ਪਿੰਡ ਖੋਜਾ ਬੇਟ ਵਿਖੇ ਧੂਮ-ਧਾਮ ਨਾਲ ਮਨਾਇਆ ਗਿਆ ‘ਤੀਆਂ ਦਾ ਮੇਲਾ’ ਚੇਅਰਮੈਨ ਸੰਤੋਖ ਸਿੰਘ ਸਰਪੰਚ ਅਤੇ ਸਮੂਹ ਟੀਮ ਦੇ ਉਪਰਾਲੇ ਸਦਕਾ ਢੋਲ ਤੇ ਡੀ.ਜੇ. ਦੀ ਥਾਪ ‘ਤੇ ਬੀਬੀਆਂ-ਭੈਣਾਂ ਨੇ ਪਾਇਆ ਧਮਾ

ਬਲਾਚੌਰ, 9 ਅਗਸਤ (ਜਤਿੰਦਰਪਾਲ ਸਿੰਘ ਕਲੇਰ):=ਪੰਜਾਬ ਦੇ ਅਮੀਰ ਵਿਰਸੇ ਅਤੇ ਸੱਭਿਆਚਾਰਕ ਰੰਗਾਂ ਨੂੰ ਬਰਕਰਾਰ ਰੱਖਦਿਆਂ ਬਲਾਕ ਬਲਾਚੌਰ ਦੇ ਪਿੰਡ ਖੋਜਾ ਬੇਟ ਵਿਖੇ ‘ਤੀਆਂ ਦਾ ਮੇਲਾ’ ਬਹੁਤ ਹੀ ਉਤਸ਼ਾਹ ਅਤੇ ਧੂਮ-ਧਾਮ ਨਾਲ ਮਨਾਇਆ ਗਿਆ। ਇਹ ਸ਼ਾਨਦਾਰ ਸਮਾਗਮ ਸੰਤੋਖ ਸਿੰਘ ਸਰਪੰਚ (ਖੋਜਾ ਬੇਟ, ਬਲਾਕ ਬਲਾਚੌਰ) ਅਤੇ ਜ਼ਿਲ੍ਹਾ ਚੇਅਰਮੈਨ ਸੈਣੀ ਭਲਾਈ ਬੋਰਡ ਨਵਾਂਸ਼ਹਿਰ, ਪੰਜਾਬ ਦੇ ਵਿਸ਼ੇਸ਼ ਯਤਨਾਂ ਸਦਕਾ ਸਫਲਤਾਪੂਰਵਕ ਆਯੋਜਿਤ ਕੀਤਾ ਗਿਆ। ਪ੍ਰਬੰਧਕੀ ਟੀਮ ਦਾ ਸ਼ਲਾਘਾਯੋਗ ਯੋਗਦਾਨ ਇਸ ਮੇਲੇ ਨੂੰ ਯਾਦਗਾਰੀ ਬਣਾਉਣ ਵਿੱਚ ਪ੍ਰਬੰਧਕੀ ਟੀਮ ਦਾ ਵਿਸ਼ੇਸ਼ ਯੋਗਦਾਨ ਰਿਹਾ। ਪ੍ਰਮਜੀਤ ਕੌਰ ਸੈਣੀ, ਹਰਪ੍ਰੀਤ ਕੌਰ ਚਾਹਲ, ਸੁਖਬੀਰ ਕੌਰ, ਹਰਜਿੰਦਰ ਕੌਰ, ਹਰਪ੍ਰੀਤ ਕੌਰ ਸੈਣੀ, ਤਨਪ੍ਰੀਤ ਕੌਰ, ਅਤੇ ਜਸਲੀਨ ਕੌਰ ਦੀ ਸਮੂਚੀ ਟੀਮ ਵੱਲੋਂ ਕੀਤੇ ਗਏ ਉਪਰਾਲੇ ਸਦਕਾ ਪਿੰਡ ਖੋਜਾ ਬੇਟ ਦੀਆਂ ਸਾਰੀਆਂ ਹੀ ਬੀਬੀਆਂ ਅਤੇ ਭੈਣਾਂ ਨੂੰ ਇੱਕ ਮੰਚ ‘ਤੇ ਇਕੱਠੀਆਂ ਹੋ ਕੇ ਆਪਣੀ ਖੁਸ਼ੀ ਸਾਂਝੀ ਕਰਨ ਦਾ ਮੌਕਾ ਮਿਲਿਆ। ਗਿੱਧੇ, ਭੰਗੜੇ ਅਤੇ ਬੋਲੀਆਂ ਨਾਲ ਬੱਝਿਆ ਰੰਗ ਮੇਲੇ ਦੌਰਾਨ ਪਿੰਡ ਦੀਆਂ ਸਮੂਹ ਬੀਬੀਆਂ-ਭੈਣਾਂ ਨੇ ਪੂਰੇ ਉਤਸ਼ਾਹ ਨਾਲ ਹਿੱਸਾ ਲਿਆ। ਢੋਲ ਦੀ ਥਾਪ ਅਤੇ ਡੀ.ਜੇ. ਦੀ ਧਮਕ ‘ਤੇ ਔਰਤਾਂ ਨੇ ਇੱਕ ਤੋਂ ਵੱਧ ਕੇ ਇੱਕ ਪਰੰਪਰਾਗਤ ਬੋਲੀਆਂ ਪਾਈਆਂ ਅਤੇ ਗਿੱਧੇ-ਭੰਗੜੇ ਦੀਆਂ ਧਮਾਲਾਂ ਨਾਲ ਪੂਰੇ ਸਮਾਗਮ ਦਾ ਰੰਗ ਬੰਨ੍ਹ ਦਿੱਤਾ। ਪੂਰੇ ਪਿੰਡ ਵਿੱਚ ਖੁਸ਼ੀ ਅਤੇ ਸੱਭਿਆਚਾਰਕ ਰੰਗਤ ਦਾ ਮਾਹੌਲ ਦੇਖਣ ਨੂੰ ਮਿਲਿਆ। ਸਾਰੀਆਂ ਬੀਬੀਆਂ-ਭੈਣਾਂ ਨੇ ਇਸ ਰਵਾਇਤੀ ਮੇਲੇ ਦਾ ਭਰਪੂਰ ਆਨੰਦ ਮਾਣਿਆ ਅਤੇ ਆਪਸੀ ਭਾਈਚਾਰਕ ਸਾਂਝ ਨੂੰ ਹੋਰ ਪੱਕਾ ਕੀਤਾ।