Manpreet Singh
ਸਰਾਏ ਅਮਾਨਤ ਖਾਂ/ਝਬਾਲ, ਜੂਨ (ਗੁਰਸ਼ਰਨ ਸਿੰਘ ਔਲਖ)-ਬੀਤੇ ਦਿਨੀਂ ਝਬਾਲ ਦੇ ਖੇਡ ਸਟੇਡੀਅਮ ਵਿੱਚ ਸ਼ਰੇਆਮ ਨਸ਼ੇ ਵੇਚਣ ਤੇ ਖ੍ਰੀਦਣ ਦੀ ਵੀਡੀਓ ਵਾਇਰਲ ਹੋਣ ਤੋਂ ਬਾਦ ਅੱਜ ਜਿਲਾ ਪੁਲਿਸ ਵਲੋਂ ਐਸ ਪੀ (ਸਿਟੀ) ਡਾਕਟਰ ਰਿਪੂਤਾਪਨ ਸਿੰਘ ਦੀ ਅਗਵਾਈ ਵਿੱਚ “ਕਾਸੋ” ਅਪ੍ਰੇਸ਼ਨ ਤਹਿਤ ਸਰਚ ਅਭਿਆਨ ਚਲਾਇਆ ਗਿਆ। ਜਿਸ ਦੌਰਾਨ ਝਬਾਲ ਦੀਆਂ ਨਸ਼ਾ ਵੇਚਣ ਵਿੱਚ ਬਦਨਾਮ ਗਲੀਆਂ ਵਿੱਚ ਘਰਾਂ ਦੀ ਤਲਾਸ਼ੀ ਲਈ ਗਈ। ਇਸ “ਕਾਸੋ” ਅਪ੍ਰੇਸ਼ਨ ਦੀ ਭਿਣਕ ਲੱਗਦੇ ਨਸ਼ਾ ਤਸਕਰ ਆਪਣੇ ਘਰਾਂ ਨੂੰ ਜਿੰਦਰੇ ਮਾਰ ਕੇ ਘਰੋਂ ਰਫੂਚੱਕਰ ਹੋ ਗਏ। ਪੁਲਿਸ ਨੇ ਗਲੀਆਂ ਵਿੱਚ ਆਉਣ ਜਾਣ ਵਾਲੇ ਲੋਕਾਂ ਦੀ ਤਲਾਸ਼ੀ ਲਈ ਗਈ ਅਤੇ ਵਾਹਨਾਂ ਦੇ ਕਾਗਜਾਤ ਚੈੱਕ ਕੀਤੇ ਗਏ। ਇਸ ਮੌਕੇ ਐਸ ਪੀ (ਸਿਟੀ) ਡਾਕਟਰ ਰਿਪੂਤਾਪਨ ਸਿੰਘ ਨੇ ਦੱਸਿਆ ਕਿ ਬੀਤੇ ਦਿਨ ਝਬਾਲ ਦੇ ਖੇਡ ਸਟੇਡੀਅਮ ਵਿੱਚ ਇੱਕ ਨਸ਼ਾ ਤਸਕਰ ਵਲੋਂ ਨਸ਼ਾ ਵੇਚਣ ਤੇ ਖ੍ਰੀਦਣ ਦੀ ਵੀਡੀਓ ਵਾਇਰਲ ਹੋਈ ਸੀ ਅਤੇ ਪੰਜਾਬ ਸਰਕਾਰ ਵਲੋਂ ਜੋ “ਯੁੱਧ ਨਸ਼ਿਆਂ ਵਿਰੁੱਧ” ਮੁਹਿੰਮ ਚਲਾਈ ਗਈ ਹੈ ਉਸ ਦੇ ਤਹਿਤ ਅੱਜ ਇੱਥੇ ਸਰਚ ਚਲਾਇਆ ਗਿਆ ਹੈ।ਉਨਾਂ ਇਹ ਵੀ ਕਿਹਾ ਕਿ ਅੱਜ ਝਬਾਲ ਪੁਲਿਸ ਵਲੋਂ ਐਕਟਿਵਾ ਸਵਾਰ ਦੋ ਨੌਜੁਆਨਾਂ ਨੂੰ 12 ਗ੍ਰਾਮ ਹੈਰੋਇਨ ਸਮੇਤ ਕਾਬੂ ਕੀਤਾ ਹੈ ਜਿੰਨਾਂ ਦੀ ਪਛਾਣ ਗਗਨਦੀਪ ਸਿੰਘ ਪੁੱਤਰ ਅਵਤਾਰ ਸਿੰਘ ਅਤੇ ਵਿਜੇਪਾਲ ਸਿੰਘ ਪੁੱਤਰ ਨਰਿੰਦਰ ਸਿੰਘ ਵਜੋਂ ਕੀਤੀ ਗਈ। ਫੜੇ ਗਏ ਦੋਵਾਂ ਦੋਸ਼ੀਆਂ ਖਿਲਾਫ ਥਾਣਾ ਝਬਾਲ ਵਿਖੇ ਕੇਸ ਦਰਜ ਕਰ ਲਿਆ ਗਿਆ ਹੈ।ਇਸ ਮੌਕੇ ਐਸ ਪੀ (ਸਿਟੀ) ਡਾਕਟਰ ਰਿਪੂਤਾਪਨ ਸਿੰਘ ਸੰਧੂ, ਡੀ ਐਸ ਪੀ (ਡੀ) ਗੁਰਵਿੰਦਰ ਸਿੰਘ ਨਾਗਰਾ, ਥਾਣਾ ਮੁੱਖੀ ਇੰਸਪੈਕਟਰ ਪਰਮਜੀਤ ਸਿੰਘ ਵਿਰਦੀ, ਐਸ ਆਈ ਜਸਪਾਲ ਸਿੰਘ, ਏ ਐਸ ਆਈ ਇੰਦਰਜੀਤ ਸਿੰਘ, ਏ ਐਸ ਆਈ ਸੁਖਵਿੰਦਰ ਸਿੰਘ ਅਤੇ ਵੱਡੀ ਗਿਣਤੀ ਵਿੱਚ ਜਿਲਾ ਪੁਲਿਸ ਦੇ ਮੁਲਾਜਮ ਅਤੇ ਲੇਡੀਜ ਮੁਲਾਜਮ ਹਾਜ਼ਰ ਸਨ।
ਫੋਟੋ ਨੰ.21/2- ਝਬਾਲ ਕਲਾਂ ਵਿੱਚ ਚਲਾਏ “ਕਾਸੋ ਅਪ੍ਰੇਸ਼ਨ” ਦੌਰਾਨ ਘਰਾਂ ਦੀ ਤਲਾਸ਼ੀ ਕਰਦੇ ਹੋਏ ਪੁਲਿਸ ਮੁਲਾਜ਼ਮ ਅਤੇ ਨਸ਼ਾ ਤਸਕਰ ਦੇ ਘਰ ਨੂੰ ਲੱਗਿਆ ਹੋਇਆ ਜਿੰਦਾ।
