ਕਪੂਰਥਲਾ ‘ਚ ਭਾਰਤ ਪਸ਼ੂ ਧਨ ਐਪ ‘ਤੇ  ਡਾਟਾ ਸੈਨੀਟਾਈਜ਼ੇਸ਼ਨ ਮੁਹਿੰਮ ਸ਼ੁਰੂ

ਕਪੂਰਥਲਾ, 21 ਅਗਸਤ:(ਰਣਜੀਤ ਸਿੰਘ  ਚੰਦੀ)  ਪਸ਼ੂ ਪਾਲਣ ਵਿਭਾਗ ਨੇ ਭਾਰਤ ਪਸ਼ੂ ਧਨ ਐਪ ‘ਤੇ ਦਰਜ ਪਸ਼ੂਆਂ ਦੇ ਰਿਕਾਰਡ ਲਈ ਇੱਕ ਵਿਸ਼ੇਸ਼ ਡਾਟਾ ਸੈਨੀਟਾਈਜ਼ੇਸ਼ਨ ਅਤੇ ਵੈਰੀਫਿਕੇਸ਼ਨ ਮੁਹਿੰਮ ਸ਼ੁਰੂ ਕੀਤੀ ਹੈ।ਕਪੂਰਥਲਾ ਵਿੱਚ ਲਗਭਗ 135525 ਪਸ਼ੂਆਂ ਦੇ ਰਿਕਾਰਡ ਦੀ ਵੈਰੀਫਿਕੇਸ਼ਨ ਅਤੇ ਅਪਡੇਟ ਕੀਤਾ ਜਾ ਰਿਹਾ ਹੈ ਤਾਂ ਜੋ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਡਾਟਾਬੇਸ ਵਿੱਚ ਸਹੀ, ਪੂਰੀ ਅਤੇ ਮੌਜੂਦਾ ਜਾਣਕਾਰੀ ਹੋਵੇ। ਇਹ ਮੁਹਿੰਮ ਪ੍ਰਮੁੱਖ ਸਕੱਤਰ ਰਾਹੁਲ ਭੰਡਾਰੀ ਅਤੇ ਡਾਇਰੈਕਟਰ ਡਾ. ਪਰਮਦੀਪ ਸਿੰਘ ਵਾਲੀਆ ਦੀਆਂ ਹਦਾਇਤਾਂ ‘ਤੇ ਚਲਾਈ ਜਾ ਰਹੀ ਹੈ।ਡਿਪਟੀ ਡਾਇਰੈਕਟਰ, ਪਸ਼ੂ ਪਾਲਣ ਡਾ. ਬਲਵਿੰਦਰ ਸਿੰਘ ਨੇ ਦੱਸਿਆ ਕਿ ਵੈਟਰਨਰੀ ਅਤੇ ਪਸ਼ੂ ਸਿਹਤ ਸੇਵਾਵਾਂ, ਟੀਕਾਕਰਨ ਅਤੇ ਬਿਮਾਰੀਆਂ ਦੀ ਰੋਕਥਾਮ ਦੇ ਪ੍ਰੋਗਰਾਮਾਂ, ਪਸ਼ੂ ਧਨ ਵਿਕਾਸ ਸਕੀਮਾਂ, ਨਸਲ ਸੁਧਾਰ ਅਤੇ ਪਸ਼ੂ ਉਤਪਾਦਕਤਾ ਪ੍ਰੋਗਰਾਮਾਂ, ਸਰਕਾਰੀ ਭਲਾਈ ਅਤੇ ਸਹਾਇਤਾ ਪਹਿਲਕਦਮੀਆਂ ਦੀ ਪ੍ਰਭਾਵਸ਼ਾਲੀ ਯੋਜਨਾਬੰਦੀ ਅਤੇ ਸੁਚਾਰੂ ਪਹੁੰਚ ਲਈ ਪਸ਼ੂ ਧਨ ਦਾ ਸਹੀ ਡਾਟਾ ਬਹੁਤ ਜ਼ਰੂਰੀ ਹੈ।ਇਸ ਮੁਹਿੰਮ ਦੌਰਾਨ ਗਲਤ, ਅਧੂਰੀਆਂ, ਦੋਹਰੀਆਂ ਅਤੇ ਪੁਰਾਣੀਆਂ ਐਂਟਰੀਆਂ ਦੀ ਪਛਾਣ ਕਰਕੇ ਉਨ੍ਹਾਂ ਨੂੰ ਠੀਕ ਕੀਤਾ ਜਾਵੇਗਾ। ਮਰ ਚੁੱਕੇ, ਵੇਚੇ ਗਏ, ਤਬਦੀਲ ਕੀਤੇ ਗਏ ਜਾਂ ਜੋ ਪਸ਼ੂ ਹੁਣ ਦਰਜ ਮਾਲਕ ਕੋਲ ਨਹੀਂ ਹਨ, ਉਨ੍ਹਾਂ ਬਾਰੇ ਵੀ ਜਾਣਕਾਰੀ ਨੂੰ ਯੋਗ ਤਰੀਕੇ ਨਾਲ ਅਪਡੇਟ ਕੀਤਾ ਜਾਵੇਗਾ। ਉਨ੍ਹਾਂ ਸਾਰੇ ਪਸ਼ੂ ਪਾਲਕਾਂ ਅਤੇ ਆਮ ਜਨਤਾ ਨੂੰ ਇਸ ਮਹੱਤਵਪੂਰਨ ਕਾਰਜ ਵਿੱਚ ਪੂਰਨ ਸਹਿਯੋਗ ਦੇਣ ਦੀ ਅਪੀਲ ਕੀਤੀ। ਉਨ੍ਹਾਂ ਬੇਨਤੀ ਕੀਤੀ ਕਿ ਉਹ ਭਾਰਤ ਪਸ਼ੂ ਧਨ ਐਪ ‘ਤੇ ਆਪਣੇ ਪਸ਼ੂਆਂ ਲਈ ਦਰਜ ਕੀਤੀ ਜਾਣਕਾਰੀ ਦੀ ਪੜਤਾਲ ਕਰਨ। ਕਿਸੇ ਵੀ ਗਲਤ, ਅਧੂਰੀ ਜਾਂ ਪੁਰਾਣੀ ਜਾਣਕਾਰੀ ਦੇ ਮਾਮਲੇ ਵਿੱਚ, ਉਹ ਜ਼ਰੂਰੀ ਸੁਧਾਰ ਲਈ ਆਪਣੇ ਨਜ਼ਦੀਕੀ ਪਸ਼ੂ ਹਸਪਤਾਲ, ਪਸ਼ੂ ਡਿਸਪੈਂਸਰੀ ਜਾਂ ਵੈਟਰਨਰੀ ਅਫਸਰ ਨਾਲ ਸੰਪਰਕ ਕਰਨ।ਕਿਸੇ ਵੀ ਤਰ੍ਹਾਂ ਦੀ ਮਦਦ ਦੇ ਲਈ ਜ਼ਿਲ੍ਹਾ ਪ੍ਰਸ਼ਾਸਨ ਦੇ ਹੈਲਪਲਾਈਨ ਨੰਬਰ 01822-233777 ’ਤੇ ਸੰਪਰਕ ਕੀਤਾ ਜਾ ਸਕਦਾ ਹੈ।