ਨੇ ਪਲੇਟਫਾਰਮ ‘ਤੇ ਇੱਕ ਅਟੈਂਡੈਂਟ ਨਾਲ ਸੰਪਰਕ ਕਰਕੇ ਦੱਸਿਆ ਕਿ ਐਮਰਜੈਂਸੀ ਕਾਰਨ ਉਸ ਨੂੰ ਤੁਰੰਤ ਯਾਤਰਾ ਕਰਨੀ ਹੈ ਪਰ ਉਸ ਕੋਲ ਰਿਜ਼ਰਵੇਸ਼ਨ ਟਿਕਟ ਨਹੀਂ ਹੈ। ਦੋਸ਼ ਹੈ ਕਿ ਅਟੈਂਡੈਂਟ ਨੇ ਕਿਹਾ ਕਿ ਉਹ ਟੀਟੀਈ ਨਾਲ ਗੱਲ ਕਰਕੇ ਪ੍ਰਬੰਧ ਕਰ ਦੇਵੇਗਾ।ਕੁਝ ਸਮੇਂ ਬਾਅਦ ਪੱਤਰਕਾਰ ਨੂੰ ਕੋਚ C-4 ਦੀ ਸੀਟ ਨੰਬਰ 75/76 ‘ਤੇ ਬਿਠਾ ਦਿੱਤਾ ਗਿਆ ਅਤੇ ਉਸ ਤੋਂ 550 ਰੁਪਏ ਨਕਦ ਲਏ ਗਏ। ਦੋਸ਼ ਹੈ ਕਿ ਇਸ ਰਕਮ ਦੇ ਬਦਲੇ ਨਾ ਤਾਂ ਕੋਈ ਰੇਲਵੇ ਟਿਕਟ ਜਾਰੀ ਕੀਤੀ ਗਈ ਅਤੇ ਨਾ ਹੀ ਕੋਈ ਅਧਿਕਾਰਤ ਰਸੀਦ ਦਿੱਤੀ ਗਈ।ਇਸ ਦੌਰਾਨ ਜਦੋਂ ਟੀਟੀਈ ਕੋਚ ਵਿੱਚ ਟਿਕਟ ਚੈਕਿੰਗ ਲਈ ਆਇਆ ਤਾਂ,  ਉਸ ਨੇ ਸਿਰਫ਼ ਯਾਤਰੀ ਦਾ ਨਾਮ ਪੁੱਛਿਆ ਅਤੇ ਨਾ ਟਿਕਟ ਦੀ ਮੰਗ ਕੀਤੀ ਅਤੇ ਨਾ ਹੀ ਕਿਸੇ ਕਿਸਮ ਦੀ ਵਾਧੂ ਕਿਰਾਇਆ ਵਸੂਲੀ ਕੀਤੀ। ਇਸ ਘਟਨਾ ਨੇ ਕਥਿਤ ਤੌਰ ‘ਤੇ ਅਟੈਂਡੈਂਟ ਅਤੇ ਟੀਟੀਈ ਵਿਚਕਾਰ ਮਿਲੀਭੁਗਤ ਦੇ ਸ਼ੱਕ ਨੂੰ ਹੋਰ ਮਜ਼ਬੂਤ ਕੀਤਾ ਹੈ।ਰੇਲਵੇ ਨਿਯਮ ਕੀ ਕਹਿੰਦੇ ਹਨ?ਭਾਰਤੀ ਰੇਲਵੇ ਦੇ ਨਿਯਮਾਂ ਅਨੁਸਾਰ, ਜੇ ਕੋਈ ਯਾਤਰੀ ਬਿਨਾਂ ਟਿਕਟ ਜਾਂ ਉਚਿਤ ਰਿਜ਼ਰਵੇਸ਼ਨ ਦੇ ਟ੍ਰੇਨ ਵਿੱਚ ਯਾਤਰਾ ਕਰਦਾ ਹੈ ਤਾਂ ਉਸ ਤੋਂ ਨਿਰਧਾਰਿਤ ਕਿਰਾਏ ਅਤੇ ਜੁਰਮਾਨੇ ਦੀ ਵਸੂਲੀ ਸਿਰਫ਼ ਅਧਿਕਾਰਤ ਟਿਕਟ ਚੈਕਿੰਗ ਸਟਾਫ (ਟੀਟੀਈ) ਵੱਲੋਂ ਕੀਤੀ ਜਾ ਸਕਦੀ ਹੈ ਅਤੇ ਇਸ ਦੇ ਬਦਲੇ  ਜਾਂ ਹੋਰ ਅਧਿਕਾਰਤ ਰਸੀਦ ਜਾਰੀ ਕਰਨਾ ਲਾਜ਼ਮੀ ਹੁੰਦਾ ਹੈ। ਕਿਸੇ ਵੀ ਰੇਲਵੇ ਕਰਮਚਾਰੀ ਵੱਲੋਂ ਨਕਦ ਰਕਮ ਲੈ ਕੇ ਬਿਨਾਂ ਰਸੀਦ ਯਾਤਰਾ ਦੀ ਆਗਿਆ ਦੇਣਾ ਨਿਯਮਾਂ ਦੇ ਉਲਟ ਹੈ ਅਤੇ ਅਨੁਸ਼ਾਸਨਾਤਮਕ ਕਾਰਵਾਈ ਦਾ ਆਧਾਰ ਬਣ ਸਕਦਾ ਹੈ।ਇਸ ਮਾਮਲੇ ਸਬੰਧੀ ਜਦੋਂ ਟੀਟੀਈ ਨਾਲ ਸੰਪਰਕ ਕੀਤਾ ਗਿਆ ਤਾਂ ਉਹ ਕੋਈ ਸੰਤੋਸ਼ਜਨਕ ਜਵਾਬ ਨਹੀਂ ਦੇ ਸਕੇ।ਇਸ ਤੋਂ ਬਾਅਦ ਸਾਰੇ ਮਾਮਲੇ ਦੀ ਲਿਖਤੀ ਸ਼ਿਕਾਇਤ ਅਤੇ ਉਪਲਬਧ ਸਬੂਤ ਜੰਮੂ ਡਿਵੀਜ਼ਨ ਦੇ ਸੀਨੀਅਰ ਡਿਵੀਜ਼ਨਲ ਕਮਰਸ਼ੀਅਲ ਮੈਨੇਜਰ  ਨੂੰ ਭੇਜੇ ਗਏ। ਸ਼ਿਕਾਇਤ ਦੇ ਆਧਾਰ ‘ਤੇ ਸੀਐਮਆਈ ਦੀਪਕ ਕੁਮਾਰ ਨੂੰ ਜਾਂਚ ਸੌਂਪੀ ਗਈ ਹੈ।ਸੀਐਮਆਈ ਦੀਪਕ ਕੁਮਾਰ ਨੇ ਦੱਸਿਆ ਕਿ ਪਹਿਲੀ ਨਜ਼ਰ ਵਿੱਚ ਮਾਮਲਾ ਗੰਭੀਰ ਪ੍ਰਤੀਤ ਹੁੰਦਾ ਹੈ। ਉਨ੍ਹਾਂ ਕਿਹਾ ਕਿ ਟ੍ਰੇਨ ਵਿੱਚ ਲੱਗੇ ਸੀਸੀਟੀਵੀ ਕੈਮਰਿਆਂ ਦੀ ਫੁਟੇਜ, ਹੋਰ ਸਬੂਤ ਅਤੇ ਸੰਬੰਧਿਤ ਪੱਤਰਕਾਰ ਦੇ ਬਿਆਨ ਦੇ ਆਧਾਰ ‘ਤੇ ਵਿਸਥਾਰਪੂਰਵਕ ਜਾਂਚ ਕੀਤੀ ਜਾਵੇਗੀ। ਜੇਕਰ ਦੋਸ਼ ਸਾਬਤ ਹੁੰਦੇ ਹਨ ਤਾਂ ਸੰਬੰਧਿਤ ਕਰਮਚਾਰੀਆਂ ਖ਼ਿਲਾਫ਼ ਰੇਲਵੇ ਨਿਯਮਾਂ ਅਨੁਸਾਰ ਬਣਦੀ ਕਾਰਵਾਈ ਅਮਲ ਵਿੱਚ ਲਿਆਂਦੀ ਜਾਵੇਗੀ।