ਬਜਾਜ ਕਰਿਆਨਾ ਸਟੋਰ  ਦੇ ਗੁਦਾਮ ‘ਚ 10 ਲੱਖ ਦੀ ਵੱਡੀ ਚੋਰੀ – 100 ਟੀਨ ਘਿਓ, 100 ਬੋਰੇ ਖੰਡ ਲੈ ਕੇ ਫਰਾਰ, ਦੁਕਾਨਦਾਰਾਂ ‘ਚ ਦਹਿਸ਼ਤ

ਝਬਾਲ, 24 ਅਗਸਤ (ਮੱਖਣ ਮਨੋਜ)  – ਸਥਾਨਕ ਅੱਡਾ ਝਬਾਲ ਦੇ ਬਾਹਰ ਅਟਾਰੀ ਰੋਡ ‘ਤੇ ਬਣੇ ਇੱਕ ਕਰਿਆਨਾ ਸਟੋਰ ਨੂੰ ਬੀਤੀ ਰਾਤ ਚੋਰਾਂ ਨੇ ਆਪਣਾ ਨਿਸ਼ਾਨਾ ਬਣਾਉਂਦੇ ਹੋਏ ਲੱਖਾਂ ਰੁਪਏ ਮੁੱਲ ਦਾ ਕਰਿਆਨੇ ਦਾ ਸਮਾਨ ਚੋਰੀ ਕਰਕੇ ਗੁਦਾਮ ਖਾਲੀ ਕਰ ਦਿੱਤਾ।ਮੌਕੇ ‘ਤੇ ਬਜਾਜ ਕਰਿਆਨਾ ਸਟੋਰ ਦੇ ਮਾਲਕ ਮਹਿੰਦਰ ਸਿੰਘ ਨੇ ਮੋਹਤਬਰ ਵਿਅਕਤੀਆਂ ਦੀ ਹਾਜ਼ਰੀ ਵਿੱਚ ਚੋਰਾਂ ਵੱਲੋਂ ਤੋੜੇ ਗਏ ਗੁਦਾਮ ਨੂੰ ਵਿਖਾਉਂਦਿਆਂ ਦੱਸਿਆ ਕਿ ਅਟਾਰੀ ਰੋਡ ‘ਤੇ ਬਣੇ ਇਸ ਗੁਦਾਮ ਵਿੱਚ ਉਹ ਕਰਿਆਨੇ ਦਾ ਥੋਕ ਦਾ ਸਮਾਨ ਰੱਖਦੇ ਸਨ। ਬੀਤੀ ਰਾਤ ਚੋਰਾਂ ਵੱਲੋਂ ਸਟੋਰ ਦਾ ਸ਼ਟਰ ਹੇਠੋਂ ਤੋੜ ਕੇ ਅੰਦਰੋਂ 100 ਟੀਨ ਘਿਓ, 100 ਬੋਰੇ ਖੰਡ ਅਤੇ ਹੋਰ ਕਰਿਆਨੇ ਦਾ ਸਮਾਨ ਚੋਰੀ ਕਰ ਲਿਆ ਗਿਆ, ਜਿਸ ਦੀ ਕੀਮਤ ਲਗਭਗ 10 ਲੱਖ ਰੁਪਏ ਬਣਦੀ ਹੈ।ਉਨ੍ਹਾਂ ਦੱਸਿਆ ਕਿ ਸੀਸੀਟੀਵੀ ਫੁਟੇਜ ਅਨੁਸਾਰ ਚੋਰ ਵੱਡੀਆਂ ਗੱਡੀਆਂ ‘ਤੇ ਆਏ ਸਨ ਅਤੇ ਚੋਰੀ ਕੀਤਾ ਸਮਾਨ ਗੱਡੀਆਂ ਵਿੱਚ ਲੱਦ ਕੇ ਫਰਾਰ ਹੋ ਗਏ।ਇਸ ਸਬੰਧੀ ਥਾਣਾ ਝਬਾਲ ਵਿਖੇ ਦਰਖਾਸਤ ਦੇ ਦਿੱਤੀ ਗਈ ਹੈ। ਸੂਚਨਾ ਮਿਲਦਿਆਂ ਹੀ ਥਾਣਾ ਝਬਾਲ ਦੀ ਪੁਲਿਸ ਨੇ ਮੌਕੇ ‘ਤੇ ਪਹੁੰਚ ਕੇ ਮੌਕਾ ਵੇਖਿਆ ਅਤੇ ਅਗਲੀ ਕਾਨੂੰਨੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਅੱਡਾ ਝਬਾਲ ਵਿਖੇ ਹੋਈ ਇਸ ਵੱਡੀ ਚੋਰੀ ਦੀ ਘਟਨਾ ਨਾਲ ਅੱਡੇ ਦੇ ਦੁਕਾਨਦਾਰਾਂ ਵਿੱਚ ਇੱਕ ਵਾਰ ਫਿਰ ਤੋਂ ਦਹਿਸ਼ਤ ਦਾ ਮਾਹੌਲ ਪੈਦਾ ਹੋ ਗਿਆ ਹੈ।