ਗਲੋਬਲ ਕ੍ਰਿਸ਼ਚਨ ਐਕਸ਼ਨ ਕਮੇਟੀ ਵੱਲੋਂ ਜਿਲਾ ਡਿਪਟੀ ਕਮਿਸ਼ਨ ਰੂਪਨਗਰ ਨੂੰ ਸੌਂਪਿਆ ਮੰਗ ਪੱਤਰ

 ਨਗਰ ਨਿਗਮ ਅਤੇ ਕੌਂਸਲ ਦੀਆਂ ਚੋਣਾਂ ਯਿਸੂ ਮਸੀਹ ਦੇ ਜਨਮ ਦਿਹਾੜੇ ਵਾਲੇ ਦਿਨ ਨਾ ਕਰਵਾਉਣ ਦੀ ਕੀਤੀ ਅਪੀਲ

ਨੂਰਪੁਰਬੇਦੀ, 13 ਦਸੰਬਰ (ਦਲਜੀਤ ਚਨੌਲੀ ):- ਪੰਜਾਬ ਅੰਦਰ ਮਸੀਹ ਧਰਮ ਅਤੇ ਇਸ ਦੇ ਪੈਰੋਕਾਰਾਂ ਦੇ ਹਿੱਤਾਂ ਦੀ ਦੇਖਰੇਖ ਅਤੇ ਹੋਰ ਧਾਰਮਿਕ ਮਸਲਿਆਂ ਨੂੰ ਲੈ ਕੇ ਕੰਮ ਕਰ ਰਹੀ ਗਲੋਬਲ ਕ੍ਰਿਸ਼ਚਨ ਐਕਸ਼ਨ ਕਮੇਟੀ ਨੇ ਸਮੂਹ ਭਾਈਚਾਰੇ ਵੱਲੋਂ ਜ਼ਿਲ੍ਹਾ ਡਿਪਟੀ ਕਮਿਸ਼ਨਰ ਰੂਪਨਗਰ ਹਿਮਾਂਸ਼ੂ ਜੈਨ ਨੂੰ ਇੱਕ ਵਿਸ਼ੇਸ਼ ਮੰਗ ਪੱਤਰ ਸੌਂਪਿਆ। ਜਿਸ ਚ ਉਹਨਾਂ ਨੇ ਅਪੀਲ ਕੀਤੀ ਕਿ 25 ਦਸੰਬਰ ਨੂੰ ਸਮੁੱਚਾ ਕ੍ਰਿਸ਼ਚਨ ਭਾਈਚਾਰਾ ਪ੍ਰਭੂ ਯੀਸੂ ਮਸੀਹ ਦਾ ਜਨਮ ਦਿਹਾੜਾ ਧੂਮ ਧਾਮ ਦੇ ਨਾਲ ਮਨਾਉਂਦਾ ਹੈ ਤੇ  ਹੁਣ ਇਸੇ ਦਿਨ ਸਰਕਾਰ ਦੇ ਵੱਲੋਂ ਨਗਰ ਨਿਗਮ ਅਤੇ ਨਗਰ ਕੌਂਸਲ ਦੀਆਂ ਚੋਣਾਂ ਕਰਵਾਈਆਂ ਜਾ ਰਹੀਆਂ ਹਨ। ਉਨਾਂ ਨੇ ਇਸ ਸਬੰਧੀ ਮੰਗ ਕਰਦਿਆ ਕਿਹਾ ਕਿ ਸਾਲ ਵਿੱਚ ਇੱਕੋ ਇੱਕ ਦਿਹਾੜਾ ਯਿਸੂ ਮਸੀਹ ਦਾ ਜਨਮ ਦਿਨ ਉਹਨਾਂ ਵੱਲੋਂ ਮਨਾਇਆ ਜਾਂਦਾ ਹੈ । ਜਿਸ ਨੂੰ ਲੈ ਕੇ ਉਹ ਪੂਰਾ ਸਾਲ ਤਿਆਰੀਆਂ ਕਰਦੇ ਰਹਿੰਦੇ ਹਨ  ਅਤੇ ਇਸ ਤਿਉਹਾਰ ਦੇ ਨਾਲ ਉਹਨਾਂ ਦੇ ਧਾਰਮਿਕ ਜਜ਼ਬਾਤ ਵੀ ਜੁੜੇ ਹਨ ‌। ਪਰੰਤੂ ਜੇਕਰ ਇਸ ਦਿਨ ਚੋਣਾਂ ਹੁੰਦੀਆਂ ਹਨ ਤਾਂ ਕਿਤੇ ਨਾ ਕਿਤੇ ਉਹਨਾਂ ਦਾ ਯਿਸੂ ਮਸੀਹ ਦਾ ਜਨਮ ਦਿਹਾੜਾ ਮਨਾਉਣਾ ਫਿਕਾ ਹੋ ਜਾਵੇਗਾ। ਕਿਉਂਕਿ 24 ਦਸੰਬਰ ਰਾਤ ਅਤੇ 25 ਦਸੰਬਰ ਦਿਨ ਵੇਲੇ ਪੂਰੇ ਭਾਰਤ ਦੇ ਨਾਲ ਨਾਲ ਪੰਜਾਬ ਸੂਬੇ ਚ ਸਮੂਹ ਚਰਚਾ ਦੀ ਸੁਰੱਖਿਆ ਦੀ ਸਖਤ ਜਰੂਰਤ ਹੁੰਦੀ ਹੈ ਅਤੇ ਪ੍ਰਸ਼ਾਸਨ ਇਸ ਵਿੱਚ ਅੱਜ ਤੱਕ ਹਮੇਸ਼ਾ ਸਮਰੱਥ ਰਿਹਾ ਹੈ। ਪਰੰਤੂ ਜੇਕਰ ਇਸ ਦਿਨ ਚੋਣਾਂ ਹੁੰਦੀਆਂ ਹਨ ਤਾਂ ਸਮੁੱਚਾ ਪ੍ਰਸ਼ਾਸਨਿਕ ਅਮਲਾ ਚੋਣਾਂ ਵਿੱਚ ਰੁਝਿਆ ਹੋਣ ਕਰਕੇ ਕਿਤੇ ਨਾ ਕਿਤੇ ਉਸ ਦਿਨ ਚਰਚਾਂ ਤੇ ਕ੍ਰਿਸ਼ਚਨ ਭਾਈਚਾਰੇ ਦੀ ਸੁਰੱਖਿਆ ਲਈ ਮੁਸ਼ਕਿਲ ਪੇਸ਼ ਆਵੇਗੀ। ਇਸ ਲਈ ਇਸ ਮੰਗ ਪੱਤਰ ਰਾਹੀਂ ਕ੍ਰਿਸ਼ਚਨ ਭਾਈਚਾਰੇ ਨੇ ਜ਼ਿਲ੍ਹਾ ਪ੍ਰਸ਼ਾਸਨ ਨੂੰ ਅਪੀਲ ਕੀਤੀ ਕਿ ਕ੍ਰਿਸ਼ਚਨ ਭਾਈਚਾਰੇ ਦੀ ਭਾਵਨਾ ਨੂੰ

ਦੇਖਦੇ ਹੋਏ ਨਗਰ ਨਿਗਮ ਅਤੇ ਕੌਂਸਲ ਦੀਆਂ ਚੋਣਾਂ ਦਸੰਬਰ ਮਹੀਨੇ ਨਾ ਕਰਵਾ ਕੇ ਜਨਵਰੀ ਮਹੀਨੇ ਚ ਕਰਵਾਈਆਂ ਜਾਣ। ਇਸ ਮੌਕੇ  ਕੋਆਰਡੀਨੇਟਰ ਮਸੀਹ ਬੰਟੀ, ਜਨਰਲ ਸਕੱਤਰ ਲੁਕਸ ਮਸੀਹ, ਕਰਨ , ਦਲੀਪ ਸਿੰਘ , ਜੋਗਿੰਦਰ,  ਬਿਕਰਮਜੀਤ ਸਿੰਘ,  ਕੁਲਦੀਪ ਸਿੰਘ ਤੇ ਹੋਰ ਮੈਂਬਰ ਹਾਜ਼ਰ ਸਨ।